ಫೋರ್ಬ್ಸ್ ಶ್ರೀಮಂತರ ಪಟ್ಟಿಯಲ್ಲಿ ಮುಖೇಶ್ 9ನೇ ಸ್ಥಾನಕ್ಕೆ ಕುಸಿತ
ಮುಂಬೈ, ನ.3: ಏಷ್ಯಾದ ಅತಿ ಶ್ರೀಮಂತ ಉದ್ಯಮಿ ಮುಖೇಶ್ ಅಂಬಾನಿ ಅವರಿಗೆ ರಿಲಯನ್ಸ್ ಷೇರು ಒಂದೇ ದಿನ ಸರಿ ಸುಮಾರು 5 ಬಿಲಿಯನ್ ಡಾಲರ್ ನಷ್ಟ ಉಂಟು ಮಾಡಿದ ಸುದ್ದಿಯ ಬೆನ್ನಲ್ಲೇ ಫೋರ್ಬ್ಸ್ ಶ್ರೀಮಂತರ ಪಟ್ಟಿಯಲ್ಲಿ ಮುಖೇಶ್ 9ನೇ ಸ್ಥಾನಕ್ಕೆ ಕುಸಿತ ಕಂಡಿದ್ದಾರೆ.
ಭಾರತದ ಅತ್ಯಂತ ಶ್ರೀಮಂತ ಉದ್ಯಮಿ ಮುಖೇಶ್ ಅಂಬಾನಿ ಅವರು ಸೋಮವಾರ ಒಂದೇ ದಿನ 7 ಬಿಲಿಯನ್ ಡಾಲರ್ ಕಳೆದುಕೊಂಡಿದ್ದಾರೆ. ಫೋರ್ಬ್ಸ್ ರಿಯಲ್ ಟೈಮ್ ಡೇಟಾದಲ್ಲಿ ಈಗ ಗೂಗಲ್ ಸಹ ಸ್ಥಾಪಕ ಲ್ಯಾರಿ ಪೇಜ್ ಅವರಿಗಿಂತ ಹಿಂದಿದ್ದಾರೆ.
ತೈಲ ಮಾರುಕಟ್ಟೆಯಲ್ಲಿ ಕುಸಿತ, ಅಂಬಾನಿಗೆ 5 ಬಿಲಿಯನ್ ಡಾಲರ್ ನಷ್ಟ
ರಿಲಯನ್ಸ್ ಷೇರು ಮೌಲ್ಯ ಬಹುತೇಕ 9% ರಂತೆ 1,871.90 ರು ಕಳೆದುಕೊಂಡಿದ್ದು ಕಳೆದ ಮೂರು ತಿಂಗಳಲ್ಲೇ ಇದು ಅತ್ಯಂತ ನಷ್ಟವಾಗಿದೆ. ಅಕ್ಟೋಬರ್ 30ರಂದು ಪ್ರಕಟವಾಗಿ 2ನೇ ತ್ರೈಮಾಸಿಕ ವರದಿಯಲ್ಲಿ ನಿವ್ವಳ ಲಾಭ 32.5% ಕುಸಿತ ಕಂಡಿದ್ದು, ಈಗ ಮಾರುಕಟ್ಟೆ ಮೌಲ್ಯ 12,64,061.50 ಕೋಟಿ ರು ನಷ್ಟಿದೆ. ಷೇರುದಾರರು ಸುಮಾರು 1 ಲಕ್ಷ ಕೋಟಿ ರು ಕಳೆದುಕೊಂಡಿದ್ದಾರೆ.
ಮಾರ್ಚ್ ತಿಂಗಳಿನಿಂದ ಸರಿ ಸುಮಾರು 73 ಬಿಲಿಯನ್ ಡಾಲರ್ ನಷ್ಟು ಆಸ್ತಿ ಮೌಲ್ಯವನ್ನು ಮುಖೇಶ್ ಕಳೆದುಕೊಂಡಿದ್ದಾರೆ. ರಿಲಯನ್ಸ್ ಹಾಗೂ ಫ್ಯೂಚರ್ ರೀಟೇಲ್ ಒಪ್ಪಂದಕ್ಕೆ ಅಮೆಜಾನ್ ತಾತ್ಕಲಿಕ ತಡೆ ತಂದಿರುವುದು ಮುಖೇಶ್ ಅವರಿಗೆ ಹಿನ್ನಡೆಯುಂಟು ಮಾಡಿದೆ.