ಸುರಕ್ಷಿತ ಸಂವಹನ: ತನ್ನದೇ ಸ್ವಂತ 'ವಾಟ್ಸಾಪ್' ಸಿದ್ಧಪಡಿಸುತ್ತಿದೆ ಸರ್ಕಾರ
ನವದೆಹಲಿ, ಜನವರಿ 23: ಕಚೇರಿಗಳ ನಡುವಿನ ಸಂವಹನದಲ್ಲಿ ಗೋಪ್ಯತೆಯನ್ನು ಸುಧಾರಿಸುವ ಸಲುವಾಗಿ ಕೇಂದ್ರ ಸರ್ಕಾರ ತನ್ನದೇ ಮೊಬೈಲ್ ಫೋನ್ಗಳ ತ್ವರಿತ ಸಂದೇಶ ಸೇವೆಯನ್ನು ಆರಂಭಿಸಲಿದೆ.
ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಈ ಹೊಸ ಸಂದೇಶ ವಾಹಕ ಸೌಲಭ್ಯದ ಪ್ರಯೋಗಾತ್ಮಕ ಪರೀಕ್ಷೆಗಳನ್ನು ನಡೆಸುತ್ತಿದೆ. ವಾಟ್ಸಾಪ್ ಮಾದರಿಯ ಈ ಸಂದೇಶ ರವಾನೆ ಸೇವೆಗೆ 'ಸರ್ಕಾರಿ ತ್ವರಿತ ಸಂದೇಶ ಸೇವೆ (Government Instant Messaging Service- GIMS) ಎಂದು ಹೆಸರಿಡಲಾಗುತ್ತಿದ್ದು, ಈ ವರ್ಷದ ಕೊನೆಯಲ್ಲಿ ಈ ಹೊಸ ಸೇವೆ ಲಭ್ಯವಾಗುವ ನಿರೀಕ್ಷೆಯಿದೆ.
ಶೀಘ್ರದಲ್ಲೇ ವ್ಯಾಟ್ಸಪ್ ನಿಂದ ಹೊಸ ಬಗೆಯ ವೈಶಿಷ್ಟ್ಯಗಳು ನಿಮಗಾಗಿ
ಈ ಜಿಐಎಂಎಸ್ ಸೌಲಭ್ಯವು ಕೇಂದ್ರ ಸರ್ಕಾರದ ಕಚೇರಿಗಳು ಮತ್ತು ಇಲಾಖೆಗಳಲ್ಲದೆ, ರಾಜ್ಯ ಸರ್ಕಾರಗಳು ಬಯಸಿದರೂ ತಮ್ಮ ಕಚೇರಿಗಳ ಸಂವಹನಕ್ಕಾಗಿ ಬಳಸಬಹುದು ಎಂದು ಮೂಲಗಳು ತಿಳಿಸಿರುವುದಾಗಿ 'ಫೈನಾನ್ಷಿಯಲ್ ಎಕ್ಸ್ಪ್ರೆಸ್' ವರದಿ ಮಾಡಿದೆ.
ಸರ್ಕಾರಿ ಇಲಾಖೆಗಳ ಇ-ಮೇಲ್ ಸೇವಾ ವ್ಯವಸ್ಥೆಯನ್ನು ನಿರ್ಮಿಸಿರುವ ಏಕೀಕೃತ ಸಂದೇಶ ವೇದಿಕೆಯಾದ ಜಿಐಎಂಎಸ್ ಅನ್ನು ನ್ಯಾಷನಲ್ ಇನ್ಫಾರ್ಮ್ಯಾಟಿಕ್ಸ್ ಸೆಂಟರ್ (ಎನ್ಐಸಿ) ಅಭಿವೃದ್ಧಿಪಡಿಸುತ್ತಿದೆ. ಪ್ರಸ್ತುತ ಎನ್ಐಸಿ ಸಿದ್ಧಪಡಿಸಿರುವ ಸರ್ಕಾರಿ ಇ-ಮೇಲ್ ಸೇವೆಯಲ್ಲಿ ನಿತ್ಯವೂ ಎರಡು ಕೋಟಿಗೂ ಅಧಿಕ ಮೇಲ್ಗಳು ರವಾನೆಯಾಗುತ್ತಿವೆ.
ಸಾಮಾಜಿಕ ಮಾಧ್ಯಮದಲ್ಲಿ ಸುಳ್ಳು ಸುದ್ದಿ ಹರಡುವವರು ಗಮನಿಸಿ
ಈ ಆಪ್ಅನ್ನು ಆಂಡ್ರಾಯ್ಡ್ ಮತ್ತು ಐಓಎಸ್ ಎರಡರಲ್ಲಿಯೂ ಬಳಕೆಗೆ ಯೋಗ್ಯವಾಗುವಂತೆ ಅಭಿವೃದ್ಧಿಪಡಿಸಲಾಗುತ್ತಿದೆ. ಪ್ರಸ್ತುತ ಅದರ ಬೇಟಾ ಪರೀಕ್ಷೆ ನಡೆಯುತ್ತಿದೆ. ವಿದೇಶಾಂಗ ವ್ಯವಹಾರಗಳ ಸಚಿವಾಲಯ, ಗೃಹ ಸಚಿವಾಲಯ, ಸಿಬಿಐ, ಮಾಹಿತಿ ತಂತ್ರಜ್ಞಾನ ಸಚಿವಾಲಯ, ನೌಕಾಪಡೆ ಮತ್ತು ರೈಲ್ವೆ ಸೇರಿದಂತೆ ಒಟ್ಟು 17 ಸರ್ಕಾರಿ ಸಂಸ್ಥೆಗಳು ಈ ಪರೀಕ್ಷೆಯಲ್ಲಿ ಪಾಲ್ಗೊಂಡಿವೆ. ಸದ್ಯ 6,600 ಬಳಕೆದಾರರು ಸುಮಾರು 20 ಲಕ್ಷ ಸಂದೇಶಗಳನ್ನು ಸೃಷ್ಟಿಸಿದ್ದಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಆರಂಭದಲ್ಲಿ ಇಂಗ್ಲಿಷ್ ಮತ್ತು ಹಿಂದಿಯಲ್ಲಿ ಈ ಆಪ್ ಬಳಕೆಗೆ ಲಭ್ಯವಾಗಲಿದ್ದು, ಬಳಿಕ 11 ಪ್ರಾದೇಶಿಕ ಭಾಷೆಗಳನ್ನು ಸೇರ್ಪಡೆ ಮಾಡಲಾಗುತ್ತದೆ.