ಸರ್ಕಾರಕ್ಕೆ 10,000 ಕೋಟಿ ಬಾಕಿ ತೀರಿಸಿದ ಏರ್ಟೆಲ್
ನವದೆಹಲಿ, ಫೆಬ್ರವರಿ 17: ಕೆಲವು ದಿನಗಳ ಹಿಂದಷ್ಟೆ ಸುಪ್ರೀಂಕೋರ್ಟ್ ಟೆಲಿಕಾಂ ಕಂಪೆನಿಗಳು ಹಾಗೂ ಸರ್ಕಾರದ ವಿರುದ್ಧ ಛಾಟಿ ಬೀಸಿದ ಪರಿಣಾಮವಾಗಿ ಏರ್ಟೆಲ್ 10,000 ಕೋಟಿ ಬಾಕಿ ಹಣ ತೀರಿಸಿದೆ.
ಸೋಮವಾರ ಈ ಬಗ್ಗೆ ಅಧಿಕೃತ ಹೇಳಿಕೆಯನ್ನು ಏರ್ಟೆಲ್ ನೀಡಿದ್ದು, ದೂರವಾಣಿ ನಿಗಮಕ್ಕೆ 10,000 ಕೋಟಿ ಹಣವನ್ನು ಪಾವತಿಸಿದ್ದೇವೆ. ಇನ್ನುಳಿದ ಬಾಕಿ ಹಣವನ್ನು ಕಂಪೆನಿಯ ಸ್ವ ಮೌಲ್ಯಮಾಪನ ಮಾಡಿದ ನಂತರ ಪಾವತಿಸುವುದಾಗಿ ಹೇಳಿದೆ.
ಈಗ ನೀಡಲಾಗಿರುವ 10,000 ಕೋಟಿ ಹಣವನ್ನು ಭಾರತಿ ಏರ್ಟೆಲ್, ಹೆಕ್ಸಾಕಾಮ್, ಟೆಲಿನೋರ್ ದೂರವಾಣಿ ಸಂಸ್ಥೆಗಳಿಗಾಗಿ ನೀಡಲಾಗಿದೆ. ಇನ್ನೂ ಕೋಟ್ಯಂತರ ಹಣವನ್ನು ಏರ್ಟೆಲ್ ಪಾವತಿ ಮಾಡಬೇಕಿದೆ.
ಪರವಾನಗಿ ಶುಲ್ಕ ಸೇರಿ ಇನ್ನೂ ಕೆಲವು ಶುಲ್ಕ ಮತ್ತು ದಂಡಗಳನ್ನು ಏರ್ಟೆಲ್ ಪಾವತಿಸಬೇಕಿದ್ದು, 10,000 ಕೋಟಿ ನೀಡಿದ ಹೊರತಾಗಿ ಇನ್ನೂ ಸುಮಾರು 35,000 ಕೋಟಿ ಹಣ ಬಾಕಿ ಉಳಿಸಿಕೊಂಡಿದೆ.
ಟೆಲಿಕಾಂ ಸಂಸ್ಥೆಗಳ ಬಾಕಿ ಹಣ ಪಾವತಿ ಸಂಬಂಧಿಸಿದಂತೆ ಸುಪ್ರೀಂಕೋರ್ಟ್ ಇತ್ತೀಚೆಗೆ ಕೇಂದ್ರ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿತ್ತು. ಕಾನೂನನ್ನು ಪಾಲಿಸಲಾಗುತ್ತಿಲ್ಲ, ಸುಪ್ರೀಂಕೋರ್ಟ್ ಅನ್ನು ಮುಚ್ಚಿಬಿಡೋಣವೇ? ಎಂದು ಪ್ರಶ್ನೆ ಮಾಡಿದ್ದರು.
ಸುಪ್ರೀಂ ಸೂಚನೆ ಬಳಿಕ ದೂರವಾಣಿ ಇಲಾಖೆಯು ಎಲ್ಲಾ ಟೆಲಿಕಾಂ ಸಂಸ್ಥೆಗಳಿಗೆ ನೊಟೀಸ್ ನೀಡಿ, ಬಾಕಿ ಹಣ ಪಾವತಿಸುವಂತೆ ಒತ್ತಡ ಹೇರಿತ್ತು.