ನೂರಲ್ಲ ಮುನ್ನೂರು ಕೋಟಿ ಖಾತೆಗಳಿಗೆ ಕನ್ನ: ಯಾಹೂ
ಬೆಂಗಳೂರು, ಅಕ್ಟೋಬರ್ 04: ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಹುದೊಡ್ಡ ಹ್ಯಾಕಿಂಗ್ ಬಗ್ಗೆ ಖಚಿತ ಮಾಹಿತಿ ದೊರೆತಿದೆ. ಸರಿ ಸುಮಾರು 300 ಕೋಟಿ(3 ಬಿಲಿಯನ್) ಗೂ ಅಧಿಕ ಯಾಹೂ ಖಾತೆಗಳನ್ನು ಹ್ಯಾಕ್ ಮಾಡಲಾಗಿದೆ ಎಂದು ಯಾಹೂ ಸಂಸ್ಥೆ ಹೇಳಿದೆ.
ಅತ್ಯಂತ ದೊಡ್ಡ ಪ್ರಮಾಣದ ಭದ್ರತಾ ಲೋಪ ಇದಾಗಿದ್ದು, 2013ರಲ್ಲಿ ಸಂಭವಿಸಿದ್ದ ಕಂಪನಿಯ ಖಾತೆಗಳ ಹ್ಯಾಕ್ನಿಂದ 500 ಮಿಲಿಯನ್ (50 ಕೋಟಿ) ಮಂದಿ ಖಾತೆದಾರರಿಗೆ ತೊಂದರೆಯಾಗಿತ್ತು. ಈಗ ಯಾಹೂ ಕಂಪನಿ ಈ ವಿಷ್ಯದಲ್ಲಿ ತನ್ನದೇ ದಾಖಲೆ ಅಳಿಸಿದೆ.
2016ರ ಜುಲೈನಲ್ಲಿ ಯಾಹೂ ಸಂಸ್ಥೆ, ಟೆಲಿಕಮ್ಯೂನಿಕೇಷನ್ ಸಂಸ್ಥೆ ವೇರಿಜಾನ್ ತೆಕ್ಕೆಗೆ 4.8 ಬಿಲಿಯನ್ ಡಾಲರ್(32,495 ಕೋಟಿ ರು) ಮೊತ್ತದ ಡೀಲ್ ನೊಂದಿಗೆ ಬಿದ್ದಿತ್ತು.
2013ರ ಘಟನೆ ನಂತರ ತನ್ನ ಬಳಕೆದಾರರ ಕ್ರೆಡಿಟ್ ಕಾರ್ಡ್, ಬ್ಯಾಂಕ್ ಖಾತೆ ಸಂಖ್ಯೆಗಳು ಸುರಕ್ಷಿತವಾಗಿವೆ ಎಂದು ಯಹೂ ಹೇಳಿಕೊಂಡಿತ್ತು. ಆದರೆ, ಈಗ ಟೆಲಿಫೋನ್ ಸಂಖ್ಯೆಯಿಂದ ಹಿಡಿದು ಬಳಕೆದಾರರ ಖಾಸಗಿ ಮಾಹಿತಿಗಳು ಕಳ್ಳರ ಪಾಲಾಗುವ ಭೀತಿ ಎದುರಾಗಿದೆ.ಈ ಸುದ್ದಿ ಹೊರಬಂದ ಮೇಲೂ ಜಾಗತಿಕ ಷೇರು ಮಾರುಕಟ್ಟೆಯಲ್ಲಿ ಯಾಹೂ ಷೇರುಗಳು ಯಥಾಸ್ಥಿತಿ ಕಾಯ್ದುಕೊಂಡಿವೆ.