ಐವರು ಹೆಂಡಿರ ಖರ್ಚು ನಿಭಾಯಿಸಲು ಐವತ್ತಕ್ಕೂ ಹೆಚ್ಚು ಮಹಿಳೆಯರಿಗೆ ವಂಚನೆ
ಭೋಪಾಲ್ (ಮಧ್ಯಪ್ರದೇಶ), ಅಕ್ಟೋಬರ್ 17: ಐವತ್ತಕ್ಕೂ ಹೆಚ್ಚು ಮಹಿಳೆಯರಿಗೆ ಭೋಪಾಲ್ ನ ಏಮ್ಸ್ ನಲ್ಲಿ ಕೆಲಸ ಕೊಡಿಸುವುದಾಗಿ ವಂಚನೆ ಎಸಗಿದ ತಂಡವೊಂದನ್ನು ಮಧ್ಯಪ್ರದೇಶದ ಪೊಲೀಸ್ ವಿಶೇಷ ತಂಡ ಬಂಧಿಸಿದೆ. ಸರ್ಕಾರದ ಹೆಸರಾಂತ ಆಸ್ಪತ್ರೆಯಲ್ಲಿ ನರ್ಸ್ ಉದ್ಯೋಗ ಕೊಡಿಸುವ ಭರವಸೆ ನೀಡಿ, ವಂಚನೆ ಎಸಗಲಾಗಿದೆ.
ವಂಚನೆ ಗ್ಯಾಂಗ್ ನ ಮುಖ್ಯ ಆರೋಪಿ ದಿಲ್ಷಾದ್ ಖಾನ್ ನನ್ನು ಪೊಲೀಸರು ಬಂಧಿಸಿದ್ದಾರೆ. ಆತ ಜಬಲ್ ಪುರ್ ದವನು. ಆತನ ಸಹಚರ ಅಲೋಕ್ ಕುಮಾರ್ ಭೋಪಾಲ್ ನಿವಾಸಿ. ದಿಲ್ಷಾದ್ ಖಾನ್ ಗೆ ಐವರು ಹೆಂಡತಿಯರು. ಈ ಐವರು ಹೆಂಡತಿಯರು ದುಬಾರಿ ಖರ್ಚು ನಿಭಾಯಿಸಲು ಜನರಿಗೆ ವಂಚನೆ ಮಾಡಲು ಆರಂಭಿಸಿದ್ದಾಗಿ ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ.
ಹಜ್ ಯಾತ್ರೆ ಮಾಡಿಸುವುದಾಗಿ ಕೋಟ್ಯಂತರ ರೂಪಾಯಿ ವಂಚಿಸಿ ಪರಾರಿ
ದಿಲ್ಷಾನ್ ಖಾನ್ ನ ಒಬ್ಬ ಹೆಂಡತಿ ಜಬಲ್ ಪುರ್ ನಲ್ಲಿ ಖಾಸಗಿ ಕ್ಲಿನಿಕ್ ನಡೆಸುತ್ತಾರೆ. ಇನ್ನು ಮತ್ತೊಬ್ಬ ಆರೋಪಿ ಅಲೋಕ್ ಕುಮಾರ್ ನ ಪತ್ನಿ ಸರ್ಕಾರದ ಬಾಲಕಿಯರ ಹಾಸ್ಟೆಲ್ ನ ಸೂಪರಿಂಟೆಂಡೆಂಟ್ ಆಗಿದ್ದಾರೆ.
ಆ ಮಹಿಳೆಯರಿಗೂ ಈ ವಂಚನೆ ಪ್ರಕರಣಕ್ಕೂ ನೇರ ಸಂಬಂಧ ಇಲ್ಲ. ಆದರೂ ಈ ಪ್ರಕರಣದಲ್ಲಿ ಅವರ ಪಾತ್ರದ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಅಂದ ಹಾಗೆ ವಂಚಕರ ತಂಡವು ವಿದ್ಯಾವಂತ ಹೆಣ್ಣುಮಕ್ಕಳನ್ನೇ ಗುರಿ ಮಾಡಿಕೊಳ್ಳಲಾಗಿದೆ. ಇದೀಗ ನಗರ ಅಥವಾ ಹಳ್ಳಿಗಳಲ್ಲಿ ಇರುವ ವಂಚನೆಗೆ ಒಳಗಾದ ಮಹಿಳೆಯರನ್ನು ಹುಡುಕಲು ಪ್ರಯತ್ನ ನಡೆಯುತ್ತಿದೆ.