ದಿಢೀರ್ ರಜೆ ಘೋಷಿಸಿದ ಆರ್ಕಿಡ್ಸ್ ಶಾಲೆ
ಬೆಂಗಳೂರು, ನ. 20: ನಗರದ ಜಾಲಹಳ್ಳಿ ಬಳಿ ಇರುವ ಆರ್ಕಿಡ್ಸ್ ಇಂಟರ್ನ್ಯಾಶನಲ್ ಶಾಲೆಗೆ ಆಡಳಿತ ಮಂಡಳಿ ಗುರುವಾರ ದಿಢೀರ್ ರಜೆ ಘೋಷಿಸಿ ಆದೇಶ ಹೊರಡಿಸಿದೆ. ಈ ಕುರಿತು ಎಸ್ಎಂಎಸ್ ಮೂಲಕ ಮಕ್ಕಳ ಪಾಲಕರಿಗೆ ತಿಳಿಸಲಾಗಿದೆ.
ಶಾಲೆಯಲ್ಲಿ ಅಕ್ರಮವಾಗಿ ನಡೆಸುತ್ತಿರುವ ಪ್ರಿ ನರ್ಸರಿ, 6 ಹಾಗೂ 7ನೇ ತರಗತಿಗಳನ್ನು ಹತ್ತಿರದ ಅಧಿಕೃತ ಶಾಲೆಗೆ ವರ್ಗಾಯಿಸಬೇಕೆಂಬ ಶಿಕ್ಷಣ ಇಲಾಖೆ ಆದೇಶವನ್ನು ಧಿಕ್ಕರಿಸಿರುವ ಶಾಲೆ ಆಡಳಿತ ಮಂಡಳಿ ನ್ಯಾಯಾಲಯಕ್ಕೆ ಮೊರೆ ಹೋಗಲು ನಿರ್ಧರಿಸಿದೆ. ಆದ್ದರಿಂದ ಇಲಾಖೆ ಸೂಚನೆಯಂತೆ ತರಗತಿಗಳ ವರ್ಗಾವಣೆ ಮಾಡದೆ ಶಾಲೆಗೆ ದಿಢೀರ್ ರಜೆ ಘೋಷಿಸಿದ್ದು, ಮಕ್ಕಳ ಪಾಲಕರಿಗೆ ಎಸ್ಎಂಎಸ್ ಮೂಲಕ ತಿಳಿಸಲಾಗಿದೆ. [ಮಕ್ಕಳ ವರ್ಗಾವಣೆಗೆ ಸೂಚನೆ]
ಆದರೆ, ಶಾಲೆ ಈ ನಿರ್ಧಾರ ಕೈಗೊಳ್ಳುವ ಮೊದಲು ಯಾರೊಂದಿಗೂ ಚರ್ಚಿಸಿಲ್ಲ. ಶಾಲೆಯ ದಿಢೀರ್ ನಿರ್ಧಾರದಿಂದ ಮಕ್ಕಳ ಶೈಕ್ಷಣಿಕ ಭವಿಷ್ಯ ಆತಂಕಕ್ಕೆ ಸಿಲುಕಿದೆ. ರಜೆ ದಿನಗಳು ಎಷ್ಟು ದಿನಗಳ ಕಾಲ ಮುಂದುವರಿಯಲಿದೆ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಿಲ್ಲ ಎಂದು ಪಾಲಕರು ಆತಂಕ ವ್ಯಕ್ತಪಡಿಸಿದ್ದಾರೆ. [ಪೊಲೀಸ್ ಆಯುಕ್ತರು ಹೇಳಿದ್ದೇನು?]
ಶಿಕ್ಷಣ ಇಲಾಖೆ ಖಡಕ್ ಸೂಚನೆ: ಆರ್ಕಿಡ್ಸ್ ಇಂಟರ್ನ್ಯಾಶನಲ್ ಶಾಲೆಯಲ್ಲಿ ಕೇವಲ ಕಿರಿಯ ಪ್ರಾಥಮಿಕ ತರಗತಿಗಳನ್ನು ಮಾತ್ರ ನಡೆಸಲು ಅನುಮತಿ ಪಡೆಯಲಾಗಿದೆ. ಆದರೂ, ಕಾನೂನು ಉಲ್ಲಂಘಿಸಿ ಪ್ರಿ ನರ್ಸರಿ ಹಾಗೂ ಹಿರಿಯ ಪ್ರಾಥಮಿಕ ತರಗತಿಗಳಾದ 6 ಮತ್ತು 7ನೇ ತರಗತಿಗಳನ್ನೂ ನಡೆಸಲಾಗುತ್ತಿದ್ದು, ಇವುಗಳನ್ನು ಹತ್ತಿರದ ಅಧಿಕೃತ ಶಾಲೆಗೆ ವರ್ಗಾಯಿಸಬೇಕೆಂದು ಮಂಗಳವಾರ ಶಿಕ್ಷಣ ಇಲಾಖೆ ಸ್ಪಷ್ಟ ಸೂಚನೆ ನೀಡಿತ್ತು. [ಪೋಷಕರ ಪ್ರತಿಭಟನೆ]
ಆರ್ಕಿಡ್ಸ್ ಶಾಲೆಯಲ್ಲಿ ಬಾಲಕಿ ಮೇಲೆ ನಡೆದ ಲೈಂಗಿಕ ಕಿರುಕುಳ ಪ್ರಕರಣ ರಾಜ್ಯದ ಗಮನ ಸೆಳೆದಿತ್ತು. ಆಗ ನಡೆದ ತನಿಖೆಯಿಂದ ಶಾಲೆಯಲ್ಲಿ ಅಕ್ರಮ ತರಗತಿಗಳು ನಡೆಯುತ್ತಿರುವುದು ಬಯಲಾಗಿತ್ತು. ತಕ್ಷಣ ಅಕ್ರಮ ತರಗತಿ ಬಂದ್ ಮಾಡಿ, ಮಕ್ಕಳನ್ನು ಬೇರೆ ಶಾಲೆಗೆ ವರ್ಗಾವಣೆ ಮಾಡಲು ಶಿಕ್ಷಣ ಇಲಾಖೆ ಸೂಚನೆ ನೀಡಿದ್ದರೂ ಶಾಲೆ ಕಾಲಾವಕಾಶ ಕೋರಿತ್ತು. ಆದರೆ, ಇದೀಗ ವರ್ಗಾವಣೆ ಆದೇಶವನ್ನೇ ಶಾಲೆ ಆಡಳಿತ ಮಂಡಳಿ ಧಿಕ್ಕರಿಸಿದೆ.