ವಿದ್ಯುತ್ ಆಯಿತು, ಈಗ ದರ ಏರಿಕೆಗೆ ಜಲಮಂಡಳಿ ಚಿಂತನೆ

ಬೆಂಗಳೂರು, ನವೆಂಬರ್ 06 : ವಿದ್ಯುತ್ ದರ ಏರಿಕೆ ಆದ ತಕ್ಷಣ ಬೆಂಗಳೂರು ಜಲಮಂಡಳಿ ಸಹ ದರ ಏರಿಕೆ ಕುರಿತು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲು ಮುಂದಾಗಿದೆ. 6 ವರ್ಷಗಳಿಂದ ಜಲಮಂಡಳಿ ದರವನ್ನು ಏರಿಕೆ ಮಾಡಿಲ್ಲ.

ಪ್ರತಿ ತಿಂಗಳು ಜಲಮಂಡಳಿಗೆ 10 ರಿಂದ 15 ಕೋಟಿ ನಷ್ಟವಾಗುತ್ತಿದೆ. ಜಲಮಂಡಳಿ ಸುಮಾರು 46 ಕೋಟಿ ವಿದ್ಯುತ್ ಬಿಲ್ ಪ್ರತಿ ತಿಂಗಳು ಪಾವತಿ ಮಾಡುತ್ತದೆ. ವಿದ್ಯುತ್ ದರ ಏರಿಕೆ ಮಾಡಿದಂತೆ ನೀರಿನ ಬಿಲ್ ಸಹ ಏರಿಕೆ ಮಾಡಬೇಕು ಎಂದು ಪ್ರಸ್ತಾವನೆ ಸಲ್ಲಿಸಲಾಗುತ್ತದೆ.

ಈಗ ವಿದ್ಯುತ್ ಶುಲ್ಕ ಹೆಚ್ಚಳ ಆಗಿರುವುದರಿಂದ ಜಲಮಂಡಳಿಗೆ ಸಹ ಹೆಚ್ಚಿನ ಹೊರೆಯಾಗಲಿದೆ. ಆದ್ದರಿಂದ, ಸರ್ಕಾರಕ್ಕೆ ದರ ಹೆಚ್ಚಳದ ಪ್ರಸ್ತಾವನೆ ಸಲ್ಲಿಕೆಯಾಗಲಿದೆ. 2020ರ ಫೆಬ್ರವರಿಯಲ್ಲಿಯೇ ಒಂದು ಪ್ರಸ್ತಾವನೆ ಸಲ್ಲಿಕೆ ಮಾಡಲಾಗಿದೆ.

ಬೆಂಗಳೂರು ನಗರಾಭಿವೃದ್ಧಿ ಸಚಿವರೂ ಆಗಿರುವ ಮುಖ್ಯಮಂತ್ರಿ ಬಿ. ಎಸ್. ಯಡಿಯೂರಪ್ಪ ದರ ಏರಿಕೆಗೆ ತಾತ್ಕಾಲಿಕ ತಡೆ ನೀಡಿದ್ದರು. ಪ್ರಸ್ತುತ ಜಲಮಂಡಳಿ 8 ಸಾವಿರ ಲೀಟರ್ ನೀರು ಸಾಗಣೆಗೆ ಕಿ. ಮೀ.ಗೆ 7 ರೂ. ದರ ಪಡೆಯುತ್ತಿದೆ.

ಎಷ್ಟು ದರ ಏರಿಕೆ ಮಾಡಲಾಗುತ್ತದೆ? ಎಂದು ಬೆಂಗಳೂರು ಜಲಮಂಡಳಿ ಬಹಿರಂಗಪಡಿಸಿಲ್ಲ. ಫೆಬ್ರವರಿಯಲ್ಲಿ ಸಲ್ಲಿಸಲಾದ ಪ್ರಸ್ತಾವನೆ ಅಂತಯೇ ಏರಿಕೆ ಮಾಡಲು ಅವಕಾಶ ನೀಡಿದರೆ ಸಾಕು ಎಂದು ಮಂಡಳಿ ಹೇಳಿದೆ.

ರಾಜರಾಜೇಶ್ವರಿ ನಗರ ಕ್ಷೇತ್ರದ ಉಪ ಚುನಾವಣೆ ಮುಗಿಯುತ್ತಿದ್ದಂತೆ ಕರ್ನಾಟಕ ಸರ್ಕಾರ ವಿದ್ಯುತ್ ದರ ಏರಿಕೆ ಮಾಡಿದೆ. ನೀರಿನ ದರ ಏರಿಕೆಗೂ ಅವಕಾಶ ನೀಡಲಿದೆಯೇ? ಕಾದು ನೋಡಬೇಕು.

English summary

After the power tariff hike now Bangalore Water Supply and Sewage Board (BWSSB) asked government to hike water bill. Board hasn’t raised the water tariff for the past 6 years.