ಮಧುಮೇಹಕ್ಕೆ ನೀಡುವ ಈ ಮಾತ್ರೆಯಲ್ಲಿ ಪ್ಲಾಸ್ಟಿಕ್: ಇಲಾಖೆ ಹೇಳೋದೇನು?
ಬೆಂಗಳೂರು, ಜನವರಿ 15: ಮಧುಮೇಹವುಳ್ಳವರು ಸೇವಿಸುತ್ತಿರುವ ಮಾತ್ರೆ ಪ್ಲಾಸ್ಟಿಕ್ದು ಎನ್ನುವ ವಿವಾದ ಉಂಟಾಗಿದೆ.
ಮಧುಮೇಹಿಗಳು ಸೇವಿಸುವ ಮೆಟ್ಫಾರ್ಮಿನ್ ಹೆಸರಿನ ಮಾತ್ರೆಗಳು ಪ್ಲಾಸ್ಟಿಕ್ ಮಾತ್ರೆ ಎಂಬ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು.
ಶುಗರ್ ಮಾತ್ರೆಯಲ್ಲಿ ಪ್ಲಾಸ್ಟಿಕ್ ಪತ್ತೆ: ತರಾಟೆಗೆ ತೆಗೆದುಕೊಂಡ ದಾವಣಗೆರೆ ಜನರು
ಮಧುಮೇಹದಿಂದ ಬಳಲುತ್ತಿರುವ ಬೆಂಗಳೂರಿನ ವ್ಯಕ್ತಿಯೊಬ್ಬರು ಈ ಮಾತ್ರೆ ಸೇವಿಸಿದ್ದು, ಮರುದಿನ ವಾಂತಿ ಮಾಡಿದಾಗ ಮಾತ್ರೆ ಕರಗದೆ ಹಾಗೆ ಇತ್ತು. ಎಂಟು ತಾಸು ನೀರಿನಲ್ಲಿ ಹಾಕಿದರೂ ಮಾತ್ರೆ ಕರಗಿರಲಿಲ್ಲ. ಎಲ್ಲಾ ಔಷಧ ಅಂಗಡಿಗಳಲ್ಲೂ ಈ ಮಾತ್ರೆ ಮಾರಾಟವಾಗುತ್ತಿದೆ.
ಇದು ಪ್ಲಾಸ್ಟಿಕ್ ಮಾತ್ರೆಯಾಗಿದ್ದು, ಪ್ರಾಣಕ್ಕೆ ಅಪಾಯವನ್ನು ಉಂಟು ಮಾಡುತ್ತದೆ. ಎನ್ನುವ ಸಂದೇಶ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ಮೆಟ್ ಫಾರ್ಮಿನ್ ಪ್ಲಾಸ್ಟಿಕ್ ಮಾತ್ರೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಸ್ಪಷ್ಟನೆ ನೀಡಿರುವ ಔಷಧ ನಿಯಂತ್ರಣ ಇಲಾಖೆ ನಿರ್ದೇಶಕ ಬಿ.ಟಿ. ಖಾನಾಪುರೆ, ಈ ಮಾತ್ರೆ ಪ್ಲಾಸ್ಟಿಕ್ ಎಂಬುದನ್ನು ನಿರಾಕರಿಸಿದ್ದಾರೆ.
ಮಧು ಮೇಹಿಗಳು ಆತಂಕ ಪಡುವ ಅಗತ್ಯವಿಲ್ಲ. ಏಕೆಂದರೆ ಶೇ.90ರಷ್ಟು ಮಧುಮೇಹಿಗಳು ಈ ಮಾತ್ರೆಯನ್ನೇ ಬಳಕೆ ಮಾಡುತ್ತಿದ್ದಾರೆ. ಸದ್ಯ ಆ ಬ್ಯಾಚ್ನ ಮಾತ್ರೆಗಳನ್ನು ಬ್ಯಾನ್ ಮಾಡಲಾಗಿದೆ. ಈ ಮಾತ್ರೆ ಸಿಕ್ಕಿಂನಲ್ಲಿ ತಯಾರಾಗುತ್ತದೆ.
ಹೀಗಾಗಿ ಆ ಕಂಪನಿಯನ್ನು ಸಂಪರ್ಕಿಸಿದ್ದು, ಮಾತ್ರೆ ತಯಾರಿಕೆ ವಿಧಾನಗಳ ಬಗ್ಗೆ ಮಾಹಿತಿ ಕೇಳಲಾಗಿದೆ. ಬಳಿಕ ನಮ್ಮ ಪ್ರಯೋಗಾಲಯದಲ್ಲಿ ಪರೀಕ್ಷೆಗೆ ಒಳಪಡಿಸಲಾಗುತ್ತದೆ. ವಿನಾಕಾರಣ ಆ ವಡಿಯೋವನ್ನು ಶೇರ್ ಮಾಡಬೇಡಿ ಎಂದು ಮನವಿ ಮಾಡಿದ್ದಾರೆ.