ಸಂಚಾರಿ ಪೊಲೀಸರ ವೇಷದಲ್ಲಿ ಕಾರು ಕದ್ದ ಕಳ್ಳರು

ಬೆಂಗಳೂರು, ನವೆಂಬರ್ 25 : ಪೊಲೀಸರ ವೇಷ ಧರಿಸಿ ಕಳ್ಳತನ ಮಾಡುವುದು ಕಳ್ಳರಿಗೆ ಸುಲಭ ದಾರಿಯಾಗಿ ಕಂಡಿರುವಂತಿದೆ. ನಗರದಲ್ಲಿ ಮತ್ತೆ ಮತ್ತೆ ಇಂಥ ಘಟನೆಗಳು ಬೆಳಕಿಗೆ ಬರುತ್ತಿರುವುದೇ ಈ ಅನುಮಾನ ಮೂಡಲು ಕಾರಣ.

ಮೊನ್ನೆ ತಾನೆ ಪೊಲೀಸರಂತೆ ವೇಷ ಧರಿಸಿ ಸುಲಿಗೆ ಮಾಡುತ್ತಿದ್ದ ಗುಂಪನ್ನು ಬಂಧಿಸುವಲ್ಲಿ ನಗರದ ಪೊಲೀಸರು ಯಶಸ್ವಿ ಆಗಿದ್ದರು. ಈಗ ಮತ್ತೆ ಅಂಥಹದ್ದೇ ಘಟನೆ ನಗರದಲ್ಲಿ ಘಟಿಸಿದೆ.

ರಾಜಾಜಿನಗರದ ವೆಸ್ಟ್ ಆಫ್ ಕಾರ್ಡ್ ರಸ್ತೆಯಲ್ಲಿ ನಿಲ್ಲಿಸಿದ್ದ ಕಾರನ್ನು ಸಂಚಾರಿ ಪೊಲೀಸರ ವೇಷದಲ್ಲಿ ಬಂದ ಗುಂಪು ಟೋಯಿಂಗ್ ವಾಹನ ಬಳಸಿ ಹಾಡು ಹಗಲೇ ಎತ್ತಿಕೊಂಡು ಹೋಗಿದೆ.

ಸುತ್ತಮುತ್ತಲಿನವರೆಲ್ಲ ಬಹುಶಃ ಸಂಚಾರಿ ನಿಯಮ ಉಲ್ಲಂಘಿಸಿದ್ದಕ್ಕೆ ಪೊಲೀಸರು ಎತ್ತಿಕೊಂಡು ಹೋಗುತ್ತಿರಬಹುದು ಎಂದುಕೊಂಡಿದ್ದಾರೆ. ಆದರೆ ಕಾರಿನ ಮಾಲೀಕ ಕಿರಣ್ ಅವರು ಪೊಲೀಸ್ ಠಾಣೆಗೆ ಹೋಗಿ ವಿಚಾರಿಸಿದಾಗ ವಾಹನ ಕಳುವಾಗಿರುವುದು ಗಮನಕ್ಕೆ ಬಂದಿದೆ.

ಟೋಯಿಂಗ್ ವಾಹನದಲ್ಲಿ ಕಿರಣ್ ಅವರ ಕಾರನ್ನು ಎತ್ತಿಕೊಂಡು ಹೋಗುತ್ತಿರುವುದು ಸಿಸಿಟಿವಿ ಕ್ಯಾಮೆರಾದಲ್ಲಿ ರೆಕಾರ್ಡ್ ಆಗಿದೆ. ಆದರೆ ಈ ವಿಷಯವಾಗಿ ದೂರು ದಾಖಲಿಸಲು ರಾಜಾಜಿನಗರ ಠಾಣೆ ಪೊಲೀಸರು ಹಿಂದೇಟು ಹಾಕಿದ್ದಾರೆ. ಪೊಲೀಸರ ಹಿಂಜರಿಕೆ ಹಲವು ಅನುಮಾನಗಳಿಗೆ ಎಡೆ ಮಾಡಿಕೊಟ್ಟಿದೆ.

English summary

In Bengaluru's Rajajinagar west of chard road a car was thefted by fake traffic police. in cctv camera it has been recorded that some people toing car in toing van. Car owner Kiran Lodge compliant in Rajajinagar police station, but police were hesitating to take complaint.