2012ರ ಬಳಿಕ ಮತ್ತೊಮ್ಮೆ ಬಿಬಿಎಂಪಿಯಿಂದ ಬೀದಿ ನಾಯಿ ಗಣತಿ

ಬೆಂಗಳೂರು, ಸೆಪ್ಟೆಂಬರ್ 26 : ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ಬೀದಿ ನಾಯಿಗಳ ಗಣತಿ ನಡೆಸುತ್ತಿದೆ. 2012ರ ಬಳಿಕ ಮತ್ತೊಮ್ಮೆ ಪಾಲಿಕೆ ಬೆಂಗಳೂರು ನಗರದಲ್ಲಿ ನಾಯಿ ಗಣತಿಗೆ ಆರಂಭಿಸಿದೆ.

ಬಿಬಿಎಂಪಿ ಮೊಬೈಲ್ ಅಪ್ಲಿಕೇಶನ್ ಆಧಾರಿತ ವೈಜ್ಞಾನಿಕ ಸಮೀಕ್ಷೆಯ ಮೂಲಕ ಶ್ವಾನ ಗಣತಿ ನಡೆಸಲಿದೆ. ಪ್ರಾಣಿ ಜನನ ನಿಯಂತ್ರಣ ಕಾರ್ಯಕ್ರಮದ ಪ್ರಭಾವ ಅಳೆಯಲು ಈ ಅಧ್ಯಯನವನ್ನು 2007ರಿಂದ ಪಾಲಿಕೆ ನಡೆಸುತ್ತಿದೆ.

ಬೆಂಗಳೂರು ನಗರದಲ್ಲಿ ಜನರು ಮನೆಗಳಲ್ಲಿ ಸಾಕಿರುವ ನಾಯಿಗಳ ಗಣತಿಯನ್ನು ಮಾಡುವುದಿಲ್ಲ. ಕೇವಲ ಬೀದಿ ನಾಯಿಗಳ ಗಣತಿ ಮಾಡುವುದಾಗಿ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. 2012ರಲ್ಲಿ ಬೀದಿ ನಾಯಿಗಳ ಗಣತಿಯನ್ನು ಪಾಲಿಕೆ ಮಾಡಿತ್ತು.

ವಿಶ್ವ ಪಶು ವೈದ್ಯಕೀಯ ಸೇವೆಗಳು ಅನುಮೋದಿಸಿದ, ಭಾರತದ ಪ್ರಾಣಿ ಕಲ್ಯಾಣ ಮಂಡಳಿಯ ಮಾನ್ಯತೆ ಪಡೆದ ಮೊಬೈಲ್ ಅಪ್ಲಿಕೇಶನ್ ಮೂಲಕ ಸಮೀಕ್ಷೆ ನಡೆಸಲಾಗುತ್ತಿದ್ದು, 20 ದಿನಗಳ ಕಾಲ ಸಮೀಕ್ಷೆ ನಡೆಯಲಿದೆ.

ಸಮೀಕ್ಷೆಯ ಸಂದರ್ಭದಲ್ಲಿ ಬೀದಿ ನಾಯಿಗಳ ಸಂಖ್ಯೆಯ ಜೊತೆಗೆ ಶ್ವಾನಗಳ ಲಿಂಗ, ವಯಸ್ಸು ಮತ್ತು ಮರಿಗಳ ಸರಾಸರಿ ವಯಸ್ಸು, ರೋಗ ನಿರೋಧಕ ಸ್ಥಿತಿ ಸೇರಿದಂತೆ ಇತರ ಮಾಹಿತಿಗಳನ್ನು ಸಂಗ್ರಹ ಮಾಡಲಾಗುತ್ತದೆ.

ವಾರ್ಡ್ ವಾರು ಸಮೀಕ್ಷೆಯನ್ನು ಗೋವಾದ ಡಬ್ಲ್ಯೂವಿಎಸ್ ನಡೆಸಲಿದೆ. 28 ಪ್ಯಾರಾ ಪಶುವೈದ್ಯಕೀಯ ಸಿಬ್ಬಂದಿ ಮತ್ತು ಬಿಬಿಎಂಪಿಯ ಪಶುಸಂಗೋಪನಾ ವಿಭಾಗದ ಅಧಿಕಾರಿಗಳ ತಂಡ ಶ್ವಾನ ಗಣತಿ ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದಾರೆ.

English summary

Bruhat Bengaluru Mahanagara Palike (BBMP) has undertaken an app-based scientific survey to estimate the population of stray dogs in the city. The last census of stray dogs was conducted in 2012.