2 ಲಕ್ಷ ಖರ್ಚು ಮಾಡಿ ಬಿಬಿಎಂಪಿ ಹಿಡಿದದ್ದು 20 ಇಲಿ!
ಬೆಂಗಳೂರು,ಜು.10: ಅಕ್ರಮಗಳಿಗೆ ಹೆಸರಾಗಿರುವ ಬಿಬಿಎಂಪಿ ಅಧಿಕಾರಿಗಳು ಈಗ ಇಲಿ ಹಿಡಿಯುದರಲ್ಲೂ ಅಕ್ರಮ ಮಾಡಿದ್ದಾರೆ. ಬಿಬಿಎಂಪಿ ಕಚೇರಿಯ ಅಧಿಕಾರಿಗಳು 2 ಲಕ್ಷ ಖರ್ಚು ಮಾಡಿ ಅತಿ ಹೆಚ್ಚು 20 ಇಲಿಗಳನ್ನು ಹಿಡಿದಿದ್ದಾರೆ.!
ಪಾಲಿಕೆ ಅಧಿಕಾರಿಗಳು ನಡೆಸಿರುವ ಇಂತಹ ದುಂದು ವೆಚ್ಚದ ಪ್ರಕರಣ ಇದೀಗ ಬೆಳಕಿಗೆ ಬಂದಿದೆ. ಬುಧವಾರ ನಡೆದ ಕೌನ್ಸಿಲ್ ಸಭೆಯಲ್ಲೂ 2 ಲಕ್ಷದಲ್ಲಿ 20 ಇಲಿ ಹಿಡಿದ ಪ್ರಕರಣ ಪ್ರಸ್ತಾಪವಾಗಿ ಭಾರೀ ಚರ್ಚೆಗೆ ಗ್ರಾಸವಾಯಿತು.
ಈ ಅಕ್ರಮವನ್ನು ಬಯಲು ಮಾಡಿದ ಯಡಿಯೂರು ಕಾರ್ಪೋರೇಟರ್ ಎನ್.ಆರ್. ರಮೇಶ್ ಮಾತನಾಡಿ ಅಧಿಕಾರಿಗಳು ಎಷ್ಟು ಭ್ರಷ್ಟರಾಗಾಗಿದ್ದಾರೆಂದರೆ ಇಲಿ ಹಿಡಿಯುವ ಹೆಸರಿನಲ್ಲೂ ಅಕ್ರಮ ಮಾಡುತ್ತಿದ್ದಾರೆ. ಎಷ್ಟು ಇಲಿಗಳನ್ನು ಹಿಡಿದಿದ್ದೀರಿ ಎಂದು ಆರ್ಟಿಐ ಅಡಿಯಲ್ಲಿ ಪ್ರಶ್ನಿಸಿ ಅಧಿಕಾರಿಗಳಿಂದ ಲಿಖಿತ ಉತ್ತರ ಬಯಸಿ ಪತ್ರ ಬರೆದಿದ್ದೆವು. ಈ ವೇಳೆ ಅಧಿಕಾರಿಗಳು 2 ಲಕ್ಷ ರೂ. ವೆಚ್ಚ ಮಾಡಿ , 20 ಇಲಿ ಹಿಡಿಯಲಾಗಿದೆ ಎಂದು ಲಿಖಿತ ಉತ್ತರ ನೀಡಿದ್ದಾರೆ ಎಂದು ಅವರು ತಿಳಿಸಿದರು.
ಅಲ್ಮೆರಾ, ಮೇಜುಗಳನ್ನು ಖರೀದಿಯಲ್ಲೂ ಅಧಿಕಾರಿಗಳು ಅವ್ಯವಹಾರ ನಡೆದಿದ್ದು, 6-7 ಅಡಿ ಉದ್ದದ ತೆಳುವಾದ ಅಲ್ಮೆರಾಗಳನ್ನು ಖರೀದಿಸಿ 16-17 ಸಾವಿರ ಬಿಲ್ ಮಾಡುತ್ತಾರೆ ಎಂದು ರಮೇಶ್ ಆರೋಪಿಸಿದರು.
ಬಿಬಿಎಂಪಿ ಇಲಿಗಳ ನಿಯಂತ್ರಣಕ್ಕೆ 08-10-12 ರಿಂದ 08-01-2013 ರವರೆಗೆ 99,000 ರೂ., 01-08-13 ರಿಂದ 31-10-13ರವರೆಗೆ 99,000 ವೆಚ್ಚ ಮಾಡಿರುವ ದಾಖಲೆಯನ್ನು ಎನ್.ಆರ್. ರಮೇಶ್ ಸಭೆಯಲ್ಲಿ ಪ್ರದರ್ಶಿಸಿದರು.