ಅಸ್ಸಾಂ ದಾಳಿಯ ಪ್ರಮುಖ ಸೂತ್ರಧಾರ ಸಂಜು ಅರೆಸ್ಟ್
ಅಸ್ಸಾಂ ದಾಳಿ ಪ್ರಕರಣದ ಪ್ರಮುಖ ಆರೋಪಿಯೋರ್ವನನ್ನು ಬೆಂಗಳೂರು ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿ ಸಂಜು ಬೋಡೊಲೋಯಿ (27) ಎನ್ಎಫ್ಡಿಬಿ (ಎಸ್) ಸಂಘಟನೆಯ ಸಂಘಟನಾ ಕಾರ್ಯದರ್ಶಿಯಾಗಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಸ್ಸಾಂನ ಸೋನಿಟ್ಪುರ್ ಹಾಗೂ ಕೊಕ್ರಝಾರ್ ಜಿಲ್ಲೆಗಳಲ್ಲಿ 2014ರ ಡಿಸೆಂಬರ್ 23ರಂದು ನಡೆದ ನರಮೇಧದಲ್ಲಿ 80ಕ್ಕಿಂತ ಹೆಚ್ಚು ಜನ ಮೃತಪಟ್ಟಿದ್ದರು. ಈ ನರಮೇಧದಲ್ಲಿ ಭಾಗವಹಿಸಿದ್ದ ಸಂಜು ನಂತರ ಬೆಂಗಳೂರಿನ ಇಲೆಕ್ಟ್ರಾನಿಕ್ಸ್ ಸಿಟಿಗೆ ಬಂದು ನೆಲೆಸಿದ್ದ.
ತಪ್ಪೊಪ್ಪಿಕ್ಕೊಂಡಿದ್ದಾನೆ : ತಾನು ನರಮೇಧ ಪ್ರಕರಣದಲ್ಲಿ ಭಾಗವಹಿಸಿದ್ದನ್ನು ಸಂಜು ಈಗಾಗಲೇ ಪೊಲೀಸರಲ್ಲಿ ಒಪ್ಪಿಕೊಂಡಿದ್ದಾನೆ. ಅಲ್ಲದೆ, "ನಾನು ಎನ್ಎಫ್ಡಿಬಿ (ಎಸ್) ಸಂಘಟನೆಯ ಸಂಘಟನಾ ಕಾರ್ಯದರ್ಶಿಯಾಗಿದ್ದು, ಬಾಂಗ್ಲಾದೇಶದಲ್ಲಿ ನನಗೆ ತರಬೇತಿ ನೀಡಲಾಗಿದೆ" ಎಂಬುದನ್ನೂ ತಿಳಿಸಿದ್ದಾನೆ. [ಶಂಕಿತ ಬೋಡೋ ಉಗ್ರನ ಬಂಧನ]
ಪ್ರಸ್ತುತ ಬೆಂಗಳೂರು ಪೊಲೀಸರು ಅಸ್ಸಾಂ ಪೊಲೀಸರು ಹಾಗೂ ಎನ್ಐಎ ಜೊತೆ ಸಂಪರ್ಕದಲ್ಲಿದ್ದಾರೆ. ಅವರಿಂದ ಕೋರಿಕೆ ಬಂದ ತಕ್ಷಣ ಬಂಧಿತ ಸಂಜುನನ್ನು ಅವರ ಕೈಗೊಪ್ಪಿಸಲಾಗುವುದು ಎಂದು ತಿಳಿಸಿದ್ದಾರೆ.
ವಾಂಟೆಡ್ ಪಟ್ಟಿಯಲ್ಲಿದ್ದಾನೆ : ಬಂಧಿತ ಸಂಜು ಹಲವು ಅಸ್ಸಾಂ ದಾಳಿ ಜೊತೆಗೆ ಹಲವು ಪ್ರಕರಣಗಳಲ್ಲಿ ಆರೋಪಿಯಾಗಿದ್ದಾನೆ. ಆತ ಎನ್ಐಎ ಹಾಗೂ ಅಸ್ಸಾಂ ಪೊಲೀಸ್ನ ವಾಂಟೆಡ್ ಪಟ್ಟಿಯಲ್ಲಿದ್ದಾನೆ. [ಮಣಿಪುರ ಉಗ್ರನ ಕೋಟಿ ರು. ಸಿಕ್ತು]
ಸಂಘಟನಾ ಕಾರ್ಯದರ್ಶಿಯಾಗಿರುವ ಸಂಜು ಉಗ್ರವಾದಿ ಸಂಘಟನೆಯನ್ನು ಬೆಳೆಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ. ಹಲವು ದಾಳಿ ಪ್ರಕರಣಗಳ ಮಾಸ್ಟರ್ ಮೈಂಡ್ ಕೂಡ ಹೌದು ಎಂದು ಪೊಲೀಸರು ತಿಳಿಸಿದ್ದಾರೆ.