9 ಲಕ್ಷ ವಿದ್ಯುನ್ಮಾನ ಮತಯಂತ್ರಗಳು ಗುಜರಿಗೆ
ನವದೆಹಲಿ, ಜೂ. 28: ಲೋಕಸಭಾ ಚುನಾವಣೆ ಸಂದರ್ಭದಲ್ಲಿ ಕೆಲವೊಂದು ಕಡೆ ವಿದ್ಯುನ್ಮಾನ ಮತಯಂತ್ರಗಳಲ್ಲಿ ದೋಷ ಕಂಡು ಬಂದ ಹಿನ್ನಲೆಯಲ್ಲಿ ಹಳೆಯ ಸುಮಾರು 9 ಲಕ್ಷಕ್ಕೂ ಅಧಿಕ ಮತಯಂತ್ರಗಳನ್ನು ಗುಜರಿಗೆ ಹಾಕಲು ಚುನಾವಣಾ ಆಯೋಗ ನಿರ್ಧರಿಸಿದೆ.
ಮುಂದಿನ ಲೋಕಸಭಾ ಚುನಾವಣೆ ವೇಳೆ ಆಯೋಗದಿಂದ ಪ್ರಕ್ರಿಯೆಯಲ್ಲಿ ಯಾವುದೇ ಸಮಸ್ಯೆ ಸೃಷ್ಟಿಯಾಗದಿರಲು ಚುನಾವಣಾ ಆಯೋಗ ಈಗಲೇ ಎಚ್ಚೆತ್ತುಕೊಂಡಿದ್ದು 15 ವರ್ಷ ಹಳೆಯದಾದ ಸುಮಾರು 9 ಲಕ್ಷ ಮತಯಂತ್ರಗಳನ್ನು ಬಳಸದಿರಲು ನಿರ್ಧರಿಸಿದೆ.
ಈ ಬಾರಿ ಲೋಕಸಭಾ ಚುನಾವಣೆಯಲ್ಲಿ ಕೆಲವೊಂದು ಕಡೆ ಮತಯಂತ್ರ ಕೈಕೊಟ್ಟಿದ್ದರೆ, ಕೆಲವು ಮತಗಟ್ಟೆಯಲ್ಲಿ ಒಂದೇ ಅಭ್ಯರ್ಥಿಗೆ ಎಲ್ಲಾ ಮತಗಳು ಬಿದ್ದ ಹಿನ್ನಲೆಯಲ್ಲಿ ಚುನಾವಣಾ ಆಯೋಗ ಮೇಜರ್ ಸರ್ಜರಿಗೆ ಮುಂದಾಗಿದೆ.[ಪುಣೆ: ಯಾವ ಗುಂಡಿ ಒತ್ತಿದ್ದರೂ ಕೈಗೆ ಮತ!]
ಚುನಾವಣೆಗೆ ಇವಿಎಂ ಬಳಕೆಗೆ ಬಂದ ಬಳಿಕ ಮೊದಲ ಬಾರಿಗೆ ಇಷ್ಟೊಂದು ದೊಡ್ಡ ಸಂಖ್ಯೆ ಮತಯಂತ್ರ ಬದಲಾಯಿಸಲು ಆಯೋಗ ನಿರ್ಧರಿಸಿದ್ದು ಇವುಗಳ ಜಾಗದಲ್ಲಿ ಹೊಸ ಮತ ಯಂತ್ರಗಳನ್ನು ಖರೀದಿಗೆ ಮುಂದಾಗಿದೆ.
ಹೊಸ ಮತಯಂತ್ರ ಖರೀದಿ ಸಲುವಾಗಿ ಚುನಾವಣಾ ಆಯೋಗ ಕಳೆದ ವಾರವೇ ಮೋದಿ ಸರ್ಕರಕ್ಕೆ ಒಂದು ಸಾವಿರ ಕೋಟಿ ವೆಚ್ಚದ ಪ್ರಸ್ತಾವನೆ ಕಳುಹಿಸಿದೆ. ದೇಶದ ಚುನಾವಣೆಯ ಬೆನ್ನೆಲುಬು ಎಂದೇ ಪ್ರಸಿದ್ದವಾಗಿರುವ ಇವಿಎಂನ್ನು ಮೊದಲ ಬಾರಿಗೆ 2004ರ ಲೋಕಸಭಾ ಚುನಾವಣೆಯಲ್ಲಿ ಸಾರ್ವತ್ರಿಕವಾಗಿ ಬಳಸಲಾಯಿತು.
ಒಂದು ಇವಿಎಂ ತಯಾರಿಸಲು 2000-2001ರಲ್ಲಿ 10 ಸಾವಿರ ರೂಪಾಯಿ ವೆಚ್ಚವಾಗಿದ್ದರೆ, ಪ್ರಸ್ತುತ 18 ಸಾವಿರ ರೂ ವೆಚ್ಚವಾಗಲಿದೆ.