ಬೆಂಗಳೂರು: ಪೀಕ್ ಅವರ್ ಗಳಲ್ಲಿ 4-5 ನಿಮಿಷಕ್ಕೊಂದು ಮೆಟ್ರೊ ರೈಲು

ಬೆಂಗಳೂರು, ಫೆಬ್ರವರಿ 28: ಮೆಟ್ರೋ ರೈಲಲ್ಲಿ ಪ್ರಯಾಣಿಸುವವರಿಗೆ ಇದು ಖುಷಿಯ ವಿಚಾರ. ಇನ್ನು ಮುಂದೆ ಕೆಲವು ಮಾರ್ಗಗಳಲ್ಲಿ ಕೇವಲ 4-5 ನಿಮಿಷಕ್ಕೊಂದು ಮೆಟ್ರೋ ರೈಲು ಓಡಾಡಲಿದೆ.

ಬೈಯಪ್ಪನಹಳ್ಳಿ-ಮೈಸೂರು ರಸ್ತೆ ಹಾಗೂ ಪೂರ್ವ-ಪಶ್ಚಿಮ ಮೆಟ್ರೋ ಮಾರ್ಗ (ಪರ್ಪಲ್ ಲೈನ್)ದಲ್ಲಿ ಪ್ರಯಾಣಿಕರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಬೆಳಗ್ಗೆ ಹಾಗೂ ಸಂಜೆ ಜನದಟ್ಟಣೆ ಇರುವ ಸಮಯದಲ್ಲಿ 4 ರಿಂದ 5 ನಿಮಿಷಕ್ಕೊಮ್ಮೆ ಮೆಟ್ರೋ ರೈಲು ಸಂಚರಿಸಲಿದೆ. ಸೋಮವಾರದಿಂದಲೇ ಈ ಸಂಚಾರ ಆರಂಭವಾಗಿದ್ದು ಪ್ರಯಾಣಿಕರಿಗೆ ಅನುಕೂಲವಾಗಲಿದೆ.

ಇನ್ನು ವಾರಾಂತ್ಯದಲ್ಲಿ ಹಾಗೂ ಸರ್ಕಾರಿ ರಜಾ ದಿನಗಳಲ್ಲಿ ಪ್ರತಿ 6 ರಿಂದ 15 ನಿಮಿಷಕ್ಕೊಂದು ರೈಲು ಸಂಚಾರವಿರಲಿದೆ. ಜನದಟ್ಟಣೆ ಇಲ್ಲದ ಅವಧಿಯಲ್ಲಿ ಗರಿಷ್ಟ 15 ನಿಮಿಷದ ಒಳಗೆ ಒಂದು ರೈಲು ಓಡಾಡಲಿದೆ.

ಸೋಮವಾರದಿಂದ-ಶುಕ್ರವಾರ

ಬೈಯಪ್ಪನಹಳ್ಳಿ ಕಡೆಗೆ

ಬೆಳಗ್ಗೆ 7.50ರಿಂದ 8.30ರವೆರಗೆ ಪ್ರತಿ 5 ನಿಮಿಷಕ್ಕೊಮ್ಮೆ, 8.30ರಿಂದ 9.10 ರವರೆಗೆ ಪ್ರತಿ 4 ನಿಮಿಷಕ್ಕೊಮ್ಮೆ, 9.10ರಿಂದ 9.30ರವರೆಗೆ 5 ನಿಮಿಷಕ್ಕೊಮ್ಮೆ, ಸಂಜೆ 5.18ರಿಂದ 5.28 ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ, 5.28ರಿಂದ 6.12ರವರೆಗೆ ಪ್ರತಿ 4 ನಿಮಿಷಕ್ಕೊಮ್ಮೆ ಹಾಗೂ 6.12ರಿಂದ 6.32ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ ಮೆಟ್ರೋ ರೈಲು ಸಂಚರಿಸಲಿದೆ.

ಮೈಸೂರು ರಸ್ತೆ ಕಡೆಗೆ

ಬೆಳಗ್ಗೆ 8.30ರಿಂದ 9.10ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ, 9.10ರಿಂದ 9.50ರವರೆಗೆ ಪ್ರತಿ 4 ನಿಮಿಷಕ್ಕೊಮ್ಮೆ, 9.50 ರಿಂದ 10.10 ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ, ಸಂಜೆ 5.58 ರಿಂದ 6.08ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ , 6.08ರಿಂದ 6.52ರ ವರೆಗೆ ಪ್ರತಿ 4 ನಿಮಿಷಕ್ಕೊಮ್ಮೆ ಹಾಗೂ 6.52ರಿಂದ 7.12ರವರೆಗೆ ಪ್ರತಿ 5 ನಿಮಿಷಕ್ಕೊಮ್ಮೆ ಮೆಟ್ರೋ ರೈಲು ಪ್ರಯಾಣಿಸಲಿದೆ.

2016 ನವೆಂಬರ್ ನಲ್ಲೂ ಇದೇ ರೀತಿ 4 ನಿಮಿಷಕ್ಕೊಮ್ಮೆ 'ನಮ್ಮ ಮೆಟ್ರೋ' ರೈಲ್ವೇ ಸೇವೆ ಆರಂಭಿಸಿತ್ತು. ಆದರೆ ಪ್ರಯಾಣಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಬರದ ಹಿನ್ನಲೆಯಲ್ಲಿ ಇದನ್ನು ನಿಲ್ಲಿಸಲಾಯಿತು. ಇತ್ತೀಚೆಗೆ ಪ್ರಯಾಣಿಕರ ಸಂಖ್ಯೆ ಏರಿಕೆಯಾಗಿದ್ದು 1.75-1.80 ಲಕ್ಷ ಪ್ರಯಾಣಿಕರು ಪ್ರತಿದಿನ ಮೆಟ್ರೊ ರೈಲಿಗೆ ಬರುತ್ತಿದ್ದಾರೆ. ಹೀಗೆ ಪ್ರಯಾಣಿಕರ ಸಂಖ್ಯೆ ಹೆಚ್ಚಾದ ಹಿನ್ನಲೆಯಲ್ಲಿ ಮತ್ತೆ ನಮ್ಮ ಮೆಟ್ರೊ ಈ ನಿರ್ಧಾರಕ್ಕೆ ಬಂದಿದೆ.

English summary

Trains were operated at a frequency of four to five minutes in the peak ours on Purple Line of Namma Metro, that is Baiyappanahalli to Mysuru Road as the number of commuters increased.