ಬಾಲಕಿ ಅತ್ಯಾಚಾರ, ಹತ್ಯೆ ಅಪರಾಧಿಗೆ ಮರಣದಂಡನೆ ವಿಧಿಸಿದ ಕೋರ್ಟ್

ಹರಿಯಾಣ, ಡಿಸೆಂಬರ್ 23: ಎಂಟು ವರ್ಷದ ಬಾಲಕಿಯ ಮೇಲೆ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಲ್ಲಿನ ಜಿಲ್ಲಾ ಕೋರ್ಟ್ ಹತ್ತೊಂಬತ್ತು ವರ್ಷದ ಯುವಕನಿಗೆ ಗಲ್ಲು ಶಿಕ್ಷೆ ವಿಧಿಸಿದೆ. ಈತ ಈ ವರ್ಷದ ಜೂನ್ ನಲ್ಲಿ ಅತ್ಯಾಚಾರ ಎಸಗಿದ್ದ. ಅರು ತಿಂಗಳ ಒಳಗಾಗಿ ಪ್ರಕರಣದ ವಿಚಾರಣೆಯನ್ನು ಪೂರ್ತಿಗೊಳಿಸಲಾಗಿದೆ.

ಹಗಲು ವೇಳೆಯಲ್ಲೇ ನಡೆದ ಈ ಕೃತವನ್ನು ವಿರಳಾತಿ ವಿರಳ ಎಂದು ಪರಿಗಣಿಸಲಾಗಿದೆ. 2012ರಲ್ಲಿ ನಡೆದ ನಿರ್ಭಯಾ ಪ್ರಕರಣಕ್ಕಿಂತ ಇದು ಯಾವುದಕ್ಕೂ ಕಡಿಮೆಯಿಲ್ಲ. ಆದ್ದರಿಂದ ಆರೋಪಿಯು ಗಲ್ಲು ಶಿಕ್ಷೆಗೆ ಅರ್ಹ ಎಂದು ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ನರೇಶ್ ಕುಮಾರ್ ಆದೇಶಿಸಿದ್ದಾರೆ.

ಈ ವರ್ಷದ ಜೂನ್ ಒಂಬತ್ತನೇ ತಾರೀಕು ಈ ಘಟನೆ ನಡೆದಿತ್ತು. ಸಂತ್ರಸ್ತೆ ಒಬ್ಬಳೇ ಮನೆಯಲ್ಲಿರುವ ಸಮಯದಲ್ಲಿ ಆಕೆಗೆ ಆಮಿಷವೊಡ್ಡಿದ್ದ ಆರೋಪಿ, ಈ ಕೃತ್ಯ ಎಸಗಿದ್ದ. ಆ ಯುವಕ ಅತ್ಯಾಚಾರ ಎಸಗುವ ಮುನ್ನ ಎಂಟು ವರ್ಷದ ಬಾಲಕಿಗೆ ಅಶ್ಲೀಲ ದೃಶ್ಯಾವಳಿಗಳನ್ನು ತೋರಿಸಿದ್ದ ಎಂಬುದು ವಿಚಾರಣೆ ವೇಳೆ ಗೊತ್ತಾಗಿತ್ತು.

ಯಾವಾಗ ಆ ಬಾಲಕಿ ತಡೆ ಒಡ್ಡಲು ಯತ್ನಿಸಿ, ಅಳಲು ಆರಂಭಿಸಿದ್ದಳೋ ಆಗ ಆಕೆಯ ಬಾಯಿಯನ್ನು ಮುಚ್ಚಿ, ಕೈ-ಕಾಲುಗಳನ್ನು ಹಗ್ಗದಿಂದ ಕಟ್ಟಿ, ಆ ನಂತರ ಅತ್ಯಾಚಾರ ಎಸಗಿದ್ದ. ಎಲ್ಲಿ ಆಕೆ ತನ್ನ ಕುಟುಂಬಕ್ಕೆ ಈ ಮಾಹಿತಿ ತಿಳಿಸುತ್ತಾಳೋ ಎಂಬ ಆತಂಕದಲ್ಲಿ ಬಾಲಕಿಯನ್ನು ಕೊಲೆ ಮಾಡಿ, ಶವವನ್ನು ತನ್ನ ಕೋಣೆಯ ಅಲ್ಮೇರಾದಲ್ಲಿ ಆರೋಪಿ ಬಚ್ಚಿಟ್ಟಿದ್ದ. ಆರೋಪಿಯ ಗೊಂದಲದ ಹೇಳಿಕೆಯಿಂದ ಪೊಲೀಸರಿಗೆ ಈ ಪ್ರಕರಣ ಭೇದಿಸಲು ಸಾಧ್ಯವಾಯಿತು.

‌ಈ ಪ್ರಕರಣವನ್ನು ವಿರಳಾತಿವಿರಳ ಎಂದು ನ್ಯಾಯಾಲಯ ಪರಿಗಣಿಸುತ್ತದೆ. ಮರಣದಂಡನೆಗಿಂತ ಕಡಿಮೆ ಪ್ರಮಾಣದ ಶಿಕ್ಷೆ ನೀಡಲು ಸಾಧ್ಯವಿಲ್ಲ. ಆ ಬಾಲಕಿ ಅನುಭವಿಸಿದ ಯಾತನೆಯನ್ನು ಪರಿಗಣಿಸಲಾಗಿದೆ. ಇದನ್ನು ಕೋರ್ಟ್ ನಿರ್ಲಕ್ಷಿಸಲು ಸಾಧ್ಯವಿಲ್ಲ. ನಿರ್ಭಯಾ ಪ್ರಕರಣಕ್ಕಿಂತ ಇದು ಕಡಿಮೆ ಇಲ್ಲ. ಆ ಮಗುವಿನ ಉಜ್ವಲ ಭವಿಷ್ಯವನ್ನು ಅಪರಾಧಿ ನಾಶ ಪಡಿಸಿದ್ದಾನೆ. ಹಗಲು ವೇಳೆಯಲ್ಲಿ ಈ ಕೃತ್ಯ ಎಸಗಿದ್ದಾನೆ ಎಂದು ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ನರೇಶ್ ಕುಮಾರ್ ಹೇಳಿದ್ದಾರೆ.

English summary

A Rewari court in Haryana has awarded capital punishment to a 19-year-old boy for raping and murdering an eight-year-old girl in June earlier this year. Completing the trial in around six months, the court of additional sessions judge Naresh Kumar termed this daylight incident a rarest of rare and said it was no lesser than the 2012 Nirbhaya case.