ರಾಜೀವ್ ಗಾಂಧಿ ಕುಟುಂಬದ ರಕ್ಷಣೆಗಾದ ಖರ್ಚು 1800 ಕೋಟಿ
ಯುಪಿಎ ಅಧ್ಯಕ್ಷೆ ಸೋನಿಯಾ ಗಾಂಧಿ, ಪ್ರಿಯಾಂಕಾ ಗಾಂಧಿ, ರಾಹುಲ್ ಗಾಂಧಿ, ಪ್ರಧಾನಿ ಮನಮೋಹನ್ ಸಿಂಗ್ ಮತ್ತು ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ರಕ್ಷಣಾ ಖರ್ಚುವೆಚ್ಚ ಬರೀ 2011 -12 ಆರ್ಥಿಕ ವರ್ಷದಲ್ಲಿ 386 ಕೋಟಿ ರೂಪಾಯಿ. 2004ರಿಂದ ಇದುವರೆಗೆ ಕೇಂದ್ರ ಸರಕಾರ ಇವರ ರಕ್ಷಣೆಗೆ 1800 ಕೋಟಿ ರೂಪಾಯಿಯನ್ನು ವ್ಯಯಿಸಿದೆ.
ಈ ಐವರಿಗೆ ಕೇಂದ್ರ ಸರಕಾರ ಎಸ್ಪಿಜಿ (ಸ್ಪೆಷಲ್ ಪ್ರೊಟೆಕ್ಶನ್ ಗ್ರೂಪ್) ಭದ್ರತೆ ನೀಡುತ್ತಿದೆ. ಕಳೆದ NDA ಸರಕಾರಕ್ಕೆ ಹೋಲಿಸಿದರೆ ಯುಪಿಎ ಸರಕಾರ ಇವರ ಭದ್ರತೆಗೆ ಖರ್ಚು ಮಾಡುತ್ತಿರುವ ವೆಚ್ಚ ನಾಲ್ಕು ಪಟ್ಟು ಹೆಚ್ಚು.
ಯುಪಿಎ ಸರಕಾರ ಅಧಿಕಾರಕ್ಕೆ ಬಂದ 2004 -05ರಲ್ಲಿ 97 ಕೋಟಿ ರೂಪಾಯಿ ಮಾತ್ರ ಎಸ್ಪಿಜಿ ರಕ್ಷಣೆಗೆ ಖರ್ಚು ಮಾಡಲಾಗಿತ್ತು. ಪ್ರಸಕ್ತ ಹಣಕಾಸಿನ ಸಾಲಿನಲ್ಲಿ ಖರ್ಚಿನ ವೆಚ್ಚ 350 ಕೋಟಿ ರೂಪಾಯಿ ದಾಟಬಹುದೆಂದು ಕೇಂದ್ರ ಗೃಹ ಇಲಾಖೆ ಅಂದಾಜಿಸಿದೆ.
1999 -2000 ದಲ್ಲಿ SPG ರಕ್ಷಣೆಗೆ ಖರ್ಚಾಗಿದ್ದು 75 ಕೋಟಿ ರೂಪಾಯಿ. ವಿ ಪಿ ಸಿಂಗ್ ಮತ್ತು ಪಿ ವಿ ನರಸಿಂಹ ರಾವ್ ತಮಗೆ ನೀಡಿದ್ದ ಎಸ್ಪಿಜಿ ರಕ್ಷಣೆ ಹಿಂದಕ್ಕೆ ಪಡೆಯುವಂತೆ ಗೃಹ ಖಾತೆಗೆ ಸೂಚಿಸಿದ್ದರು.
ಅದಾದ ನಂತರ ಮಾಜಿ ಪ್ರಧಾನಿಗಳಾದ ಐ ಕೆ ಗುಜ್ರಾಲ್, ಚಂದ್ರಶೇಖರ್ ಮತ್ತು ದೇವೇಗೌಡ ಅವರಿಗೆ ನೀಡುತ್ತಿದ್ದ ಈ ಭದ್ರತೆಯನ್ನು ಹಿಂದಕ್ಕೆ ಪಡೆಯಲಾಗಿತ್ತು.
ಪ್ಯಾರಾ ಮಿಲಿಟರಿ ಪಡೆಯಿಂದ ವಿಶೇಷ ತರಬೇತಿ ಪಡೆದವರನ್ನು SPG ಪಡೆಯಲ್ಲಿರುತ್ತಾರೆ. ಸುಮಾರು ಮೂರುವರೆ ಸಾವಿರ ಸಿಬ್ಬಂದಿ ಇದರಡಿಯಲ್ಲಿ ಬರುತ್ತಾರೆ ಹಾಗೂ ಅತ್ಯಾಧುನಿಕ ಸಾಧನಗಳನ್ನು ಈ ಪಡೆಗೆ ನೀಡಲಾಗುತ್ತದೆ.