ಸಿಸಿಬಿ ಉಗ್ರ ಬೇಟೆ: ವೈದ್ಯ ನಯ್ಯೀಮ್ ಸಿದ್ದಕಿ ಸೆರೆ
ಇದರೊಂದಿಗೆ ಬಂಧಿತರ ಸಂಖ್ಯೆ 18ಕ್ಕೇರಿದೆ. ಗುರುವಾರ ಹುಬ್ಬಳ್ಳಿಯಲ್ಲಿ 6 ಮಂದಿ ಬಂಧನ. ಅಂದೇ ಬೆಂಗಳೂರಿನಲ್ಲಿ 5 ಮಂದಿ ಬಂಧನ. ಶುಕ್ರವಾರ ಹೈದರಾಬಾದಿನಲ್ಲಿ ಒಬ್ಬನ ಬಂಧನ. ಶನಿವಾರ ನಾಂದೇಡಿನಲ್ಲಿ ನಾಲ್ವರ ಬಂಧನ. ಭಾನುವಾರ ಬೆಂಗಳೂರಿನಲ್ಲಿ ಮತ್ತೊಬ್ಬನ ಸೆರೆ. ನಿನ್ನೆಯೇ ಇನ್ನೂ ಒಬ್ಬನ ಬಂಧನ.
ಈತನನ್ನು ಇಂದು ಬೆಳಗ್ಗೆ ಬೆಂಗಳೂರು ಪೊಲೀಸರು ಬಂಧಿಸಿದ್ದಾರೆ. ಈಗಾಗಲೇ ಬಂಧನದಲ್ಲಿರುವ ಶಂಕಿತ ಉಗ್ರರು ನೀಡಿದ ಮಾಹಿತಿಯನ್ನಾಧರಿಸಿ ನಿನ್ನೆ ಸಂಜೆ (ಸೆ. 2) ನಯ್ಯೀಮ್ ಸಿದ್ದಕಿಯನ್ನು ಬೆಂಗಳೂರಿನಲ್ಲಿ ಬಂಧಿಸಲಾಗಿದೆ. ಒಂದು ಲ್ಯಾಪ್ ಟಾಪ್, ಮೊಬೈಲ್, 10 ಸಾವಿರ ರೂಪಾಯಿ ನಗದನ್ನು ಬಂಧಿತನಿಂದ ವಶಪಡಿಸಿಕೊಳ್ಳಲಾಗಿದೆ ಎಂದು ಬೆಂಗಳೂರು ಪೊಲೀಸರು ಇದೀಗ ತಾನೇ ಹೇಳಿದ್ದಾರೆ.
ಮೂಲತಃ ದಾವಣಗೆರೆಯವನಾದ ನಯ್ಯೀಮ್ ಸಿದ್ದಕಿ ಬಂಧಿತ ಉಗ್ರರ ಜತೆ ಸಂಪರ್ಕದಲ್ಲಿದ್ದ. ನಯ್ಯೀಮ್ ಸಿದ್ದಕಿ ಇತರೆ ಉಗ್ರರಿಗೆ ಮೂಲ ಅಗತ್ಯ ಪರಿಕರಗಳು ಮತ್ತು ಧನ ಸಹಾಯ ಮಾಡುತ್ತಿದ್ದ. ಜತೆಗೆ, ಇತರರನ್ನು ಸಂಘಟನೆಗೆ ನೇಮಕ ಮಾಡಿಕೊಳ್ಳುವ ಕೆಲಸದಲ್ಲೂ ಭಾಗಿಯಾಗಿದ್ದ ಎಂದು ವಿಚಾರಣೆಯಿಂದ ತಿಳಿದುಬಂದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಸೂಕ್ತ ಕ್ರಮವನ್ನಾಧರಿಸಿ ಬಂಧಿತ ನಯ್ಯೀಮ್ ಸಿದ್ದಕಿಯನ್ನು ಕೋರ್ಟಿಗೆ ಹಾಜರುಪಡಿಸಲಾಗುವುದು. ತನಿಖೆ ಪ್ರಗತಿಯಲ್ಲಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಈತ 2 ವರ್ಷಗಳಿಂದ ಬೆಂಗಳೂರಿನಲ್ಲಿ ನೆಲೆಸಿದ್ದ. ಇಲ್ಲಿನ ಇನ್ ಫ್ಯಾಂಟ್ರಿ ರಸ್ತೆಯಲ್ಲಿ ಟ್ರಾವೆಲಿಂಗ್ ಏಜೆನ್ಸಿ ನಡೆಸುತ್ತಿದ್ದ. ಬಂಧಿತ ಆರೋಪಿಗಳ ಓಡಾಟಕ್ಕೆ ಟಿಕೆಟ್ ಮಾಡಿಸಿಕೊಡುತ್ತಿದ್ದ ಎನ್ನಲಾಗಿದೆ.