ಪೆಟ್ರೋಲ್ ಬಂಕಿನಲ್ಲಿ ಇನ್ನು ಉಚಿತ ಗಾಳಿ ಇಲ್ಲ
ಆದರೆ ಅಂತ ಸೌಲಭ್ಯ ಇದ್ದಿದ್ದಂತೂ ನಿಜ. ನೀವು ಅದನ್ನು ಗಮನಿಸದೆಯೋ ಅಥವಾ ಇರ್ಲಿ ಒಂದೆಟಾಣೆ ಕಟ್ರೆ ಏನಾಗುತ್ತೆ ಅಂತ ಧಾರಾಳವಾಗಿ ದುಡ್ಡುಕೊಟ್ಟಿರಬಹುದು. ಗಮನಾರ್ಹವೆಂದರೆ Air ಜತೆಗೆ ಕುಡಿಯುವ ನೀರು, ಟಾಯ್ಲೆಟ್ ಸವಲತ್ತೂ ಇತ್ತು. ಅಯ್ಯೋ ಪೆಟ್ರೋಲ್ ತುಂಬಿಸ್ಕೋಳೋಕೆ ಟೈಮಿರಲ್ಲ. ಇನ್ನು ನಮ್ ಪೆಟ್ರೋಲ್ ಖಾಲಿ ಮಾಡೋಕ್ಕೆ ಅಲ್ಗೆಲ್ಲ ಯಾಕ್ ಹೋಗೋಣ ಅನ್ನುವವರೂ ಇದ್ದಾರೆ.
ಆದರೆ ಇನ್ನು ಮುಂದೆ ಅಂತಹ 'ಉಚಿತ' ಸೇವೆಗಳಿಗೆ ಕತ್ತರಿ ಬೀಳಲಿದೆ. ಅದೆಲ್ಲ ಬೇಕು ಅಂದರೆ ಮೊದಲು ದುಡ್ಡು ಕೊಡುವುದು ಅನಿವಾರ್ಯವಾಗಲಿದೆ. Air ಹೊಡೆಯುವ ಹುಡುಗರು ಸಿಗುವುದೇ ದುಸ್ತರ. ಸಿಕ್ಕರೂ ಅವರಿಗೆ ಸಂಬಳಗಳು ಜಾಸ್ತಿ ಕೊಡಬೇಕು. ಜತಗೆ ಪೆಟ್ರೋಲ್ ಬಂಕ್ ನಿರ್ವಹಣೆ ವೆಚ್ಚ ಹೆಚ್ಚಾಗುತ್ತಿದೆ. ಆದ್ದರಿಂದ ಪೆಟ್ರೋಲ್ ಡೀಲರುಗಳು ಇನ್ನು ಮುಂದೆ ಈ ಸೇವೆಗಳಿಗೆಲ್ಲ ಹಣ ಪೀಕಲಿದ್ದಾರೆ.
ನಗರದಲ್ಲಿ ಸುಮಾರು 875 ಪೆಟ್ರೋಲ್ ಬಂಕ್ ಗಳಿವೆ. ಆದರೆ ಈ ಸೇವೆಗಳಿಗೆ ಪೆಟ್ರೋಲಿಯಂ ಸಚಿವಾಲಯ ಸೂಕ್ತ ದರ ನಿಗದಿಪಡಿಸಬೇಕಾಗಿದೆ. ಈ ಬಗ್ಗೆ ಸಚಿವಾಲಯ ಸಮಿತಿಯನ್ನೂ ರಚಿಸಿದೆ. ಆದರೆ ಇದು ಸರಕಾರಿ ಪೆಟ್ರೋಲ್ ಬಂಕುಗಳಿಗೆ ಮಾತ್ರ ಅನ್ವಯವಾಗಲಿದೆ. ಏಕೆಂದರೆ ಖಾಸಗಿ ಪೆಟ್ರೋಲ್ ಬಂಕ್ ಡೀಲರುಗಳು ನಾಮುಂದು ತಾಮುಂದು ಸ್ಪರ್ಧೆಗೆ ಬಿದ್ದು, ಹೆಚ್ಚುವರಿ ಸೇವೆ ಒದಗಿಸಲು ಸಜ್ಜಾಗಿವೆ.