ಸ್ಟೀವ್ ಜಾಬ್ಸ್ ಮೋಸಗಾರನಾ, ಸುಳ್ಳುಗಾರನಾ?
ಜಾಬ್ಸ್ ಜೀವನಚರಿತ್ರೆಯ ದಶಕದಷ್ಟು ಹಳೆಯದಾದ 191 ಪುಟಗಳಷ್ಟು ಸುದೀರ್ಘವಾದ ವರದಿಯನ್ನು ಮಾಹಿತಿ ಹಕ್ಕು ಕಾಯ್ದೆ ಅಡಿ (Freedom of Information Act) ಎಫ್ಬಿಐ ಗುರುವಾರ ಬಿಡುಗಡೆ ಮಾಡಿದೆ. ಈ ವರದಿಯು ಜಾಬ್ಸ್ ಅವರ ನೈತಿಕತೆಯ ಬಗ್ಗೆ ಜನರು ಅನುಮಾನ ಪಡುವಂತೆ ಮಾಡಿದೆ.
ಜಾಬ್ಸ್ ಮಾದಕದ್ರವ್ಯ ವ್ಯಸನಿಯಾಗಿದ್ದರು ಎನ್ನಲಾದ ಅಂಶವನ್ನು ಈ ಮಾಹಿತಿ ಒಳಗೊಂಡಿದೆ. ಅಲ್ಲದೇ ಅವರು ಸತ್ಯವನ್ನು ವಿರೂಪಗೊಳಿಸುತ್ತಿದ್ದರು ಮತ್ತು ತಮ್ಮ ಗುರಿ ಸಾಧನೆಗೆ ಯಾವ ಮಟ್ಟಕ್ಕೆ ಬೇಕಾದರೂ ಇಳಿಯುತ್ತಿದ್ದರು ಎಂಬ ವಿವರಗಳೂ ಈ ವರದಿಯಲ್ಲಿ ಇವೆ. ಜಾಬ್ಸ್ ಮೂಲತಃ ಪ್ರಾಮಾಣಿಕ ಮತ್ತು ನಂಬಿಗಸ್ಥ ವ್ಯಕ್ತಿ . ಆದರೆ ಅವರ ವ್ಯಕ್ತಿತ್ವ ತುಂಬ ಸಂಕೀರ್ಣವಾದುದು ಎಂದು ಹೇಳಿದ ವರದಿ, ಅವರ ನೈತಿಕತೆಯ ಬಗ್ಗೆ ಅನುಮಾನ ವ್ಯಕ್ತಪಡಿಸಿತ್ತು.
1991ರಲ್ಲಿ ಅಮೆರಿಕದ ಅಧ್ಯಕ್ಷ ಜಾರ್ಜ್ ಬುಷ್ ಅವರು ಜಾಬ್ಸ್ ಅವರನ್ನು ಅಧ್ಯಕ್ಷರ ಪರಿಣತರ ಮಂಡಳಿಗೆ ನೇಮಕ ಮಾಡಲು ಪರಿಗಣಿಸಿದ್ದ ಸಂದರ್ಭದಲ್ಲಿ ಎಫ್ಬಿಐಗೆ ಜಾಬ್ಸ್ ಹಿನ್ನೆಲೆ ತಿಳಿಯುವಂತೆ ಸೂಚಿಸಲಾಗಿತ್ತು. ಜಾಬ್ಸ್ ಸ್ನೇಹಿತರು, ಸಹೋದ್ಯೋಗಿಗಳು ಹಾಗೂ ಅವರ ನೆರೆಹೊರೆಯವರನ್ನು ಸಂದರ್ಶಿಸಿ, ವ್ಯಾಪಕ ಸಂಶೋಧನೆ ನಡೆಸಿ ಈ ವರದಿಯನ್ನು ತಯಾರಿಸಲಾಗಿದೆ ಎಂದು ಎಫ್ಬಿಐ ಅಧಿಕಾರಿಗಳು ತಿಳಿಸಿದ್ದಾರೆ.