ಎರಡೂವರೆ ಕೋಟಿ ರು. ಗೆದ್ದ ಮುಂಬೈ ಕುದುರೆ
ಭಾನುವಾರ ಬೆಂಗಳೂರು ರೇಸ್ ಕೋರ್ಸ್ ನಲ್ಲಿ ನಡೆದ ಒಟ್ಟು 9 ಓಟಗಳಲ್ಲಿ ಬೆಂಗಳೂರು ಡರ್ಬಿ ಪ್ರಧಾನ ಆಕರ್ಷಣೆಯಾಗಿತ್ತು. ಕುದುರೆಯನ್ನು ಗೆಲುವಿನ ಗೆರೆ ದಾಟಿಸಿದ ಜಾಕಿ ವೈ ಶ್ರೀನಾಥ್.
ದೇಶದ ನಾನಾ ಮೂಲೆಗಳಿಂದ ಆಗಮಿಸಿದ್ದ ರೇಸುಪ್ರಿಯರು, ರೇಸಿಂಗ್ ತಜ್ಞರು ಮತ್ತು ಪ್ರಧಾನ ಆಕರ್ಷಣೆಯ ಡರ್ಬಿ ರೇಸು ನೋಡಲೆಂದೇ ಬಂದಿದ್ದ ಸಾವಿರಾರು ಅಭಿಮಾನಿಗಳಿಂದ ಬೆಂಗಳೂರು ರೇಸ್ ಕ್ಲಬ್ ಆವರಣ ತುಂಬಿ ತುಳುಕುತ್ತಿತ್ತು.
ಡರ್ಬಿ ಗೆಲ್ಲುವುದರೊಂದಿಗೆ ಮಾಲಿಕ, ತರಬೇತುದಾರ, ಜಾಕಿ ಮತ್ತು ಕುದುರೆ ಲಾಯದ ಸಿಬ್ಬಂದಿಗಳು ಒಟ್ಟು ಎಲ್ಲ ಸೇರಿ 2.5 ಕೋಟಿ ರು. ಬಹುಮಾನ ಬಾಚಿಕೊಂಡರು. ಮಾಲಿಕರು ಪಲೋನ್ ಮಿಸ್ತ್ರಿ (ಮಂಜರಿ ಹಾರ್ಸ್ ಬ್ರೀಡಿಂಗ್ ಫಾರಮ್ ಪ್ರೈ.ಲಿ.) ಮತ್ತು ಡಿ.ಆರ್. ಥಾಕರ್ ಗೆಲುವಿನ ನಗೆ ಬೀರಿದರು. ಕಿಂಗ್ ಫಿಶರ್ ಕಂಪನಿಯ ಮಾಲಿಕ ವಿಜಯ್ ಮಲ್ಯ ಬಹುಮಾನ ವಿತರಿಸಿದರು.
ಬೆಟ್ಟಿಂಗ್ ರಿಂಗಿನಲ್ಲಿ 'ಲವ್ಲಿ ಕಿಸ್' ಮತ್ತು 'ಸ್ಟಾರ್ ಮಾರ್ಕೆಸ್' ಜಂಟಿ ಫೇವರಿಟ್ ಆಗಿದ್ದವು. ಆದರೆ, 2000 ಮೀಟರ್ ಓಟದ ಸ್ಪರ್ಧೆಯಲ್ಲಿ ಹಿಂದಿನಿಂದ ಜಿಗಿದು ಬಂದು ನಾಗಾಲೋಟ ಓಡಿದ 'ಪ್ರೊಂಟೊ ಪ್ರೊಂಟೊ' ಕೂದಲೆಳೆಯ ಅಂತರದಿಂದ ಡರ್ಬಿ ಗೆದ್ದುಕೊಂಡಿತು. ಫೇವರಿಟ್ಟುಗಳಿಗೆ ಬೆಲೆ 7-2, 7-2 ಇದ್ದರೆ ಪ್ರೊಂಟೊಗೆ 6-1 ಆಕರ್ಷಕ ಬೆಲೆ ಇತ್ತು.