ಆಸ್ಟ್ರೇಲಿಯಾ ಶಾಲೆಯಲ್ಲಿ ಸಿಖ್ ಹುಡುಗನಿಗೆ ಕಿರುಕುಳ
ಮೆಲ್ಬೋರ್ನ್ ನ ನಾರ್ಥನ್ ಕ್ರಿಶ್ಚಿಯನ್ ಶಾಲೆಯಲ್ಲಿ ಕ್ಲಾಸ್ 11 ರಲ್ಲಿ ಓದುತ್ತಿರುವ ಸಿಖ್ ವಿದ್ಯಾರ್ಥಿಯ ಗಡ್ಡವನ್ನು ಬಲವಂತವಾಗಿ ಶೇವ್ ಮಾಡಲಾಗಿದೆ ಎಂದು ಸಿಖ್ ಫೆಡರೇಷನ್ ಆಫ್ ಆಸ್ಟ್ರೇಲಿಯಾನ ಹರ್ಕಿರತ್ ಸಿಂಗ್ ಎಬಿಸಿ ರೇಡಿಯೋದಲ್ಲಿ ಹೇಳಿಕೊಂಡಿದ್ದಾರೆ.
ಹುಡುಗನ ಪೋಷಕರು ನನ್ನನ್ನು ಭೇಟೀ ಮಾಡಿ ಈ ಘಟನೆ ಬಗ್ಗೆ ವಿವರಿಸಿದಾಗ, ನನಗೆ ನಿಜಕ್ಕೂ ಶಾಕ್ ಆಯಿತು. ಪ್ರತಿಷ್ಠಿತ ಶಾಲೆಗಳಲ್ಲೇ ಅನ್ಯಮತೀಯರನ್ನು ಈ ರೀತಿ ನಡೆಸಿಕೊಂಡರೆ ಮುಂದೆ ಗತಿ ಏನು ಎಂದು ಅನ್ನಿಸಿಬಿಟ್ಟಿತು. ಈ ಘಟನೆಯಿಂದ ವಿದ್ಯಾರ್ಥಿ ಮಾನಸಿಕ ಖಿನ್ನತೆ ಅನುಭವಿಸುತ್ತಿದ್ದಾನೆ ಎಂದು ಹರ್ಕಿರತ್ ಸಿಂಗ್ ಹೇಳಿದ್ದಾರೆ.
ಪ್ರಕರಣ ಹೆಚ್ಚು ಪ್ರಚಾರ ಪಡೆದು ಈಕ್ವಲ್ ಆಪಾರ್ಚುನಿಟಿ ಆಯುಕ್ತರ ತನಕ ಮುಟ್ಟಿದ ಮೇಲೆ ಎಚ್ಚೆತ್ತುಕೊಂಡ ವಿಕ್ಟೋರಿಯನ್ ಶಾಲೆ, ಸಿಖ್ ವಿದ್ಯಾರ್ಥಿಯ ಕ್ಷಮೆ ಯಾಚಿಸಿದೆ. ಈ ಕೃತ್ಯದಲ್ಲಿ ಭಾಗಿಯಾದ ಶಿಕ್ಷಕರಿಗೆ ಶಾಲಾ ನಿಯಮಗಳ ಬಗ್ಗೆ ತಿಳಿದಿರಲಿಲ್ಲ. ಸಿಖ್ ಸಮುದಾಯದ ಧಾರ್ಮಿಕ ನಂಬಿಕೆಗಳಿಗೆ ಅಪಮಾನವಾಗಿದ್ದರೆ ಶಾಲೆ ವತಿಯಿಂದ ಕ್ಷಮೆ ಕೋರುತ್ತೇವೆ. ಸಿಖ್ ಹುಡುಗರು ಗಡ್ಡ ಬಿಡಲು ಯಾವುದೇ ನಿರ್ಬಂಧ ವಿಧಿಸುವುದಿಲ್ಲ ಎಂದು ಶಾಲಾ ಆಡಳಿತ ಮಂಡಳಿ ಹೇಳಿದೆ.