ಮಿಯಾಮಿ, ಏ.3: ವಿಶ್ವಕಪ್ 2011 ಗೆದ್ದು ಸಂಭ್ರಮಿಸುತ್ತಿರುವ ಕ್ರೀಡಾ ಪ್ರೇಮಿಗಳ ಸಂಭ್ರಮವನ್ನು "ಇಂಡಿಯನ್ ಎಕ್ಸ್ ಪ್ರೆಸ್ " ಜೋಡಿ ಮತ್ತಷ್ಟು ಹೆಚ್ಚಿಸಿದ್ದಾರೆ. ಲಿಯಾಂಡರ್ ಪೇಸ್ ಹಾಗೂ ಮಹೇಶ್ ಭೂಪತಿ ಜೋಡಿ ಸೋನಿ ಎರಿಕ್ಸನ್ ಓಪನ್ ಗೆಲ್ಲುವ ಮೂಲಕ ಎಟಿಪಿ ವಿಶ್ವ ಡಬಲ್ಸ್ ಟೀಂ ಶ್ರೇಯಾಂಕದಲ್ಲಿ ಅಗ್ರಸ್ಥಾನ ಗಳಿಸಿದ ಸಾಧನೆ ಮೆರೆದಿದ್ದಾರೆ. ಪ್ರಸಕ್ತ ಋತುವಿನಲ್ಲಿ ಈ ಜೋಡಿ ಗೆದ್ದಿರುವ ಎರಡನೇ ಪ್ರಶಸ್ತಿ ಇದಾಗಿದೆ.
ಮೂರನೇ ಸೀಡ್ ನ ಭೂಪತಿ ಮತ್ತು ಪೇಸ್ ಜೋಡಿ ಎರಡನೇ ಸೀಡ್ ನ ಬೈಲೋರಷ್ಯ ಕೆನಡಾ ಜೋಡಿ ಮ್ಯಾಕ್ಸ್ ಮಿರ್ನಿ ಹಾಗೂ ಡೆನಿಯಲ್ ನೆಸ್ಟರ್ ಅವರನ್ನು 6-7(5) 6-2 10-5 ಅಂತರದಲ್ಲಿ ಸೋಲಿಸುವ ಮೂಲಕ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡರು. ಪ್ರಸಕ್ತ ಋತುವಿನ ಆರಂಭದಲ್ಲಿ ಚೆನ್ನೈ ಓಪನ್ ಟೆನ್ನಿಸ್ ಪ್ರಶಸ್ತಿಯನ್ನು ಪೇಸ್ ಭೂಪತಿ ಜೋಡಿ ಗೆದ್ದಿದ್ದರು.
ಮೊದಲ ಸೆಟ್ ನಲ್ಲಿ ಉಂಟಾದ ಹಿನ್ನೆಡೆಯಿಂದ ಚೇತರಿಸಿಕೊಂಡ ಈ ಜೋಡಿ ನಂತರ ಅದ್ಭುತ ಸರ್ವ್ ಹಾಗೂ ರಿಟರ್ನ್ ಮೂಲಕ ಎದುರಾಳಿಯನ್ನು ಕಾಡಿದರು. ಈ ಗೆಲುವಿನ ಮೂಲಕ ವಿಶ್ವದ ಅಗ್ರಸ್ಥಾನದಲ್ಲಿದ್ದ ಬಾಬ್ ಹಾಗೂ ಮೈಕ್ ಬ್ರಿಯಾನ್ ಅವರನ್ನು ಎರಡನೇ ಸ್ಥಾನಕ್ಕೆ ಕುಸಿದಿದ್ದಾರೆ. ಪೇಸ್ ಭೂಪತಿ ಜೋಡಿಗೆ ಬರ್ಕಲೇಸ್ ಎಟಿಪಿ ವಿಶ್ವ ಟೂರ್ ಫೈನಲ್ಸ್ ಗೆ ಪ್ರವೇಶ ಸುಲಭವಾಗಿದೆ.
Please read our comments policy before posting