ಪಾಕ್ ಕ್ರಿಕೆಟ್ ಪ್ರೇಮಿಗಳಿಗೆ ತುರ್ತು ವೀಸಾ ಕಾಣಿಕೆ
ಮೊಹಾಲಿ, ಮಾ. 25: ಹುಟ್ಟಾ ವೈರಿಗಳಾದ ಭಾರತ ಮತ್ತು ಪಾಕಿಸ್ತಾನ ತಂಡದ ಮಧ್ಯೆ ಬುಧವಾರ ಸೆಮಿಫೈನಲ್ ಪಂದ್ಯ ನಿಕ್ಕಿಯಾಗುತ್ತಿದ್ದಂತೆ ಉಪಖಂಡದಲ್ಲಿ ಕ್ರಿಕೆಟ್ ಜ್ವರ ಜರ್ರನೇ ಏರಿದೆ. ಈ ಹಿನ್ನೆಲೆಯಲ್ಲಿ ಪಂದ್ಯವನ್ನು ಕಣ್ಣಾರೆ ನೋಡಿ ಆನಂದಿಸುವಂತಾಗಲು ಕೇಂದ್ರ ಗೃಹ ಸಚಿವಾಲಯ ಪಾಕಿಸ್ತಾನದ ಪ್ರಜೆಗಳಿಗಾಗಿ ವೀಸಾ ಪ್ರಕ್ರಿಯೆ ಸಡಿಲಿಸಿದೆ. ಪಾಕ್ ಕ್ರಿಕೆಟ್ ಪ್ರೇಮಿಗಳಿಗೆ ಹೃತ್ಪೂರ್ವಕ ಸ್ವಾಗತ ಕೋರಲು ಭಾರತೀಯರು ಉತ್ಸುಕರಾಗಿದ್ದಾರೆ. ಆದರೆ ಇದೇ ವೇಳೆ ಬಂದವರು ಹಾಗೆಯೇ ವಾಪಸಾಗಬೇಕೆಂದೂ ಆಶಿಸಿದ್ದಾರೆ. Pls, don't over-stay.
ಗುರುವಾರ ಆಸ್ಟ್ರೇಲಿಯಾ ವಿರುದ್ಧ ಭಾರತ ಭರ್ಜರಿ ಜಯ ದಾಖಲಿಸಿದ ಬಳಿಕ ಮಾರ್ಚ್ 30ರಂದು ನಡೆಯಲಿರುವ ಸೆಮಿಫೈನಲ್ ಪಂದ್ಯ ಹೆಚ್ಚು ಕುತೂಹಲ ಕೆರಳಿಸಿದೆ. ಅದು ಭಾರತ ಮತ್ತು ಪಾಕ್ ನಡುವೆಯಾಗಿದ್ದು, ಇನ್ನೂ ಹೆಚ್ಚು ಮಹತ್ವ ಪಡೆದುಕೊಂಡಿದೆ. ಪಂದ್ಯವನ್ನು ನೇರವಾಗಿ ನೋಡುವ ತವಕದಲ್ಲಿರುವ ಪಾಕ್ ಕ್ರಿಕೆಟ್ ಪ್ರೇಮಿಗಳನ್ನು ನಿರಾಸೆಗೊಳಿಸುವುದು ಸಮಂಜಸವಲ್ಲ. ಆದ್ದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಕ್ಷಿಪ್ರವಾಗಿ ವೀಸಾ ವಿತರಿಸಲು ಪ್ರಕ್ರಿಯೆಯನ್ನು ಸಡಿಲಿಸಲಾಗಿದೆ ಎಂದು ಮೂಲಗಳು ಹೇಳಿವೆ.
ಟಿಕೆಟ್ ಖರೀದಿಸಿರುವ ಎಲ್ಲರಿಗೂ 15 ದಿನಗಳ ವಾಸ್ತವ್ಯದ ವೀಸಾ ವಿತರಿಸಲಾಗಿದೆ. ವಿಶ್ವ ಕಪ್-ನಲ್ಲಿ ಪಾಕಿಸ್ತಾನ ಹಾಗೂ ಭಾರತ ಎರಡೂ ತಂಡಗಳು ಅನಿರೀಕ್ಷಿತವಾಗಿಯೇ ಎಂಬಂತೆ ಅತ್ಯುತ್ತಮ ಪ್ರದರ್ಶನ ತೋರುತ್ತಿವೆ. ಆದ್ದರಿಂದ ತಕ್ಷಣ ತ್ವರಿತ ವೀಸಾಗಾಗಿ ಏರ್ಪಾಡು ಮಾಡುವಂತೆ ಇಸ್ಲಾಮಾಬಾದಿನಲ್ಲಿರುವ ಭಾರತೀಯ ಹೈಕಮಿಷನ್ ಕೇಂದ್ರಕ್ಕೆ ತುರ್ತು ಮನವಿ ಮಾಡಿತ್ತು. ಗಮನಾರ್ಹವೆಂದರೆ, ಪ್ರಸಕ್ತ ವಿಶ್ವ ಕಪ್ ಕ್ರಿಕೆಟ್-ಗಾಗಿ ಈಗಾಗಲೇ ಒಟ್ಟು 5,000 ವೀಸಾಗಳನ್ನು ವಿತರಿಸಲಾಗಿದೆ ಎಂದು ಸಚಿವಾಲಯ ಹೇಳಿದೆ.