ವಿಕಿರಣ ಅನಾಹುತ ಎಸ್ಎಂಎಸ್ ಬೋಗಸ್: ಬಿಬಿಸಿ

ಟೋಕಿಯೊ, ಮಾ.16: ಫುಕುಶಿಮಾದ ದೈಚಿ ಪರಮಾಣು ಸ್ಥಾವರದಿಂದ ವಿಕಿರಣ ಸೋರಿಕೆಯಾಗಿದೆ, ವಿಷ ಗಾಳಿ ಎಲ್ಲೆಡೆ ಹರಡುತ್ತಿದೆ ಎಂಬ ನಕಲಿ ಎಚ್ಚರಿಕೆ ಸಂದೇಶವೊಂದು ಏಷ್ಯಾದಾದ್ಯಂತ ಜನರನ್ನು ಗಾಬರಿಗೊಳಿಸಿತ್ತು. ಬಿಬಿಸಿಯಿಂದ ಬಂದಿದೆ ಎನ್ನಲಾದ ಈ ಎಸ್ಸೆಮ್ಮೆಸ್ ಸಂದೇಶ ಕಳೆದೆರಡು ದಿನ ಏಷ್ಯನ್ ರಾಷ್ಟ್ರಗಳ ಜನರ ನಿದ್ದೆಗೆಡಿಸಿತ್ತು. ಆದರೆ ಬಿಬಿಸಿ ಅಂತಹ ಸಂದೇಶ ಕಳುಸಿಲ್ಲ.

ವಿಕಿರಣದ ದುಷ್ಪರಿಣಾಮದ ವಿರುದ್ಧ ಅಗತ್ಯ ಕ್ರಮ ಕೈಗೊಳ್ಳಬೇಕು ಇಲ್ಲದಿದ್ದರೆ ಎಲ್ಲರಿಗೂ ಆಪತ್ತು ಕಾದಿದೆ ಎಂದು ಆ ಸಂದೇಶದಲ್ಲಿ ಹೇಳಲಾಗಿತ್ತು. ಈ ನಕಲಿ ಸಂದೇಶ ಫಿಲಿಪ್ಪೀನ್ಸ್‌ನಲ್ಲಿ ಬಹಳ ಅವಾಂತರವನ್ನು ಸೃಷ್ಟಿಸಿತ್ತು. ಈ ಗಾಳಿಸುದ್ದಿ ಹರಡಿದ ಬಳಿಕ ಕಾರ್ಮಿಕರು ಹಾಗೂ ಶಾಲಾಮಕ್ಕಳನ್ನು ಮನೆಗೆ ಕಳುಹಿಸಲಾಗಿತ್ತು. ಮಾಧ್ಯಮ ವರದಿಗಳನ್ನು ಕಂಡ ನಂತರ ಫಿಲಿಪ್ಪೀನ್ಸ್ ಸರ್ಕಾರವು ಇದನ್ನು ನಿರಾಕರಿಸಿ ಅಧಿಕೃತ ಘೋಷಣೆ ಹೊರಡಿಸಬೇಕಾಯಿತು.

ಜಪಾನ್‌ನಲ್ಲಿ ಸಂಭವಿಸಿರುವಂತಹ ವಿಕೋಪಗಳ ಬಳಿಕ ಕೆಲವು ಕಿಡಿಗೇಡಿಗಳು ಇಂತಹ ಎಸ್ಸೆಮ್ಮೆಸ್ ಹಾಗೂ ಇ-ಮೇಲ್ ಸಂದೇಶಗಳನ್ನು ಕಳುಹಿಸಿ ಜನರನ್ನು ಮೂರ್ಖರನ್ನಾಗಿಸಿ ಗಾಬರಿಗೊಳ್ಳುವಂತೆ ಮಾಡುವುದು ಸಾಧಾರಣವಾಗಿದೆ. ಜಪಾನಿನ ಭೂಕಂಪ ಹಾಗೂ ಸುನಾಮಿಯ ಕುರಿತು ನಕಲಿ ಸಂದೇಶಗಳ ಮೂಲಕ ಹಾಗೂ ನಕಲಿ ಆಂಟಿ ವೈರಸ್‌ಗಳ ಮೂಲಕ ಇ-ಮೇಲ್ ಅವ್ಯವಹಾರ ನಡೆಸುವ ಸಾಧ್ಯತೆಯ ವಿರುದ್ಧ ಅಮೆರಿಕದ ಕಂಪ್ಯೂಟರ್ ತುರ್ತು ಸಿದ್ಧತಾ ತಂಡUS Computer Emergency Readiness Team (US-CERT) ಕಂಪ್ಯೂಟರ್ ಬಳಕೆದಾರರಿಗೆ ಎಚ್ಚರಿಕೆ ನೀಡಿದೆ.

English summary

Japan Tsunami 2011 : SMS message from BBC circulating around Asian counties has found to be fake. BBC has never issued such flash message related to Tsunami. Hoax message created panic in Philippines.