ಕೊನೆಗೂ ಗಿಬ್ಸ್‌ಗೆ ಟೈ ಕೊಟ್ಟ ಒಬಾಮಾ!

ವಾಷಿಂಗ್ಟನ್, ಫೆ.13: ಇದು ಅಮೆರಿಕದ ದೊಡ್ಡಣ್ಣ ಬರಾಕ್ ಒಬಾಮಾ ಅವರು ನಮಗೆಲ್ಲ ಯಃಕಶ್ಚಿತ್ ಎನ್ನುವ ಅಥವಾ ಅದರ ಹಂಗೇ ಬೇಡ ಎನ್ನುವ ಟೈ ಕುರಿತು ಪಟ್ಟ ಪಡಿಪಾಟಲಿನ ಕತೆ.

2004ರ ಸಮಯ. ಒಬಾಮಾ ಆಗಿನ್ನೂ ದೊಡ್ಡಣ್ಣ ಅಂದರೆ ಅಮೆರಿಕದ ಅಧ್ಯಕ್ಷಗದ್ದಿಗೆ ಏರಿರಲಿಲ್ಲ. ಆದರೆ ಪ್ರಯತ್ನಗಳು ಸಾಗಿದ್ದವು. ಡೆಮಾಕ್ರೆಟಿಕ್ ಸಭೆಯನ್ನುದ್ದೇಶಿಸಿ ಬೋಸ್ಟನ್‌ನಲ್ಲಿ ಭಾಷಣ ಬಿಗಿಯಬೇಕಿತ್ತು. ಆ ಭಾಷಣ ಮುಂದೆ ಐತಿಹಾಸಿಕ ಎನಿಸಿತಾದರೂ ಸಭೆಗೂ ಮುನ್ನ ವೈಯಕ್ತಿಕವಾಗಿ ಒಬಾಮಾ ವಿಚಿತ್ರ ಪ್ರಸಂಗದಲ್ಲಿ ಸಿಲುಕಿದರು.

ಭಾಷಣದ ಸಿದ್ಧತೆಯಲ್ಲಿದ್ದ ಒಬಾಮಾ ಅವರ ಕೊರಳನ್ನು ಅಲಂಕರಿಸುವ ಜವಾಬ್ದಾರಿಯನ್ನು ಅವರ ಪತ್ನಿ ಮಿಷೆಲ್ ಹೊತ್ತಿದ್ದರು. ಹತ್ತಾರು ನಿಮಿಷ ಐದಾರು ಟೈಗಳಿಗೆ ಟ್ರೈ ಕೊಡುವುದರಲ್ಲೇ ಒಬಾಮಾರ ಅಮೂಲ್ಯ ಕಾಲ ಹರಣವಾಗಿತ್ತು. ಆಗ ಒಬಾಮಾ ಕಣ್ಣಿಗೆ ಬಿದ್ದಿದ್ದು ಎದುರಿಗೇ ಇದ್ದ ಮಾಧ್ಯಮ ಮಿತ್ರ ರಾಬರ್ಟ್ ಗಿಬ್ಸ್. ಪಟಕ್ಕನೇ ಗಿಬ್ಸ್‌ರ ಟೈ ಕಿತ್ತುಕೊಂಡ ಒಬಾಮಾ ಅದನ್ನು ಕೊರಳಿಗೆ ಲಗತ್ತಿಸಿಯೇ ಬಿಟ್ಟರು. ಮುಂದ, ಭಾಷಣ ಬಿಗಿಯಲು ದೌಡಾಯಿಸಿದರು.

ಪ್ರಸಂಗಾವಧಾನ ಈಗೇಕೆ?
ಈ ಪ್ರಸಂಗ ಈಗ ನೆನೆಪಿಸಿಕೊಳ್ಳಲು ಕಾರಣವೂ ಇದೆ. ಅತ್ತ ಈಜಿಪ್ಟ್ ಬೆಳವಣಿಗೆ ಬಗ್ಗೆ ಅಮೆರಿಕ ಅಧ್ಯಕ್ಷ ಒಬಾಮಾ ತಲೆಕೆಡಿಕೊಳ್ಳಬೇಕಾದ ಸಂದರ್ಭದಲ್ಲೇ ಅವರ ಆಪ್ತ ಮಿತ್ರ, ಶ್ವೇತ ಭವನದ ಮಾಧ್ಯಮ ಕಾರ್ಯದರ್ಶಿ ಇತ್ತೀಚೆಗೆ ನಿವೃತ್ತಗೊಂಡ ರಾಬರ್ಟ್ ಗಿಬ್ಸ್‌ಗೆ ಶ್ವೇತ ಭವನದಲ್ಲಿ ಅಂತಿಮ ದಿನ.

ಒಬಾಮಾ, ಅದನ್ನು ಎಂದೂ ಮರೆಯದ ದಿನವನ್ನಾಗಿಸ ಬಯಸಿದರು. ಗಿಬ್ಸ್ ಭುಜದ ಮೇಲೆ ಕೈಹಾಕಿಕೊಂಡೇ ಮಾಧ್ಯಮಗಳೆದುರು ಕಾಣಿಸಿಕೊಂಡ ಅವರು ಆರು ವರ್ಷಗಳ ಹಿಂದೆ ಗಿಬ್ಸ್ ಕೊರಳಪಟ್ಟಿಗೆ ಕೈಹಾಕಿ ಕಿತ್ತುಕೊಂಡಿದ್ದ ತಿಳಿ ನೀಲಿ ಬಣ್ಣದ ಆಕರ್ಷಕ ಟೈಅನ್ನು ಅವರಿಗೇ ತೊಡಿಸಿ, ಸಂಭ್ರಮಿಸಿದರು. ಕೊರಳ(ಪಟ್ಟಿ) ಗೆಳೆಯನ ಬಗ್ಗೆ ಮೆಚ್ಚುಗೆಯ ಮಾತನಾಡಿದರು.

English summary

President Obama has returned back the tie to Robert Gibbs, which he had borrowed to deliver the key note address to the Democratic Convention at Boston back in 2004