ಮೆಟ್ರೋ ರೈಲಿಗಾಗಿ ನೆಲಕ್ಕುರುಳಿದ ಮನೆಗಳು

ಬೆಂಗಳೂರು, ಆ.23: ನಗರದ ಸೌಥ್ ಎಂಡ್ ವೃತ್ತದ ಬಳಿ ನಿರ್ಮಾಣವಾಗುತ್ತಿರುವ ಮೆಟ್ರೋ ರೈಲು ಕಾಮಗಾರಿಗೆ ಅಡ್ಡಿಯಾಗಿರುವ ಕೆಲ ಮಳಿಗೆಗಳು ಹಾಗೂ ಮನೆಗಳನ್ನು ಭಾರಿ ವಿರೋಧದ ನಡುವೆಯೂ ಇಂದು ನೆಲಸಮಗೊಳಿಸಲಾಯಿತು.

ಬೆಳ್ಳಂಬೆಳ್ಳಗೆಯೇ ಸ್ಥಳಕ್ಕೆ ಹಾಜರಾದ ರಾಕ್ಷಸ ಗಾತ್ರದ ಜೆಸಿಬಿ ಯಂತ್ರಗಳು ಅಂಗಡಿಗಳನ್ನು ಕೆಡವತೊಡಗಿದವು. ಮೆಟ್ರೋ ಸಿಬ್ಬಂದಿಗಳ ಈ ಕಾರ್ಯಾಚರಣೆಗೆ ಅಡ್ಡಿಪಡಿಸಿದ ಸ್ಥಳೀಯ ನಿವಾಸಿಗಳು ಹಾಗೂ ಅಂಗಡಿ ಮಾಲೀಕರು ನೋಟಿಸ್ ನೀಡದೆ ಮನೆಗಳನ್ನು ಕೆಡವಲಾಗುತ್ತಿದೆ ಎಂದು ದೂರುತ್ತಾ ಪ್ರತಿಭಟನೆಗೆ ಇಳಿದರು.

ಆದರೆ, ನಿವಾಸಿಗಳ ಪ್ರತಿಭಟನೆಯನ್ನು ಲೆಕ್ಕಿಸದ ಮೆಟ್ರೋ ಸಿಬ್ಬಂದಿಗಳು, ಮನೆ, ಅಂಗಡಿಗಳನ್ನು ಕೆಡವ ಕಾರ್ಯ ಮುಂದುವರೆಸಿದರು. ನ್ಯಾಯಾಲಯದಲ್ಲಿ ಈ ಕಾರ್ಯಚರಣೆಗೆ ಇದ್ದ ಅಡ್ಡಿ ಆತಂಕ ದೂರಾಗಿದೆ, ಕೋರ್ಟ್ ತಡೆಯಾಜ್ಞೆ ತೆರವುಗೊಳಿಸಿದ ಬಳಿಕವೇ ಈ ಕಾರ್ಯಾಚರಣೆಗೆ ಮುಂದಾಗಿದ್ದು ಎಂದು ಮೆಟ್ರೋ ಅಧಿಕಾರಿಗಳು ಹೇಳಿದರು.

ಮೆಟ್ರೋ ಅಧಿಕಾರಿಗಳು, ಸ್ಥಳೀಯ ನಿವಾಸಿಗಳ ಆರೋಪ, ಪ್ರತ್ಯಾರೋಪಗಳ ನಡುವೆ ಪೊಲೀಸರು ನಜ್ಜುಗುಜ್ಜಾದರು. ಕೊನೆಗೆ ಪ್ರತಿಭಟನಾ ನಿರತ ಸ್ಥಳೀಯ ನಿವಾಸಿಗಳನ್ನು ತಮ್ಮ ಜೀಪು, ವ್ಯಾನಿನಲ್ಲಿ ಹತ್ತಿಸಿಕೊಂಡು ಮೂರನೇ ಬ್ಲಾಕಿನ ಪೊಲೀಸ್ ಠಾಣೆಗೆ ಹೊರಟರು.