ಟಾಟಾದಿಂದ ಅಗ್ಗದ ದರ ಮನೆ ನಿರ್ಮಾಣ
ದೇಶಾದ್ಯಂತ 110ಲಕ್ಷ ಚದರ ಅಡಿಗಳಷ್ಟು ಭೂಮಿಯನ್ನು ಕಂಪನಿ ಹೊಂದಿದೆ. ಈ ಹಣಕಾಸು ವರ್ಷದ ಅಂತ್ಯದೊಳಗೆ ಇನ್ನೂ 300ಲಕ್ಷ ಚದರ ಅಡಿಗಳಷ್ಟು ಜಾಗವನ್ನು ಖರೀದಿಸಲಿದೆ ಎಂದು ಕಂಪೆನಿಯ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಬ್ರೋತಿನ್ ಬ್ಯಾನರ್ಜಿ ಹೇಳಿದರು.
2010-11 ರಲ್ಲಿ ಕಂಪೆನಿ 1,000 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಲಿದ್ದು ಇದರಲ್ಲಿ 450-500 ಕೋಟಿ ರೂಪಾಯಿಗಳನ್ನು ಭೂ ಸ್ವಾಧೀನಕ್ಕಾಗಿ ವ್ಯಯ ಮಾಡಲಿದೆ ಎಂದೂ ಅವರು ಹೇಳಿದರು. ಇನ್ನುಳಿದ ಹಣದಲ್ಲಿ 45 ಲಕ್ಷ ಚದರ ಅಡಿಗಳಷ್ಟು ಕಟ್ಟಡ ನಿರ್ಮಾಣ ಮಾಡಲು ಉದ್ದೇಶಿಸಲಾಗಿದ್ದು ಇದರಲ್ಲಿ ಶೇ.20ರಷ್ಟು ವಾಣಿಜ್ಯ ಕಟ್ಟಡಗಳಾಗಲಿವೆ ಎಂದರು.
ಆಮ್ ಆದ್ಮಿಗೆ ಶುಭ ಗೃಹ: ಕಂಪೆನಿ 10 ಲಕ್ಷ ರೂಪಾಯಿ ಒಳಗಿನ ಶುಭ ಗೃಹ ಹೆಸರಿನ ಮನೆಗಳ ನಿರ್ಮಾಣಕ್ಕೆ ಹೆಚ್ಚು ಆಸಕ್ತಿ ಹೊಂದಿದ್ದು ಮುಂಬೈ ನ ಪೊಯಿಸರ್ ನಲ್ಲಿ ನಿರ್ಮಾಣ ಮಾಡಲಿರುವ ವಸತಿ ಸಮುಚ್ಚಯದಲ್ಲಿ ಮನೆ ದರ ರೂ 4 ರಿಂದ 7 ಲಕ್ಷ ರುಪಾಯಿ ಆಗಲಿದೆ.
ಅನೇಕ ಸಂಸ್ಥೆಗಳು ಈ ರೀತಿಯ ಮನೆಗಳ ನಿರ್ಮಾಣಕ್ಕೆ ಮುಂದಾಗಿದ್ದರೂ ಯಾರೂ ಯಶಸ್ವಿಯಾಗಿಲ್ಲ ಎಂದೂ ಅವರು ಹೇಳಿದರು. ಶುಭ ಗೃಹ ಯೋಜನೆಯಡಿ ದೇಶಾದ್ಯಂತ 1,500 ಅಪಾರ್ಟ್ ಮೆಂಟ್ ಗಳನ್ನು ನಿರ್ಮಿಸಲಾಗುತ್ತಿದ್ದು ಮುಂದಿನ 3-4 ವರ್ಷಗಳಲ್ಲಿ ಇದನ್ನು 4000ಕ್ಕೆ ಏರಿಸಲಾಗುವುದು ಎಂದೂ ಅವರು ಹೇಳಿದರು.