ಇನ್ಫಿ, ವಿಪ್ರೋ ಹೊಸ ಕೇಂದ್ರಗಳ ಸ್ಥಾಪನೆ

ಬೆಂಗಳೂರು, ಮೇ.25: ಜಾಗತಿಕ ಆರ್ಥಿಕ ಬಿಕ್ಕಟ್ಟು ಉಪಶಮನವಾಗುತ್ತಿದ್ದಂತೆ, ಬೆಂಗಳೂರು ಮೂಲದ ಇನ್ಫೋಸಿಸ್ ಹಾಗೂ ವಿಪ್ರೋ ಸಂಸ್ಥೆಗಳು ಹೊಸ ಶಾಖೆಗಳನ್ನು ಆರಂಭಿಸುವ ನಿಟ್ಟಿನಲ್ಲಿ ಯೋಜನೆ ಹಾಕಿಕೊಂಡಿವೆ. ನಗರದಲ್ಲಿ ಇನ್ಫೋಸಿಸ್ ನ ಎರಡು ಕೇಂದ್ರಗಳು ಹಾಗೂ ವಿಪ್ರೋ ಸಂಸ್ಥೆಯ ಒಂದು ಸಾಫ್ಟ್ ವೇರ್ ಕೇಂದ್ರ ಅಭಿವೃದ್ಧಿಯಾಗಲಿದೆ ಎಂದು ರಾಜ್ಯ ಕೈಗಾರಿಕಾ ಸಚಿವ ಮುರುಗೇಶ್ ನಿರಾಣಿ ಹೇಳಿದರು.

ರಾಜ್ಯದಲ್ಲಿ ಸುಮಾರು 58,517 ಕೋಟಿ ರು ಬಂಡವಾಳ ಹೂಡಲು 60 ಕಂಪೆನಿಗಳಿಗೆ ಸರ್ಕಾರ ಪರವಾನಿಗಿ ನೀಡಿದೆ. ಜೂನ್ 3 ಹಾಗೂ 4 ರಂದು ನಡೆಯಲಿರುವ ವಿಶ್ವ ಬಂಡವಾಳ ಹೂಡಿಕೆದಾರರ ಸಮಾವೇಶದಲ್ಲಿ ಈ ಬಗ್ಗೆ ಒಪ್ಪಂದ ಮಾಡಿಕೊಳ್ಳಲಾಗುವುದು. ಇದರಿಂದಾಗಿ ಸುಮಾರು 3,07,205 ಜನರಿಗೆ ಉದ್ಯೋಗ ದೊರೆಯಲಿದೆ ಎಂದು ಸಚಿವ ನಿರಾಣಿ ತಿಳಿಸಿದರು.

ಇನ್ಫಿ ಎರಡು ಕೇಂದ್ರಗಳು: ಎರಡು ಸಾಫ್ಟ್ ವೇರ್ ಕೇಂದ್ರಗಳನ್ನು ಆರಂಭಿಸಲು ಇನ್ಫೋಸಿಸ್ ಮುಂದಾಗಿದೆ. ಈಗಿರುವ ಇನ್ಫಿ ಕೇಂದ್ರಕ್ಯಾಂಪಸ್ ನ ನಾಲ್ಕುಪಟ್ಟು ದೊಡ್ಡದಾದ (ಸುಮಾರು 360ಎಕರೆ ವಿಸ್ತೀರ್ಣ)ಕ್ಯಾಂಪಸ್ ಸರ್ಜಾಪುರದ ಬಳಿ ರೂಪುಗೊಳ್ಳಲಿದೆ. ಈ ಕೇಂದ್ರಕ್ಕೆ ಸುಮಾರು 2,960 ಕೋಟಿ ರು ವೆಚ್ಚ ತಗುಲಲಿದೆ. 710ಕೋಟಿ ರು ವೆಚ್ಚದ ಇನ್ನೊಂದು ಕೇಂದ್ರ ದೇವನಹಳ್ಳಿ ಸಮೀಪ ನಿರ್ಮಾಣವಾಗಲಿದೆ. ವಿಪ್ರೋ ಸುಮಾರು 537 ಕೋಟಿ ರು. ವೆಚ್ಚದಲ್ಲಿ 40 ಎಕರೆ ವಿಸ್ತೀರ್ಣದ ಕ್ಯಾಂಪಸ್ ಆರಂಭಿಸಲಿದೆ.