ನಪಾಸಾಗುವ ಭಯ : ಕೆರೆಗೆ ಹಾರಿದ ವಿದ್ಯಾರ್ಥಿನಿ

ಮಡಿಕೇರಿ, ಡಿ. 19 : ಪರೀಕ್ಷೆಯಲ್ಲಿ ಫೇಲಾಗುವೆನೆಂಬ ಭಯದಿಂದ ಇಂಜಿನಿಯರಿಂಗ್ ಕಾಲೇಜಿನ ಯುವತಿಯೊಬ್ಬಳು ಕಾಲೇಜಿನ ಬಳಿಯ ಕೆರೆಗೆ ಹಾರಿರುವ ಘಟನೆ ಗೋಣಿಕೊಪ್ಪದಲ್ಲಿ ಶುಕ್ರವಾರ ನಡೆದಿದೆ.

ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿರುವ ರಶ್ಮಿ ಪೊನ್ನಂಪೇಟ್ ಇಂಜಿನಿಯರಿಂಗ್ ಕಾಲೇಜಿನ ವಿದ್ಯಾರ್ಥಿನಿ. ಹಿಂದಿನ ಪರೀಕ್ಷೆಗಳಲ್ಲೆಲ್ಲ ಉತ್ತಮ ಅಂಕಗಳನ್ನೇ ತೆಗೆದಿದ್ದಳು. ಆದರೆ, ಕಳೆದ ಪರೀಕ್ಷೆಯಲ್ಲಿ ಉತ್ತಮವಾಗಿ ಬರೆಯಲಿಲ್ಲವೆಂಬ ಕೊರಗು ಆಕೆಯನ್ನು ಕಾಡುತ್ತಿತ್ತು. ಅದನ್ನು ಆಕೆಯ ಕೆಲ ಗೆಳತಿಯರಿಗೆ ಕೂಡ ಹೇಳಿದ್ದಳು.

ಆದರೆ, ಶುಕ್ರವಾರದಿಂದ ಆಕೆ ಕಾಣೆಯಾಗಿರುವುದು ಬೆಳಕಿಗೆ ಬಂದಿದೆ. ಕೆರೆಯ ಬಳಿ ರಶ್ಮಿಗೆ ಸೇರಿದ ಮೊಬೈಲ್ ಮತ್ತು ಚಪ್ಪಲಿಗಳು ದೊರೆತಿವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಕೆರೆಯಲ್ಲಿ ಆಕೆಯ ದೇಹಕ್ಕಾಗಿ ಹುಡುಕಾಟ ಸಾಗಿದೆ.