ಚಂದ್ರನಲ್ಲಿ ನೀರು : ಇದು ಭಾರತೀಯರ ಹೆಮ್ಮೆ

ಬೆಂಗಳೂರು, ಸೆ. 25 : ಚಂದ್ರನ ಮೇಲ್ಮೈಯಲ್ಲಿ ನೀರಿದೆಯೋ ಇಲ್ಲವೋ ಎಂಬ ಸುಧೀರ್ಘ ದಿನಗಳ ಚರ್ಚೆ ಹಾಗೂ ಸಂಶೋಧನೆಗೆ ಕೊನೆಗೂ ತೆರೆಬಿದ್ದಿದೆ. ಇಡೀ ವಿಶ್ವವೇ ಹೆಮ್ಮೆಪಡುವಂತ ಸಾಧನೆಯನ್ನು ಇಸ್ರೋ ವಿಜ್ಞಾನಿಗಳು ಮಾಡಿದ್ದಾರೆ. ಕಳೆದ 40 ವರ್ಷಗಳಿಂದ ಚರ್ಚೆಯಲ್ಲಿದ್ದ ಅಂಶಕ್ಕೆ ಬಾರತೀಯ ವಿಜ್ಞಾನಿಗಳು ನಿರ್ಮಿಸಿದ ಚಂದ್ರಯಾನ1 ಉತ್ತರ ನೀಡಿದೆ ಎಂದು ಇಸ್ರೋ(ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ) ಅಧ್ಯಕ್ಷ ಜಿ ಮಾಧವನ್ ನಾಯರ್ ಹೇಳಿದರು.

ಇಂದು ಡಾಲರ್ಸ್ ಕಾಲೋನಿಯಲ್ಲಿರುವ ಇಸ್ರೋ ಕಚೇರಿಯಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಸಾಧನೆ ಹಾದಿಯನ್ನು ಅವರ ವಿವರಿಸುತ್ತಿದ್ದರು. ಚಂದ್ರನಲ್ಲಿ ನೀರು ಇರುವುದನ್ನು ಚಂದ್ರಯಾನ1 ಪತ್ತೆ ಹಚ್ಚಿದೆ. ಭಾರತೀಯರಾದ ನಾವೆಲ್ಲರೂ ಹೆಮ್ಮೆಪಡಬೇಕಾಗಿದೆ. ಇಡೀ ವಿಶ್ವಕ್ಕೆ ಇಸ್ರೋ ವಿಜ್ಞಾನಿಗಳ ಸಾಧನೆ ಏನೆಂಬುದನ್ನು ತೋರಿಸಿದ್ದೇವೆ ಎಂದು ಮಾಧವನ್ ಸಂಭ್ರಮಿಸಿದರು.

ಚಂದ್ರಯಾನ 1 ನಿರ್ಮಿಸಿದ ಉದ್ದೇಶ ಈಡೇರಿದೆ. ಚಂದ್ರನ ಮೇಲೆ ನೀರು ಇರುವುದನ್ನು ಪತ್ತೆ ಹಚ್ಚಲು ಚಂದ್ರಯಾನ1 ನಿರ್ಮಾಣವಾಗಿತ್ತು. ಹೀಗಾಗಿ ಚಂದ್ರಯಾನ ವಿಫಲವಾಗಿದೆ ಎನ್ನುವುದು ಸರಿಯಲ್ಲ. ಚಂದ್ರನಲ್ಲಿ ನೀರಿನ ಅಂಶ ಇರುವುದು ನಮಗೆ ಜೂನ್ ತಿಂಗಳಲ್ಲೇ ತಿಳಿದಿತ್ತು. ನೀರಿನ ಪ್ರಮಾಣ ಯಾವ ಪ್ರಮಾಣದಲ್ಲಿದೆ ಎಂಬುದು ಸ್ಪಷ್ಟವಾಗಿರಲಿಲ್ಲ.

ಚಂದ್ರನಲ್ಲಿ ನೀರು ಖನಿಜ ಮತ್ತು ಬಂಡೆಯ ರೂಪದಲ್ಲಿ ಪತ್ತೆಯಾಗಿದೆ. ಇದಲ್ಲದೆ ನಮ್ಮ ನಿರೀಕ್ಷೆಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಚಂದ್ರನಲ್ಲಿ ನೀರು ಇದೆ. ಒಂದು ಟನ್ ಖನಿಜಾಂಶಕ್ಕೆ ಅರ್ಧ ಲೀಟರ್ ನೀರಿನ ಪ್ರಮಾಣ ಇದೆ. ಚಂದ್ರನ ಮೇಲೆ ನೀರಿನಂಶ ಇರುವುದಕ್ಕೆ ಚಂದ್ರಯಾನ1 ಸಾಕಷ್ಟು ಸಾಕ್ಷ್ಯಾಧಾರಗಳನ್ನು ಒದಗಿಸಿದೆ ಎಂದು ಮಾಧವನ್ ನಾಯರ್ ವಿವರಿಸಿದರು.

(ದಟ್ಸ್ ಕನ್ನಡ ವಾರ್ತೆ)