ಅಮಾನಿಕೆರೆಗೆ ರೇಸ್ ಕೋರ್ಸ್ ಸ್ಥಳಾಂತರ

ಬೆಂಗಳೂರು, ಜು. 14 : ಬೆಂಗಳೂರಿನ ಹೃದಯ ಭಾಗದಲ್ಲಿರುವ ಟರ್ಫ್ ಕ್ಲಬ್ ಸ್ಥಳಾಂತರಕ್ಕೆ ಇದ್ದ ಸ್ಥಳಾವಕಾಶದ ಕೊರತೆ ನಿವಾರಣೆಯಾಗಿದೆ. ಟರ್ಫ್ ಕ್ಲಬ್ ನ್ನು ದೊಡ್ಡಜಾಲದ ಅಮಾನಿಕೆರೆ ಜಾಗಕ್ಕೆ ಸ್ಥಳಾಂತರಿಸಲು ಹೈಕೋರ್ಟ್ ಹಸಿರು ನಿಶಾನೆ ತೋರಿಸಿದೆ.

ಕಾನೂನು ಬದ್ಧವಾಗಿ ಅಮಾನಿಕೆರೆಯಲ್ಲಿ ಟರ್ಫ್ ಕ್ಲಬ್ ಆರಂಭಿಸಲು ಕಾನೂನು ರೀತಿಯಲ್ಲಿ ಕ್ರಮಕೈಗೊಳ್ಳಲು ಮುಖ್ಯ ನ್ಯಾಯಮೂರ್ತಿ ಪಿ ಡಿ ದಿನಕರನ್ ಮತ್ತು ನ್ಯಾಯಮೂರ್ತಿ ವಿ ಜಿ ಸಬಾಹಿತ್ ಅವರಿದ್ದ ಪೀಠ ಸರಕಾರಕ್ಕೆ ಸೂಚನೆ ನೀಡಿದೆ. ಬೆಂಗಳೂರಿನ ಕೇಂದ್ರ ಭಾಗದಲ್ಲಿ 73.35 ಎಕರೆ ಪ್ರದೇಶವನ್ನು ಹೊಂದಿರುವ ಟರ್ಫ್ ಕ್ಲಬ್ ಸ್ಥಳಾಂತರಿಸಲು ನಿರ್ಧರಿಸಲಾಗಿದೆ.

ಇದಕ್ಕಾಗಿ ಜಾಲ ಹೋಬಳಿ ದೊಡ್ಡಜಾಲದ ಅಮಾನಿಕೆರೆಯಲ್ಲಿ 95.32 ಎಕರೆ ಪ್ರದೇಶವನ್ನು ಗುರುತಿಸಲಾಗಿದೆ. 152.02 ಎಕರೆ ಪ್ರದೇಶವಿರುವ ಅಮಾನಿಕೆರೆಯಲ್ಲಿ 56.10 ಎಕರೆಯಷ್ಟು ಮಾತ್ರ ನೀರು ಇದ್ದು, ಉಳಿದ 93.32 ಎಕರೆ ಜಾಗದಲ್ಲಿ ಟರ್ಫ್ ಕ್ಲಬ್ ಸ್ಥಾಪಿಸಲು ನಿರ್ಧರಿಸಲಾಗಿದೆ ಎಂದು ಸರಕಾರ ಹೈಕೋರ್ಟ್ ನಲ್ಲಿ ಮಧ್ಯಂತರ ಕೋರಿಕೆ ಸಲ್ಲಿಸಿದೆ.

(ದಟ್ಸ್ ಕನ್ನಡ ವಾರ್ತೆ)