ಬೆಂಗಳೂರಿನ ಸೀಮೆನ್ಸ್ ನಿಂದ 500 ನೌಕರರು ವಜಾ
ಬೆಂಗಳೂರು, ಜು.11: ಬೆಂಗಳೂರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಐಟಿ ಕಂಪನಿ ಸೀಮೆನ್ಸ್ ಇನ್ ಫಾರ್ಮೇಶನ್ ಸಿಸ್ಟಮ್ಸ್ ಲಿಮಿಟೆಡ್(ಎಸ್ ಐ ಎಸ್ ಎಲ್) ತನ್ನ 500 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ನಗರದ ಎಲೆಕ್ಟ್ರಾನಿಕ್ ಸಿಟಿಯಲ್ಲಿ ಕಂಪನಿಯ ಎರಡು ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ.
ವಜಾಗೊಳಿಸುವ ಮೊದಲು ನಮಗೆ ಯಾವುದೆ ಸೂಚನೆ ನೀಡದೆ ಏಕಾಏಕಿ ವಜಾಗೊಳಿಸಲಾಗಿದೆ. ನಮಗೆ ಪರಿಹಾರ ನೀಡುತ್ತಾರೋ ಇಲ್ಲವೋ ಎಂಬ ವಿಚಾರವೂ ಗೊತ್ತಿಲ್ಲ ಎಂದು ವಜಾಗೊಂಡ ಉದ್ಯೋಗಿಗಳು ದೂರಿದ್ದಾರೆ. ಈ ಬಗ್ಗೆ ಐಟಿ ಮತ್ತು ಐಟಿ ಸಂಬಂಧಿತ ಸೇವೆ ನೀಡುವ ಉದ್ಯೋಗಿಗಳ ಸಂಘ (ಯುಎನ್ ಐಟಿಇಎಸ್) ಕಂಪನಿಯ ಕ್ರಮವನ್ನು ಕಾನೂನು ಬಾಹಿರ ಎಂದು ಆಪಾದಿಸಿದೆ.
ಎಸ್ ಐಎಸ್ ಎಲ್ ಜರ್ಮನಿಯ ಬಹುರಾಷ್ಟ್ರೀಯ ಕಂಪನಿಯಾಗಿದ್ದು ಬೆಂಗಳೂರು ಸೇರಿದಂತೆ ಮುಂಬೈ, ಚೆನ್ನೈ, ದೆಹಲಿ, ಗುಡಗಾಂವ್, ಕೋಲ್ಕತ್ತಾ, ಪುಣೆ ಮತ್ತು ಸಿಕಂದರಾಬಾದ್ ನಲ್ಲಿ ಶಾಖೆಗಳನ್ನು ಹೊಂದಿದೆ. ಕಂಪನಿಯ ಒಟ್ಟು 5,000 ನೌಕರರಿದ್ದು ಬೆಂಗಳೂರಿನ ಶಾಖೆಯಲ್ಲಿ 3,000 ಮಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಆದರೆ ಕಂಪನಿ ಮಾತ್ರ 500 ಅಲ್ಲ ಕೇವಲ 100 ಮಂದಿ ಉದ್ಯೋಗಿಗಳನ್ನು ಮಾತ್ರ ವಜಾಗೊಳಿಸಿದ್ದೇವೆ ಎನ್ನುತ್ತದೆ.
(ಏಜೆನ್ಸೀಸ್)