ಉಡುಪಿ : ನಕ್ಸಲರು-ಪೊಲೀಸರ ಮಧ್ಯೆಗುಂಡಿನ ಚಕಮಕಿ

ಸಿದ್ದಾಪುರ(ಉಡುಪಿ ಜಿಲ್ಲೆ) : ಒಬ್ಬ ಮಹಿಳೆ ಸೇರಿದಂತೆ ನಾಲ್ವರು ನಕ್ಸಲೀಯರ ಗುಂಪು ಮತ್ತು ನಕ್ಸಲ್‌ ನಿಗ್ರಹ ತಂಡದ ನಡುವೆ, ಗುರುವಾರ ಗುಂಡಿನ ಚಕಮಕಿ ನಡೆಯಿತು. ಕೂದಲೆಳೆ ಅಂತರದಲ್ಲಿ ನಕ್ಸಲರ ಗುಂಪು ಪರಾರಿಯಾಯಿತು.

ಉಡುಪಿ ಜಿಲ್ಲೆಯ ಶಂಕರನಾರಾಯಣ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದ್ದು, ನಕ್ಸಲರು ದಾಸಿಕಾನು ಅರಣ್ಯದಲ್ಲಿ ತಲೆತಪ್ಪಿಸಿಕೊಂಡಿದ್ದಾರೆ. ಘಟನೆ ಬಗ್ಗೆ ಐಜಿಪಿ ಸತ್ಯನಾರಾಯಣ ರಾವ್‌ ಮಾಹಿತಿ ನೀಡಿದ್ದು, ಈ ಘಟನೆಯಲ್ಲಿ ಯಾರಿಗೂ ತೊಂದರೆಯಾಗಿಲ್ಲ ಎಂದಿದ್ದಾರೆ.

ನಕ್ಸಲರು ಸಾಮಾನ್ಯವಾಗಿ 15-20ಜನ ಸಂಚರಿಸುತ್ತಾರೆ. ಆಕಸ್ಮಿಕವಾಗಿ ಗುರುವಾರ ಈ ನಾಲ್ವರು ನಕ್ಸಲರು ಪೊಲೀಸರ(ನಕ್ಸಲ್‌ ನಿಗ್ರಹ ತಂಡ) ಕಣ್ಣಿಗೆ ಬಿದ್ದಿದ್ದಾರೆ. ಕೂಡಲೇ ಗುಂಡು ಸಿಡಿಸಿ, ಪರಾರಿಯಾಗಿದ್ದಾರೆ. ಶ್ವಾನದಳದೊಂದಿಗೆ ಕಾರ್ಯಾಚರಣೆ ಮುಂದುವರೆದಿದೆ. ಇಂದು ಗುಂಡಿನ ಚಕಮಕಿ ನಡೆದ ಸ್ಥಳದಲ್ಲಿ ಟಾರ್ಚ್‌ ಮತ್ತು ಕರವಸ್ತ್ರವೊಂದು ಸಿಕ್ಕಿದೆ ಎಂದು ಸತ್ಯನಾರಾಯಣ ರಾವ್‌ ಹೇಳಿದ್ದಾರೆ.

(ಯುಎನ್‌ಐ)