ಸಿಇಟಿ ಸೀಟು ಹಂಚಿಕೆಗೆ ಮತ್ತೆರಡು ಕೇಂದ್ರಗಳ ಸ್ಥಾಪನೆ

ಸಿಇಟಿ ಸೀಟು ಹಂಚಿಕೆಗೆ ಮತ್ತೆರಡು ಕೇಂದ್ರಗಳ ಸ್ಥಾಪನೆ
ಡಾ.ಶಕುಂತಲಾ ಕತ್ರೆ ಮತ್ತು ಪ್ರೊ.ಕೆ.ಬಸವರಾಜ್‌ ಸಿಇಟಿ ಹಂಚಿಕೆ ಕೇಂದ್ರ ಸಮಿತಿಯ ಸದಸ್ಯರು.

ರಾಜ್ಯದಲ್ಲಿ ವೃತ್ತಿ ಶಿಕ್ಷಣ ಸೀಟು ಹಂಚಿಕೆಗೆ ಇನ್ನೂ ಎರಡು ಅಥವಾ ನಾಲ್ಕು ಕೇಂದ್ರಗಳನ್ನು ತೆರೆಯಲು ಉದ್ದೇಶಿಸಲಾಗಿದೆ. ದೂರದ ಊರುಗಳಿಂದ ಬರುವ ವಿದ್ಯಾರ್ಥಿಗಳ ತೊಂದರೆಯನ್ನು ಪರಿಗಣಿಸಿದ ಸಿಇಟಿ ಸಮಿತಿ ಈ ಉದ್ದೇಶವನ್ನು ಕೈಗೊಂಡಿದೆ.

ರಾಜ್ಯ ಸರ್ಕಾರ ಕನಿಷ್ಠ ಪಕ್ಷ 2 ಕೇಂದ್ರಗಳನ್ನು ತೆರೆಯುವ ಉದ್ದೇಶ ಹೊಂದಿದೆ. ಸಾಧ್ಯವಾದರೆ ನಾಲ್ಕು ಕೇಂದ್ರಗಳನ್ನು ಮಾಡಲಾಗುವುದು. ಮುಂದಿನ ವರ್ಷದಿಂದ ಈ ಕೇಂದ್ರಗಳು ಕಾರ್ಯನಿರ್ವಹಿಸಲಿವೆ. ಈ ಕುರಿತು ಇಬ್ಬರು ಸದಸ್ಯರಿರುವ ಒಂದು ಸಮಿತಿಯನ್ನು ರಚಿಸಲಾಗಿದೆ. ಈ ಸಮಿತಿಯಲ್ಲಿ ಬೆಂಗಳೂರು ವಿಶ್ವವಿದ್ಯಾಲಯದ ವಿಜ್ಞಾನ ವಿಭಾಗದ ಡೀನ್‌ ಡಾ.ಶಕುಂತಲಾ ಕತ್ರೆ ಮತ್ತು ತಾಂತ್ರಿಕ ಶಿಕ್ಷಣ ನಿರ್ದೇಶಕ ಪ್ರೊ.ಕೆ.ಬಸವರಾಜ್‌ ಅವರು ಸದಸ್ಯರಾಗಿರುತ್ತಾರೆ.

ವಿದ್ಯಾರ್ಥಿಗಳು ಸಿಇಟಿ ಸಂಬಂಧ ವರ್ಷಕ್ಕೆ ಎರಡು, ಮೂರು ಸುತ್ತು ಬೆಂಗಳೂರಿಗೆ ಬಂದು ಹೋಗಬೇಕಿತ್ತು. ಸಿಇಟಿ ವ್ಯವಸ್ಥೆ ಆರಂಭವಾದಾಗಿನಿಂದಲೂ ಈ ಪ್ರಕ್ರಿಯೆ ಬೆಂಗಳೂರಿನಲ್ಲಿಯೇ ನಡೆದುಕೊಂಡು ಬಂದಿದೆ. ಆದರೆ ಇನ್ನು ಮುಂದೆ ದೂರದ ಊರಿನ ವಿದ್ಯಾರ್ಥಿಗಳು ಬೆಂಗಳೂರಿಗೆ ಬರುವ ತೊಂದರೆ ತಪ್ಪಲಿದೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು