ಹಿರಿಯ ಸಾಹಿತಿ ಎನ್‌.ಕುಲಕರ್ಣಿಗೆ ಶಿವರಾಮ ಕಾರಂತ ಪ್ರಶಸ್ತಿ

ಹಿರಿಯ ಸಾಹಿತಿ ಎನ್‌.ಕುಲಕರ್ಣಿಗೆ ಶಿವರಾಮ ಕಾರಂತ ಪ್ರಶಸ್ತಿ
91 ವರ್ಷ ವಯಸ್ಸಿನ ಎನ್ಕೆ 64ಕ್ಕೂ ಹೆಚ್ಚು ಕೃತಿಗಳನ್ನು ಬರೆದಿದ್ದಾರೆ

ವಿವಿಧ ಸಾಹಿತ್ಯ ಪ್ರಕಾರಗಳಲ್ಲಿ ಕೃತಿಗಳನ್ನು ಹೊಮ್ಮಿಸಿರುವ ಹಿರಿಯ ಲೇಖಕ ಎನ್‌.ಕುಲಕರ್ಣಿ ಅವರನ್ನು 2003ನೇ ಇಸವಿಯ ಶಿವರಾಮ ಕಾರಂತ ಪ್ರಶಸ್ತಿಗೆ ಆರಿಸಲಾಗಿದೆ.

ಮೂಡಬಿದಿರೆಯ ಶಿವರಾಮ ಕಾರಂತ ಪ್ರತಿಷ್ಠಾನ ಶುಕ್ರವಾರ (ಸೆ.19) ಆಯ್ಕೆಯನ್ನು ಪ್ರಕಟಿಸಿತು. 7 ಸಾವಿರ ರುಪಾಯಿ ನಗದನ್ನು ಪ್ರಶಸ್ತಿ ಒಳಗೊಂಡಿದೆ. ಕಳೆದ 12 ವರ್ಷಗಳಿಂದ ಸಾಹಿತ್ಯ ಸಾಧಕರನ್ನು ಪ್ರತಿಷ್ಠಾನ ಪ್ರತಿವರ್ಷ ಗೌರವಿಸುತ್ತ ಬಂದಿದೆ.

ಎನ್ಕೆ ಎಂದೇ ಹೆಸರುವಾಸಿಯಾಗಿರುವ 91 ವರ್ಷ ವಯಸ್ಸಿನ ಕುಲಕರ್ಣಿ ಕಳೆದ 63 ವರ್ಷಗಳಲ್ಲಿ 15 ಏಕಾಂಕ ನಾಟಕಗಳು, 10 ಕಾದಂಬರಿಗಳು, 8 ಸಾಹಿತ್ಯ ವಿಮರ್ಶೆಗಳು, 4 ದೊಡ್ಡ ನಾಟಕಗಳು, 5 ಹರಟೆ ಕೃತಿಗಳನ್ನು ಬರೆದಿದ್ದಾರೆ. ಒಟ್ಟು 64ಕ್ಕೂ ಹೆಚ್ಚು ಕೃತಿಗಳನ್ನು ಬರೆದಿರುವ ಎನ್ಕೆ ಸಜ್ಜನಿಕೆಗೆ ಹೆಸರಾದವರು. ಈ ಬಾರಿ ಅವರಿಗೆ ಕೊಡಮಾಡುವ ಕಾರಂತ ಪ್ರಶಸ್ತಿಯ ನಗದನ್ನು ದಿವಂಗತ ಜಸ್ಟಿಸ್‌ ಕೆ.ಎಸ್‌. ಹೆಗ್ಡೆ ಸ್ಮರಣಾರ್ಥ ಮಂಗಳೂರಿನ ಲ್ಯಾಮಿನಾ ಸಂಸ್ಥೆ ನೀಡಲಿದೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು