ಜೀವನ ಚಕ್ರ

• ಶ್ರೀನಾಗೇಶ್‌

ಬಂತಿದೋ ಮತ್ತೊಂದು ವರುಷವದು ಹೊಸತು

ಹಳೆಯ ಕಾಲೆಂಡರನ್ನು ಎಸೆದು

ನೇತು ಹಾಕುವುದು ಅದರ ಜಾಗದಲ್ಲಿ ಹೊಸತು

ತಿಂಗಳೆಲ್ಲ ಗೋಡೆಯ ಮೇಲೆ ಬಿಟ್ಟು

ಒಂದು ಹಾಳೆ ಹರಿಯುವುದು

ಮತ್ತದರತ್ತ ಗಮನ ಹರಿಸುವುದು ತಿಂಗಳ ನಂತರ

ಹನ್ನೆರಡನೆಯ ಹಾಳೆಯನ್ನು ಹರಿಯುವ ಸಮಯಕ್ಕೆ
ಹೊಸತೊಂದು ತರುವುದು
ನೇತು ಹಾಕುವುದು

ಕೆಲವರಿಗೆ ಹೊಸ ವರ್ಷವೆಂದರೆ
ಗುಂಡು ಹಾಕುವುದು
ವರ್ಷವಿಡೀ ಹಾಕಿದ್ದಕ್ಕಿಂತ ತುಸ ಹೆಚ್ಚು
ಮತ್ತೆ ಕೆಲವರಿಗೆ ಅವರಿವರ ಬೇಡಿ ತಂದ
ಬಣ್ಣ ಬಣ್ಣದ ಚಿತ್ರಗಳಿರುವ, ತಾರೀಖು ತೋರದ
ಕಾಲೆಂಡರುಗಳ ಗೋಡೆ ನಿರ್ಮಿಸುವುದು

ಮೊಬೈಲ್‌ ಯುಗದಲ್ಲಿ ಸಂದೇಶಗಳ ಸಂತೆ
ಕೈಯಲ್ಲಿ ಹಿಡಿದ ಮೊಬೈಲನ್ನು ಬೆರಳುಗಳಲಿ ಕುಟ್ಟುತ
ಬೇಕಾದವರಿಗೆ, ಬೇಡದವರಿಗೆ, ನಮ್ಮಿರವ ತಿಳಿಪಡಿಸುವುದು

ಇದಾವುದರ ಪರಿವೆಯಿಲ್ಲದೆ
ಓದಲು ಕಲಿಯಲು ಶಾಲೆಗೆ ಹೋಗಲಾರದೆ
ಬೆಳಗಿನ ಕೂಳು ಸಿಗುವ ಭರವಸೆಯಿಲ್ಲದೆ
ಪರದಾಡುವ ಪಾಪಿಗೆ

ಹೊಸ ವರ್ಷ ಬಂದಿದ್ದೇ
ಗೊತ್ತಾಗಲಿಲ್ಲ!!!