ಅವಳು

• ಶಿವಮೂರ್ತಿ, ನವದೆಹಲಿ
  [email protected]

ತಿರುಗಿ ಬರುವವಳಿದ್ದಾಳೆ ಮನೆಗೆ

ಏನೋ ರೋಮಾಂಚನವು ಎನ್ನೆದೆಯಾಳಗೆ

ರವಿಯನ್ನೂ ಮರೆಮಾಚಿ ನಗೆಯಾಡುವಳು

ಇಣುಕಿ ಬಿಸಿಯನಾರಿಸಿ ಅಣಕಿಸುವಳು

ಮುಂಜಾವಿನ ತಂಗಾಳಿ ಹೇಳುತಿಹುದೆನಗೆ
ಬರುತ್ತಿದ್ದಾಳೆ ತಿರುಗಿ ಇಲ್ಲಿಗೆ
ಮರೆತರೆ ಅವಳನು ದಿನದೊಳು
ಇರುಳಲಿ ಓಡಿ ಬಂದು ನೆನಪಿಸುವಳು

ಇದು ಮೊದಲಲ್ಲ , ಕೊನೆಯಲ್ಲ
ತಿರುತಿರುಗಿ ಬರುವಳಿಲ್ಲಿ
ಆಡಿ ಜೊತೆಗೂಡಿ ಕಾಡಿ
ಮರೆಯಾಗುವಳು, ಮತ್ತೆ ಬರುವೆನೆಂದು ಹೇಳಿ

ನಸುಕಿನೋಳ್‌ ಮುಸುಕು ಹೊದ್ದು
ಬಂದೆನ್ನ ಮೇಲೆ ಎರಗುವಳು
ಅಡಿಯಿಂದ ಮುಡಿಯವರೆಗೂ
ಆವರಿಸಿ ತನು ನಡುಗಿಸುವಳು

ಪ್ರತಿ ಮುಂಜಾವು, ಪ್ರತಿ ಇರುಳು
ಓಡೋಡಿ ಬಂದೆನ್ನ ಅಪ್ಪುವಳು
ಕಾಡುವಳು, ಗೋಳಾಡಿಸುವಳು
ದೂರ ಓಡಿ ಹೋಗುವಂತೆ ಮಾಡುವಳು

ನನ್ನಲ್ಲೇನೋ ಕಾತರ, ಆನಂದ
ಬರುವಳೆಂದು ತಿಳಿದು
ಬರುತ್ತಿದ್ದಾಳವಳು ಎನ್ನೊಳು ಬೆರೆಯಲು
ಕಪ್ಪು ನೆನಪುಗಳನಳಿಸಲು

ಅವಳಾರು ಬಲ್ಲೆಯೇನು ಆ ಮಳ್ಳಿ,
ಅವಳೆ... ಅವಳೆ... ದೆಹಲಿಯ ಚಳಿ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ