ಎಲ್ಲಿದ್ದಾರವರು ?

• ಭೀಮ ಪ್ರಕಾಶ್‌ ಅಡ್ಕಸ್ಥಳ,
  ಬೋಲ್ಡರ್‌, ಕೊಲರಾಡೊ, ಯು ಎಸ್‌ ಎ
  E-mail : [email protected]

ಪಡೆಯಲವನಿಯ ಕೊಡಲಿ

ಕಡಲಿಗೆಸೆದವರೆಲ್ಲಿ ?

ಸತಿ ಸುತರ ವಿಕ್ರಯಿಸಿ

ಮಸಣ ಕಾದವರು

ಕಂಡು ಮರಳಿದರಂತೆ
ಸಗ್ಗ ಸುಪ್ಪತ್ತಿಗೆಯ!
ಸಲ್ಲೇಖನಿಗಳು, ಎಲ್ಲಿ ?
ನಾಕಶಿಲ್ಪಿಗಳು

ಅದ್ವೈತದಮೃತದಿ
ಇಳೆಯ ತೊಳೆದವರಂದು
ಜಗದಗಲ ವಿಜುಗೀಷು
ದಿಟ್ಟಿ ನೆಟ್ಟವರು!

ಈ ಅಖಂಡದ ಭಾಂಡ
ಜಗಕೆ ತೆರೆದವರಂದು
ಇರುಳ ಕನಸಲಿ ಎದೆಯ
ಕದವ ತಟ್ಟುವರು

ಗ್ರಾಮ ಸಂಗ್ರಾಮಕ್ಕೆ
ಕಹಳೆಯೂದಿದ ಮಂದಿ
ಕೋಟಿ ಜನ ಸಾಮ್ರಾಜ್ಯ-
ದೆದೆಯ ಹೊಕ್ಕವರು

ಸೆರೆ ಕಂಡು ಪರತಂತ್ರ
ಅದುಮಿ ಸ್ವರವೆತ್ತಿದರು
ವ್ಯಸನ ತೊಲಗಿಸೆ ವಸನ-
ವೊಂದಕಿಳಿದವರು
ಗೋಲದಲಿ ಗೋಳ ತೊಳೆ-
ಯಲು ಬಂದ ದನಿಯೆಲ್ಲಿ ?
ಬೋಧಿ ಮರದಡಿ ಬದುಕು
ಗಂಧ ತೇದವರು!

ತರತಮಕೆ ತಿಲ ನೀರು
ಎರೆದು ಬೆಳೆದವರೆಲ್ಲ
ಮನದಾಳಕಿಳಿವವರು;
ನೆನಪಲುಳಿವವರು

ಈ ಕವಿತೆಯ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ

ಮುಖಪುಟ /

/