ಬುಷ್ಷನು ಬಂದನು ಬಾಗ್ದಾದ್‌ ಬಳಿಗೆ ರಾತ್ರಿಯಾಗಿತ್ತು

• ಡಾ. ಮೈ. ಶ್ರೀ. ನಟರಾಜ, ಗೈಥರ್ಸ್‌ ಬರ್ಗ್‌, ಮೇರೀಲ್ಯಾಂಡ್‌, ಯು.ಎಸ್‌.ಎ
  Email : [email protected]

ಬುಷ್ಷನು ಬಂದನು ಬಾಗ್ದಾದ್‌ ಬಳಿಗೆ

ರಾತ್ರಿಯಾಗಿತ್ತು

ಹುಣ್ಣಿಮೆ ಚಂದಿರ ಬಾನಿನ ತುಂಬ

ಬೆಳಕನು ಚೆಲ್ಲಿತ್ತು

ಬುಷ್ಷನ ಸೇನೆಯ ತುಕಡಿಗಳೆಲ್ಲ
ಬೀಡನು ಬಿಟ್ಟಿತ್ತು
ಕುವೈತಿನ ಮರಳಲಿ ಗೂಟವ ಜಡಿದು
ಡೇರೆಯ ಕಟ್ಟಿತ್ತು

ಆಫ್ಗನ್‌ ಯುದ್ಧವು ಮುಗಿಯುವ ಮೊದಲೇ
ತಾಳ್ಮೆಯು ಮೀರಿತ್ತು
ಒಸಾಮನ ಹಿಡಿಯುವ ಭರವಸೆಯೆಲ್ಲ
ಕರಗುತ ಬಂದಿತ್ತು

ಪಾಕೀಸ್ತಾನದ ಮನೆಮನೆಯಲ್ಲಿ
ಆಲ್ಖಯಿದಾ ಅವಿತಿತ್ತು
ಮುಷರ್ರಾಫನ ಕಿಸೆಯಾಳಗೆಲ್ಲಾ
ಡಾಲರ್‌ ತುಂಬಿತ್ತು

ಉತ್ತರ ಕೊರಿಯದ ಕೋಟೆಯ ಒಳಗೆ
ಅಣುಬಾಂಬ್‌ ಚಿಗುರಿತ್ತು
ಆದರೂ ಬುಷ್ಷನ ದೃಷ್ಟಿಯು ಮಾತ್ರ
ಇರಾಕಲಿ ನೆಟ್ಟಿತ್ತು

ವಿಶ್ವಸಂಸ್ಥೆಯ ಸಭೆಗಳಲೆಲ್ಲ
ಚರ್ಚೆಯು ನಡೆದಿತ್ತು
ಫ್ರಾನ್ಸ್‌ ಜರ್ಮನಿ ರಷ್ಯದ ಗುಂಪು
ಕೂಟವ ರಚಿಸಿತ್ತು

ವಿಶ್ವಕೆ ಉಳಿದಿಹ ಒಂದೇ ಶಕ್ತಿ
ಅಮೇರಿಕಾ ಎನಿಸಿತ್ತು
ಗುಬ್ಬಿಯ ಮೇಲೆ ಬ್ರಹ್ಮಾಸ್ತ್ರವನು
ಬಳಸಲು ಹೊರಟಿತ್ತು

ಕಾಲನು ಕೆರೆಯುತ ಕದನಕೆ ಹೊರಟು
ಸದ್ದಾಮನ ಕೆಣಕಿತ್ತು
ವೀಟೋ ಮಾಡುವ ಫ್ರೆಂಚರ ಮೇಲೆ
ಕೆಂಡವ ಕಾರಿತ್ತು

ಕ್ರಿಮಿಗಳ ಬಾಂಬನು ತೆಗೆದಿಡು ಹೊರಗೆ
ಎನ್ನುತ್ತ ಅರಚಿತ್ತು
ಮಾರಕಾಸ್ತ್ರಗಳ ಮುಚ್ಚಿಟ್ಟಿರುವೆ
ಎನ್ನುತ ಕಿರುಚಿತ್ತು

ಮೂರೇದಿನದಲಿ ಎಲ್ಲವನೊಪ್ಪಿಸೆ
ಬಿಡುವೆನು ಎಂದಿತ್ತು
ಬುಷ್ಷನ ಬಂಧು ಬ್ಲೇರನ ಬಾಯಿ
ಭಾಷಣ ಬಿಗಿದಿತ್ತು

ನಿಶ್ಶಸ್ತ್ರಗೊಳಿಸಿದ ಸದ್ದಾಮನ ಸುತ್ತ
ಗೋರಿಯ ಕಟ್ಟಿತ್ತು
ಸುತ್ತಲ ಅರಬರ ಕೈಕೋಳಗಳ
ಕಳಚಲು ಹೊರಟಿತ್ತು

ಎಣ್ಣೆಯು ಗಿಟ್ಟಲು ಟೆಕ್ಸಸ್‌ ಮಿತ್ರರ
ಮೊಗದಲಿ ನಗುವಿತ್ತು
ಸಾಬರ ಬಡಿದರೆ ಯೆಹೂದ್ಯರಿಗೆಲ್ಲ
ಒಳಗೇ ಖುಷಿಯಿತ್ತು

ಎನ್ರಾನ್‌ ಗಲಾಟೆ ಜನಗಳ ನೆನಪಲಿ
ಮಾಸಿಹೋಗಿತ್ತು
ಮುಳುಗಿದ ಪೆನ್ಷನ್‌ ಏರಿದ ತೆರಿಗೆ
ಎಲ್ಲರ ಕತೆಯಾಯ್ತು!

ತಂದೆಯ ಋಣವನು ತೀರಿಸಿದಾತಗೆ
ನಿರಾಳದ ಉಸಿರಿತ್ತು
ಮುಂದಿನ ವರ್ಷದ ಚುನಾವಣೆಯಲ್ಲಿ
ಬುಷ್ಷನ ಗೆಲುವಾಯ್ತು?

ಈ ಕವಿತೆಯ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ