ಮಹಾಶಿವರಾತ್ರಿ; ಕಾಶಿ ವಿಶ್ವನಾಥ ದೇಗುಲದಿಂದ ನೇರ ಪ್ರಸಾರ
ವಾರಾಣಸಿ, ಮಾರ್ಚ್ 11: ಫಲ್ಗುಣ ಮಾಸದಲ್ಲಿ ಬರುವ ಮಹಾಶಿವರಾತ್ರಿ, ಶಿವನ ಆರಾಧಕರಿಗೆ ವಿಶೇಷ ಹಬ್ಬ. ಶಿವ ಹಾಗೂ ಪಾರ್ವತಿ ವಿವಾಹವಾದ ಈ ದಿನವನ್ನು ವಾರಾಣಸಿಯ ಕಾಶಿ ವಿಶ್ವನಾಥ ದೇಗುಲದಲ್ಲಿ ವಿಶೇಷವಾಗಿ ಆಚರಿಸಲಾಗುತ್ತದೆ.
ಮಹಾಶಿವರಾತ್ರಿಯಂದು ಶಿವನ ದರ್ಶನ ಪಡೆಯಲೆಂದೇ ಕಾಶಿಯಲ್ಲಿ ಲಕ್ಷಾಂತರ ಸಂಖ್ಯೆಯಲ್ಲಿ ಭಕ್ತರು ಸೇರುತ್ತಾರೆ. ಗಂಗಾ ನದಿಯ ತಟದಲ್ಲಿರುವ ಕಾಶಿ ವಿಶ್ವನಾಥನ ದೇವಸ್ಥಾನ ಭಾರತದ ಅತಿ ಪ್ರಸಿದ್ಧ ದೇಗುಲಗಳಲ್ಲಿ ಒಂದು. ಮಹಾಶಿವರಾತ್ರಿಯಂದು ವಾರಾಣಸಿಯಲ್ಲಿ ಲಕ್ಷಾಂತರ ಭಕ್ತರು ಸೇರಿ ಹಬ್ಬದ ವಾತಾವರಣವೇ ತುಂಬಿರುತ್ತದೆ.
ಭಾರತದೆಲ್ಲೆಡೆಯಿಂದ ಹಾಗೂ ವಿಶ್ವದ ಹಲವು ಕಡೆಯಿಂದಲೂ ಇಲ್ಲಿಗೆ ಶಿವ ಭಕ್ತರು ಶಿವರಾತ್ರಿಯಂದು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಾರೆ. ಉಪವಾಸ, ಜಾಗರಣೆ ಇದ್ದು ಶಿವನನ್ನು ಆರಾಧಿಸುತ್ತಾರೆ.
ಹಲವು ಕಾರಣಗಳಿಂದ ಕಾಶಿಗೆ ಬರಲು ಸಾಧ್ಯವಾಗದವರಿಂದೇ ಶಿವನ ದರ್ಶನ ಪಡೆಯಲು ಪ್ರತಿ ಬಾರಿ ಲೈವ್ ಸ್ಟ್ರೀಮಿಂಗ್ ವ್ಯವಸ್ಥೆ ಏರ್ಪಡಿಸಲಾಗುತ್ತದೆ. ಈ ಬಾರಿಯೂ ಶಿವಭಕ್ತರಿಗೆ ನೇರದರ್ಶನ ಪಡೆಯಲು ಲೈವ್ ಸ್ಟ್ರೀಮಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ. ಹೀಗಾಗಿ ಭಕ್ತರು ಮನೆಯಲ್ಲಿಯೇ ಕುಳಿತು ಕಾಶಿ ವಿಶ್ವನಾಥನ ದರ್ಶನವನ್ನು ಪಡೆಯಬಹುದಾಗಿದೆ. ಗುರುವಾರ ಮಧ್ಯಾಹ್ನ 3 ಗಂಟೆಗೆ ಆರಂಭವಾಗಿ ರಾತ್ರಿ 11ರವರೆಗೂ ಲೈವ್ ದರ್ಶನ ಲಭ್ಯವಿರುತ್ತದೆ.