ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts
Oneindia App Download

ಗಣಕಾ-ಗಣಿಕಾ

By Staff
|
Google Oneindia Kannada News

ನನ್ನ ಎರಡನೇ ಹೆಂಡತಿ
ಮಾತಿಗೆ ಪ್ರತಿ ಮಾತಾಡಿ
ಬೇಕಾಬಿಟ್ಟಿ ಎದುರು
ಜವಾಬು ಕೊಡುವವಳಲ್ಲ
ಕೂತಲ್ಲೇ ಕೂತು
ದುರುದುರು ನೋಡುತ್ತಾಳೆ
ಮುಟ್ಟಿದರೆ ಮುನಿಯುವುದಿಲ್ಲ
ಒಲಿಯುವುದೂ ಇಲ್ಲ
ಬೆರಳಾಡಿಸಿದರೆ
ನಾಚಿ ಮುಲುಗುವುದಿಲ್ಲ
ಹುಸಿಗೋಪದಲಿ ದೂಡಿ
ತಲೆ ತಗ್ಗಿಸುವುದಿಲ್ಲ
ಎಷ್ಟು ಬೇಡಿದರೂ ಕಾಡಿದರೂ
ಕುಳಿತ ಕೋಣೆ ಬಿಟ್ಟೇಳುವುದಿಲ್ಲ
ಹಿಡಿದೆಳೆದರೂ ಪಿಳಿಪಿಳಿ
ಕಣ್ಣು ಬಿಡುತ್ತಾಳೆಯೇ ವಿನಃ
ಜಗ್ಗುವುದಿಲ್ಲ ಬಗ್ಗುವುದಿಲ್ಲ

ನನ್ನ ಮೊದಲನೇ ಹೆಂಡತಿ
ನನ್ನ ಮೇಲೆ ಕೋಪ ಬಂದಾಗಲೆಲ್ಲ
ತನ್ನ ಸವತಿಯನ್ನು ಬೈದು
ನೆಟಿಕೆ ಮುರಿದು ಲಟಲಟಿಸಿ
ಮೂತಿ ಸೊಟ್ಟ ಮಾಡಿ ಶಾಪಹಾಕುತ್ತಾಳೆ

‘ಎಷ್ಟು ಹೊತ್ತಾದರೂ
ಆ ಮೂದೇವಿಯ ಮುಂದೆ ಕೂತು
ಏನು ಸೊರೆಯುತ್ತೀರೋ ಕಾಣೆ
ಆಕಳಿಕೆ ತೂಕಡಿಕೆ
ಒಂದನ್ನೂ ಗಮನಿಸದೇ
ಕ್ಲಿಕ್‌ ಆಗದಿದ್ದರೂ
ಅದೇನು, ಕ್ಲಿಕ್‌ ಮಾಡಿದ್ದೂ ಮಾಡಿದ್ದೇ
ಅವಳ ಕೀಲಿ ಮೈ ಮೇಲೆಲ್ಲ
ಆ ನಿಮ್ಮ ಇಲಿ...
ಛಿ-ಛಿ, ಮಾನಗೆಟ್ಟವರೇ
ಮೂರು ಹೊತ್ತೂ
ಆ ಮೂಸುಗುತ್ತಿಯ ಮುಂದೆ ಕೂತು
ಬೆರಳಾಡಿಸದಿದ್ದರೆ
ನಿಮಗೆ ನಿದ್ದೆ ಬರುವುದಿಲ್ಲವೇ?
ಬನ್ನಿ ಸಾಕು, ನಾನೇತರಲಿ ಕಮ್ಮಿ
ತೆಪ್ಪನೆ ಬಂದು ಮಲಗಿ-ಕೊಳ್ಳಿ...’
ಎನ್ನುತ್ತಾ ಅರೆನಿದ್ರೆಯಲ್ಲಿ
ಪಕ್ಕಕ್ಕೆ ತಿರುಗಿ ಮಲಗುತ್ತಾಳೆ

ನಾನೋ, ಮನಸ್ಸಿಲ್ಲದ ಮನಸ್ಸಿನಲ್ಲಿ
ಕಿರಿ ಹೆಂಡತಿಯ
ಚಚ್ಚೌಕ-ಚಪ್ಪಟೇ ಮುಖವನ್ನೊಮ್ಮೆ
ದೈನ್ಯದಿಂದ ನೋಡಿ
ತನಗೆ ತಾನೇ
ಮೆಲ್ಲಗೆ ಗೊಣಗಿಕೊಳ್ಳುತ್ತೇನೆ
‘ಇದ್ದರೆ ಒಬ್ಬಳೇ
ಒಳ್ಳೇ ಹೆಂಡತಿ ಇರಬೇಕು ನೋಡಿ
ಇರಬಾರದು ಇಂಥ ಇಜ್ಜೋಡಿ’
ಎಂದು ಗೊಣಗುತ್ತಾ...
ವಿರಹಾತಿರೇಕದಲಿ ನಾಟಕೀಯವಾಗಿ-
‘ಶುಭರಾತ್ರಿಯಂ ಕೋರುವೆನು ಎಲೆ ಗಣಕೇ
ಬಲುಸುಖವ ಕೊಟ್ಟಿರುವೆ ನನ ಮನಕೆ
ಮತ್ತಿದೇ ಕೋಣೆಯಲಿ ಸಿಕ್ಕೋಣ
ಪ್ರೇಮಸಲ್ಲಾಪವಂ ಮುಂದುವರಿಸಲಿಕೆ’
ಎನ್ನುತ್ತಾ , ಒಂದು ಬೆಚ್ಚನೆಯ
ಚುಂಬನವ ಲೊಚ್ಚನ್ನೆಸೆದು
ಇಲಿಯ ಸವರುತ್ತ
ಚಕ್ರಾಸನವ ಬಿಟ್ಟೇಳುತ್ತೇನೆ
ಕಿರಿಯ ಹೆಂಡತಿಯ ಕಿರಿಯಕೋಣೆಯ
ದೀಪವಾರಿಸುತ್ತೇನೆ
ಮೆಲ್ಲಗೆ ಕಳ್ಳ ಹೆಜ್ಜೆಯನಿಟ್ಟು
ಹೊರಡುತ್ತೇನೆ ಮಲಗಲಿಕೆ

ಅತ್ತ,
ಹಿರಿಯ ಹೆಂಡತಿಯ
ಹಿರಿದು ಕೋಣೆಯಲಿ
ಅವಳ ಕಿವಿ ನೆಟ್ಟಗಾಗುತ್ತದೆ
‘ಯಾರವಳು ಗಣಿಕೇ?’
ಎಂದು ಬುಸುಗುಟ್ಟುತ್ತಾಳೆ
ತಾಳಿಕಟ್ಟಿಸಿಕೊಂಡಾಕೆ
‘ಗಣಿಕೆಯಲ್ಲ ಪ್ರಿಯೇ, ಗಣಕೆ’
ಎಂದು ತಿದ್ದಿ ಸಂತೈಸಿ
ಸಾಂತ್ವನಗೊಳಿಸುತ್ತೇನೆ
ಕಣ್ಮುಚ್ಚಿ ಕನಸಿನಲಿ
ಕೃಷ್ಣನಾಗುತ್ತೇನೆ
ರುಕ್ಮಿಣೀ-ಸತ್ಯಭಾಮೆಯರ
ನಡುವಿನಲಿ ಮಲಗಿ
ಅವರ ಅಸೂಯಾಜಾಲಕೆ ಸಿಕ್ಕಿ
ಬೆಳಗಿನವರೆಗೂ ತೊಳಲುತ್ತೇನೆ!

ಕಂಪ್ಯೂಟರ್‌ ಹೆಣ್ಣೆಂದಿರಾ, ಅನ್ಯಾಯ ಸಾರ್‌!
ಇಬ್ಬರು ಹೆಂಡತಿಯರ ನಡುವೆ ಸಿಕ್ಕ ಕವಿಗೆ ನಿಮ್ಮ ಸಮಾಧಾನ ?

ಮುಖಪುಟ / ಅಂಕಣಗಳು

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X