• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಮಲದೊಂದಿಗೆ ಜಾರಿದ ವಜ್ರರೂಪಿ ಮಾನವತೆ

By Staff
|
M.R. Dattatri ಎಂ.ಆರ್‌. ದತ್ತಾತ್ರಿ,

ಫಾಸ್ಟರ್‌ ಸಿಟಿ, ಕ್ಯಾಲಿಫೊರ್ನಿಯಾ

ಕಡ್ಡಿಗಾಲಿನ, ಬತ್ತಿಹೋದ ಮೈನ, ಬೋಳುತಲೆಯ ಹುಡುಗಿಯಾಬ್ಬಳು ತನ್ನ ಯಾತನಾಶಿಬಿರದಿಂದ (Concentration camp) ಹೊರಗೆ ನೋಡುತ್ತಿದ್ದಾಳೆ. ದೂರದಲ್ಲಿ ಗುಡುಗುಡು ಶಬ್ದ ಮಾಡುತ್ತಾ ಮಣ್ಣಿನ ರಸ್ತೆಯ ಮೇಲಿನ ಧೂಳನ್ನು ಹುಡಿದೆಬ್ಬಿಸಿಕೊಂಡು ಜರ್ಮನ್‌ ಮಿಲಿಟರಿ ಟ್ರಕ್‌ ಒಂದು ಭರ್ತೀ ಯಹೂದೀ (Jews) ಮಕ್ಕಳನ್ನು ತುಂಬಿಕೊಂಡು ಬರುತ್ತಿದೆ. ಭತ್ತದ ಹುಲ್ಲನ್ನು ತುಂಬಿಕೊಂಡು ಬರುವ ಟ್ರಾಕ್ಟರ್‌ನಂತೆ ಈ ಮಕ್ಕಳು ಯಾವ ರೀತಿ ಆ ಟ್ರಕ್ಕಿನೊಳಗೆ ಪ್ಯಾಕ್‌ ಆಗಿದ್ದಾರೆ ಎಂದರೆ ಕೆಲವು ಮಕ್ಕಳು ಉಸಿರಾಡಲೂ ಕಷ್ಟಪಡುತ್ತ ಪ್ರಜ್ಞಾಹೀನ ಸ್ಥಿತಿಯಲ್ಲಿವೆ. ಹೀಗಿರುವಾಗ, ನಿಶ್ಯಕ್ತವಾದ ಎರಡು ಮಕ್ಕಳು ಆ ಟ್ರಕ್ಕಿನಿಂದ ಕೆಳಗೆ ಬೀಳುತ್ತವೆ. ಬಿದ್ದ ನೋವಿಗೆ ಅಮ್ಮಾ ಎಂದು ಕೂಗಿಕೊಳ್ಳುತ್ತವೆ. ಟ್ರಕ್ಕಿನೊಳಗಿದ್ದ ಉಳಿದ ನಿತ್ರಾಣ ಮಕ್ಕಳೂ ಈ ದೃಶ್ಯದಿಂದ ಗಾಬರಿಗೊಂಡು ಜೋರಾಗಿ ಚೀರುತ್ತವೆ. ಬೇಲಿ ಆಚೆಗೆ ನಿಂತು ಇವೆಲ್ಲವನ್ನೂ ಈ ಹುಡುಗಿ ನೋಡುತ್ತಲೇ ಇದ್ದಾಳೆ.

ಟ್ರಕ್‌ ನಿಲ್ಲುತ್ತದೆ. ಮುಂದಿನಿಂದ ಇಬ್ಬರು ಜರ್ಮನ್‌ ಯೋಧರು ಕೆಳಗೆ ಇಳಿಯುತ್ತಾರೆ. ಬಿದ್ದ ಮಕ್ಕಳನ್ನು ಅವುಗಳ ಎಳೆಯ ಕಾಲುಗಳಿಂದ ಹಿಡಿದೆತ್ತಿ ಬಟ್ಟೆ ಒಗೆಯುವಂತೆ ಆ ಟ್ರಕ್ಕಿನ ಟೈರಿಗೆ ಬಡಿಯುತ್ತಾರೆ. ಕರೀ ಟೈರು ಕೆಂಪಾಗುತ್ತದೆ. ಆ ಎರಡೂ ಮಕ್ಕಳ ದೇಹಗಳನ್ನು ಮತ್ತೆ ಮಕ್ಕಳ ಮಂದೆಗೆ ಎಸೆಯುತ್ತಾರೆ. ಟ್ರಕ್ಕು ಮುಂದಕ್ಕೆ ಹೊರಡುತ್ತದೆ. ಮಕ್ಕಳು ಸ್ತಬ್ಧವಾಗುತ್ತವೆ.

The last days, A documentary on the last days of world war IIಬೇಲಿಯಾಚೆಯ ಹುಡುಗಿ ತಾನು ಸಾಕ್ಷಿಯಾದ ಕ್ರೌರ್ಯಕ್ಕೆ ತತ್ತರಿಸಿ ಹೋಗುತ್ತಾಳೆ. ಅಂದಿನಿಂದ ‘ನನ್ನನ್ನು ಇಲ್ಲಿಂದ ಬಿಡುಗಡೆ ಮಾಡಪ್ಪಾ’ ಎಂದು ದೇವರನ್ನು ಬೇಡಿಕೊಳ್ಳುತ್ತಿದ್ದ ಆಶಾವಾದವೂ ಕಮರಿಹೋಗುತ್ತದೆ ಅವಳಲ್ಲಿ.

ಇದೊಂದು ಡಾಕುಮೆಂಟರಿ. ಸ್ಟೀವನ್‌ ಸ್ಪಿಲ್‌ಬರ್ಗ್‌ ಎಕ್ಸಿಕ್ಯುಟಿವ್‌ ಪ್ರೊಡ್ಯೂಸರ್‌ ಆಗಿ ನಿರ್ಮಿಸಿರುವ ಚಿತ್ರ. ‘ದ ಲಾಸ್ಟ್‌ ಡೇಸ್‌’ ಹೆಸರಿನ ಈ ಚಿತ್ರಕ್ಕೆ 1998ರಲ್ಲಿ ಆಸ್ಕರ್‌ ಕೂಡ ಬಂತು. ಈ ಡಾಕುಮೆಂಟರಿಯನ್ನು ನಿರ್ಮಿಸುವ ಮೊದಲೇ ಸ್ಟೀವನ್‌ ಸ್ಪಿಲ್‌ಬರ್ಗ್‌ ಇದೇ ವಿಷಯದ ಮೇಲೆ ಒಂದು ಕಥಾಚಿತ್ರವನ್ನೂ ನಿರ್ಮಿಸಿದ್ದ. ಅದು ‘ಶಿಂಡ್ಲರ್ಸ್‌ ಲೀಸ್ಟ್‌’.

ಕಲ್ಪನೆ, ಕಥೆ, ದೃಶ್ಯಾವಳಿಗಳು, ಭಾರೀ ಸೆಟ್ಟಿಂಗ್‌ಗಳ ಸಿನಿಮಾಗಳಿಗೆ ಹೋಲಿಸಿದರೆ ಡಾಕುಮೆಂಟರಿಗಳು ಬೋರು. ಒಂದು ಕಥಾಚಿತ್ರಕ್ಕೆ ಪ್ರೇಕ್ಷಕರನ್ನು ಸುಲಭವಾಗಿ ಕಲ್ಪನಾಲೋಕಕ್ಕೆ ಜಾರಿಸುವ ಎಲ್ಲ ಆಯಾಮಗಳ ಬಲವಿರುತ್ತದೆ. ಬಲು ಮುಖ್ಯವಾಗಿ ಕಥೆ ಕಟ್ಟಿಕೊಡುವ ರಂಜನೀಯತೆ. ಆದರೆ, ಸಾಕ್ಷ್ಯಚಿತ್ರ (ಡಾಕುಮೆಂಟರಿ) ಹಾಗಲ್ಲ. ಅಲ್ಲಿ ಸತ್ಯ ಮಾತ್ರ ಮುಖ್ಯ. ಸತ್ಯದ ಹಾದಿಯಲ್ಲಿ ಮನೋರಂಜನೆ ಸಿಕ್ಕರೆ ಉಂಟು, ಇಲ್ಲದಿದ್ದರೆ ಇಲ್ಲ. ಎಲ್ಲೋ, ಕೆಲವೇ ಕೆಲವು, ವಿಶೇಷವಾಗಿ ವಿವಾದಾತ್ಮಕವಾದ ಡಾಕುಮೆಂಟರಿಗಳನ್ನು ಬಿಟ್ಟರೆ, ಉದಾಹರಣೆಗೆ ಮೈಕಲ್‌ ಮೂರ್‌ನ ‘ಫ್ಯಾರ್ನ್‌ಹೀಟ್‌ 9/11’ ಮಾರ್ಗನ್‌ ಸ್ಪರ್‌ಲಾಕ್‌ನ ‘ಸೂಪರ್‌ ಸೈಜ್‌ ಮಿ’ ಅಂಥವನ್ನು ಬಿಟ್ಟರೆ ಬಹುತೇಕ ಸಾಕ್ಷ್ಯಚಿತ್ರಗಳು ಕಮರ್ಷಿಯಲ್‌ ಆಗಿ ತೆರೆಕಾಣುವುದೇ ಇಲ್ಲ. ಡಾಕುಮೆಂಟರಿಯಾಂದನ್ನು ಆಸಕ್ತಿಪೂರ್ಣವಾಗಿಸಲು ಅದರ ನಿರ್ದೇಶಕ ಬಹಳಷ್ಟು ಸರ್ಕಸ್ಸುಗಳನ್ನು ಮಾಡಬೇಕಾಗುತ್ತದೆ. ಸಿನೆಮೆಟಾಗ್ರಫಿಯಲ್ಲಿ ವಿಶೇಷತಂತ್ರಗಳನ್ನು ಉಪಯೋಗಿಸಬೇಕಾಗುತ್ತದೆ. ಜಾಕ್ವಸ್‌ ಪೆರ್ರಿಮನ್‌ನ The Winged Migration ಎನ್ನುವ 2002ರ ಆಸ್ಕರ್‌ನ ಕೊನೆಯ ಪಟ್ಟಿಯಲ್ಲಿದ್ದ ಡಾಕುಮೆಂಟರಿಯನ್ನು ನೋಡಬೇಕು ನೀವು. ಹಕ್ಕಿಗಳ ವಲಸೆಯನ್ನು ಚಿತ್ರಿಸಲು ನಿರ್ದೇಶಕ ತಾನೂ ಒಂದು ಹಾಟ್‌ ಏರ್‌ ಬಲೂನಿನೊಂದಿಗೆ ಅವುಗಳೊಂದಿಗೇ ಹಾರಿದ್ದಾನೆ!

ಆದರೆ, ‘ದ ಲಾಸ್ಟ್‌ ಡೇಸ್‌’ನಲ್ಲಿ ಅದ್ಯಾವ ತಂತ್ರಗಳೂ ಇಲ್ಲ. ತಂತ್ರದ ದೃಷ್ಟಿಯಲ್ಲಿ ನೋಡಿದರೆ ಅತಿ ಸಾಧಾರಣವಾದ ಡಾಕುಮೆಂಟರಿ ಇದು. ನಾನು ಮೇಲೆ ತಿಳಿಸಿದ ಮಕ್ಕಳು ತುಂಬಿದ ಟ್ರಕ್ಕಿನ ದೃಶ್ಯದ ಚಿತ್ರಣವಿಲ್ಲ ; ಅದನ್ನು ಆ ದೃಶ್ಯವನ್ನು ನೋಡಿದ ಹೆಣ್ಣೇ (ಈಗ ಮುದುಕಿ ಆಕೆ) ಖುದ್ದು ವಿವರಿಸುತ್ತಾಳೆ. ಈ ತರಹ ಹಿಟ್ಲರ್‌ನ ಕಾನ್ಸೆಂಟ್ರೇಷನ್‌ ಕ್ಯಾಂಪಿನಲ್ಲಿ ನೊಂದ ಐವರು ಒಬ್ಬರ ನಂತರ ಒಬ್ಬರು ಮಾತನಾಡುವುದನ್ನು ಬಿಟ್ಟರೆ ಈ ಚಿತ್ರದಲ್ಲಿ ಮತ್ತೇನೂ ಇಲ್ಲ ! ಸಾಧಾರಣವಾದ ಒಂದು ಕೋಣೆಯ ಮೂಲೆಯಲ್ಲಿನ ಕುರ್ಚಿಯಲ್ಲಿ ಕುಳಿತು ಭಾವೋದ್ವೇಗಗಳನ್ನು ಬಹುಪಾಲು ಹತೋಟಿಯಲ್ಲಿಯೇ ಇಟ್ಟುಕೊಂಡು ಐವತ್ತು ವರ್ಷಗಳ ಹಿಂದೆ ಅವರ ಜೀವನದಲ್ಲಿ ನಡೆದ ಘಟನೆಗಳನ್ನು ಹೇಳುವುದ ಬಿಟ್ಟರೆ ನಿಮಗೆ ಆಗಾಗ ಕಾಣುವುದು ಆರ್ಕೈವ್ಸ್‌ಗಳಿಂದ ಅಳವಡಿಸಿಕೊಂಡ ಕಪ್ಪು-ಬಿಳುಪಿನ ಸ್ತಬ್ಧಚಿತ್ರಗಳು ಮಾತ್ರ. ದೃಶ್ಯಮಾದ್ಯಮದ ಮಹತ್ವವೇ ಇಲ್ಲದ ಈ ಡಾಕುಮೆಂಟರಿಯನ್ನು ಒಂದು ರೇಡಿಯೋ ಡಾಕುಮೆಂಟರಿಯನ್ನಾಗಿಸಿದ್ದರೂ ನಡೆಯುತ್ತಿತ್ತು.

ಆದರೂ, ಈ ಸಾಕ್ಷ್ಯಚಿತ್ರ ನಿಮ್ಮನ್ನು ಹಿಡಿದು ನಿಲ್ಲಿಸುತ್ತದೆ. ತಂತ್ರ, ಕಥೆ, ಎಡಿಟಿಂಗ್‌, ಧ್ವನಿ ಯಾವುದರಿಂದಲೂ ಅಲ್ಲ ; ಬದಲಾಗಿ ಅದು ಬಿಂಬಿಸುವ ಭೀಕರವಾದ ಸತ್ಯದಿಂದ! ಸತ್ಯದ ಅಷ್ಟು ಘನರೂಪವನ್ನು ಅರಗಿಸಿಕೊಳ್ಳಲಾಗದೇ, ಸತ್ಯ ನಮ್ಮೆದುರಿನಲ್ಲೇ ಸೈತಾನನ ಗಾತ್ರದಲ್ಲಿ ಬೆಳೆದ ಎತ್ತರವನ್ನು ನೋಡಲಾಗದೇ ನಾವು ತಲೆತಗ್ಗಿಸುತ್ತೇವೆ.

ಹಿಟ್ಲರ್‌ನ ಮಾರಣಹೋಮದಲ್ಲಿ 60 ಲಕ್ಷ ಯಹೂದಿಗಳು ಬಲಿಯಾದರು. ಯುದ್ಧದಲ್ಲಿ ಸೋಲುತ್ತಿದ್ದರೂ, ಒಂದು ಕಡೆಯಿಂದ ಅಮೆರಿಕ ಮತ್ತೊಂದೆಡೆಯಿಂದ ರಷ್ಯಾ ಜರ್ಮನಿಯನ್ನು ಕಬಳಿಸುತ್ತಾ ಬರುತ್ತಿದ್ದರೂ, ಯಹೂದಿಗಳ ಬೇಟೆಗೆ ಬಿಟ್ಟ ಸೈನಿಕರನ್ನು ಹಿಟ್ಲರ್‌ ದೇಶ ರಕ್ಷಣೆಗಾಗಿ ವಾಪಸ್ಸು ಕರೆಸಿಕೊಳ್ಳಲಿಲ್ಲ, ಬದಲಾಗಿ, ಮತ್ತೂ ಸೈನಿಕರನ್ನು ಅದಕ್ಕಾಗಿ ನಿಯೋಜಿಸಿದ. ದೇಶವನ್ನು ರಕ್ಷಿಸುವುದಕ್ಕಿಂತಾ ಯಹೂದಿಗಳನ್ನು ಕೊಲ್ಲುವುದು ಮುಖ್ಯವಾಗಿತ್ತು ಅವನಿಗೆ!

ಸತ್ತವರ ಸಂಖ್ಯೆ ಯಾವ ದುಃಖವನ್ನೂ ಹೇಳುವುದಿಲ್ಲ. ಆದರೆ ಆ ಸಂಖ್ಯೆಯಿಂದ ಒಂದು ಮುಖ ಎದ್ದು ಬಂದು ಮಾತನಾಡಲಾರಂಭಿಸಿದರೆ ನಮ್ಮ ಅಡಿಪಾಯ ಅಲುಗಾಡುತ್ತದೆ. ಯಾವ ದುಃಖಕ್ಕೇ ಆಗಲಿ ವೈಯಕ್ತಿಕ ಮುಖ ಬಂದಾಗ ಅದರ ಬೇಗೆ ನಿಜವಾಗಿಯೂ ನಮಗೆ ತಟ್ಟುತ್ತದೆ. ಗುಜರಾತ್‌ನಲ್ಲಿ ನಡೆದ ಹಿಂಸಾಚಾರವನ್ನು ನ್ಯೂಸ್‌ಪೇಪರ್‌ಗಳಲ್ಲಿ ಓದಿ ‘ನಮ್ಮ ಬುದ್ಧಿಮತ್ತೆಯ ಮತ್ತು ದೇಶೋದ್ಧಾರದ’ ಕಾಮೆಂಟ್ಸ್‌ಗಳನ್ನು ಮಾಡುವುದಕ್ಕೂ ಅಲ್ಲಿಂದ ನಿಮ್ಮ ಕಸಿನ್‌ ಫೋನ್‌ ಮಾಡಿ ಭಯ ನಡುಕಗಳಿಂದ ಅವನ ಮನೆಯ ಸುತ್ತಲಿನ ಪರಿಸ್ಥಿತಿಯನ್ನು ವಿವರಿಸುವುದಕ್ಕೂ ಬಹಳ ವ್ಯತ್ಯಾಸವಿದೆ. ಆ ತರಹ ಕಸಿನ್‌ನ ಫೋನ್‌ಕಾಲ್‌ನಂತಹ ಚಿತ್ರ ‘ದ ಲಾಸ್ಟ್‌ ಡೇಸ್‌’.

ಟ್ರಕ್ಕಿನ ಚಕ್ರಕ್ಕೆ ಬಡಿದುಕೊಂಡು ಮಕ್ಕಳು ಸಾಯುವ ಕಥೆ ಹೇಳುತ್ತಾಳಲ್ಲ , ಆಕೆಯ ಹೆಸರು ಐರಿನ್‌ ಜಿಸ್‌ಬ್ಲಾಟ್‌. ಆಕೆ ಮತ್ತೊಂದು ಕಥೆಯನ್ನೂ ಹೇಳುತ್ತಾಳೆ. ಹಿಟ್ಲರ್‌ನ ಕಡೆಯವರು ಇವರ ಸಂಸಾರವನ್ನು ಯಾತನಶಿಬಿರಕ್ಕೆ ಹಾಕುವುದು ಖಚಿತವಾದಾಗ ಐರಿನ್‌ನ ತಾಯಿ ತನ್ನ ಪೆಟ್ಟಿಗೆಯಿಂದ ಒಂದು ವಜ್ರವನ್ನು ತೆಗೆದು ಹುಡುಗಿ ಐರಿನ್‌ನ ಕೈಗಿಡುತ್ತಾ ‘ಯಾವುದಾದರೂ ಜೀವ ಉಳಿಸಿಕೊಳ್ಳುವ ಸಂದರ್ಭ ಬಂದರೆ ಉಪಯೋಗಿಸಿಕೋ ಮಗಳೇ’ ಎಂದಳಂತೆ. ಶಿಬಿರಕ್ಕೆ ಪ್ರವೇಶಿಸಿದ ದಿನವೇ ಸೈನಿಕರು ಇವರನ್ನು ಬೆತ್ತಲೆಗೊಳಿಸಿ ಅವರ ಕೈಲಿದ್ದ ವಸ್ತುಗಳನ್ನೆಲ್ಲಾ ಕಿತ್ತುಕೊಳ್ಳತೊಡಗಿದರಂತೆ. ತಾಯಿಕೊಟ್ಟ ವಜ್ರವನ್ನು ಕಳೆದುಕೊಳ್ಳುವುದು ಐರಿನ್‌ಗೆ ಇಷ್ಟವಿರಲಿಲ್ಲ. ಹಾಗೆಯೇ, ಅದನ್ನು ಮುಚ್ಚಿಡುವುದಾದರೂ ಎಲ್ಲಿ ? ಕೊನೆಗೆ ಏನೂ ತೋಚದೆ ಬಾಯಿಗೆ ಹಾಕಿಕೊಂಡು ನುಂಗಿಬಿಟ್ಟಳಂತೆ! ಆಮೇಲೆ, ಮಲವಿಸರ್ಜನೆಯ ಸಮಯದಲ್ಲಿ ಅದನ್ನು ಹೆಕ್ಕಿತಂದಳು. ಬರೀ ಒಂದು ದಿನ ಮಾತ್ರ ಅಲ್ಲ , ಆಕೆ ಶಿಬಿರದಲ್ಲಿದ್ದ ಅಷ್ಟೂ ದಿನವೂ ಆ ವಜ್ರವನ್ನು ಉಳಿಸಿಕೊಳ್ಳಲು ಆ ಕೆಲಸ ಮಾಡಿದ್ದಾಳೆ. ಯಾತನಾಶಿಬಿರದಲ್ಲಿ ಸತ್ತ ತಾಯಿಯ ನೆನಪಿನ ವಸ್ತುವಾಗಿತ್ತು ಅದು. ಆ ವಜ್ರ ಒಂದೇ ಅವಳಿಗೆ ಒಳ್ಳೆಯ ಜಗತ್ತಿನ, ಪ್ರೀತಿಯ ದ್ಯೋತಕವಾಗಿತ್ತು. ಹೀಗೆಯೇ ಒಮ್ಮೆ ಅವಳು ತನ್ನ ಮಲವನ್ನು ಕೆದಕುತ್ತಿದ್ದಾಗ ಸೈನಿಕನೊಬ್ಬ ಒಳಗೆ ನುಗ್ಗಿದನಂತೆ. ಇನ್ನೆಲ್ಲಿ ಅವನು ವಜ್ರವನ್ನು ತನ್ನಿಂದ ಬೇರ್ಪಡಿಸುತ್ತಾನೋ ಎಂದು ವಜ್ರವೂ ಸೇರಿದಂತೆ ಅಷ್ಟೂ ಮಲವನ್ನು ಈಕೆ ನುಂಗಿಬಿಟ್ಟಳಂತೆ! ಇವತ್ತು ಆ ವಜ್ರ ಮುದುಕಿ ಐರಿನ್‌ನ ಕೊರಳಲ್ಲಿ ತೊಟ್ಟಿಕ್ಕುವ ಕಣ್ಣೀರಿನ ಆಕಾರದ ಪೆಂಡೆಂಟ್‌ ಆಗಿದೆ.

***

ಇಷ್ಟೆಲ್ಲಾ ಯಾತನೆಯನ್ನು ಹೇಳಿ ಚಿತ್ರ ಕಡೆಯಲ್ಲಿ ನಮ್ಮನ್ನು ನಗಿಸಲು ನೋಡುತ್ತದೆ. ಅಳುವ ಕಡಲಲ್ಲಿ ನಗೆಯ ಹಾಯಿದೋಣಿಗಳು ತೇಲಿ ಬರುತ್ತವೆ. ಶಿಬಿರದ ಮಾರಣಹೋಮದ ಕಥೆ ಹೇಳುವ ಐದೂ ಜನರು (ಹಂಗೇರಿಯಲ್ಲಿ ಹುಟ್ಟಿದವರು ಆದರೀಗ ಐವರೂ ಅಮೆರಿಕೆಯ ಪೌರರು) ವ್ಯಾಪಾರ, ರಾಜಕಾರಣ, ಫ್ಯಾಷನ್‌ ಡಿಸೈನಿಂಗ್‌ನಂತಹ ಕ್ಷೇತ್ರಗಳನ್ನು ಹಿಡಿದು ಜೀವನದಲ್ಲಿ ಮುಂದುಬಂದಿರುವುದು ಒಂದು ಚೂರು ಸಮಾಧಾನವನ್ನು ಕೊಡುತ್ತದೆ. ಅದರಲ್ಲೂ ಟಾಮ್‌ ಲ್ಯಾನ್‌ಟೋಸ್‌ ನಾನಿರುವ ಫಾಸ್ಟರ್‌ ಸಿಟಿ ಸೇರಿದಂತೆ ಸ್ಯಾನ್‌ ಮ್ಯಟಿಯೋ ಕೌಂಟಿಯಿಂದ ಅಮೆರಿಕಾ ಕಾಂಗ್ರೆಸ್‌ಗೆ ಪ್ರತಿನಿಧಿಯಾಗಿದ್ದಾನೆ. ಶಿಬಿರದಿಂದ ತನ್ನವರನ್ನೆಲ್ಲಾ ಕಳೆದುಕೊಂಡು ಒಂಟಿಯಾಗಿ ಹೊರಬಿದ್ದವನಿಗೆ ಈಗ ಹದಿನೇಳು ಮೊಮ್ಮಕ್ಕಳು!

ಈ ಡಾಕುಮೆಂಟರಿಯಲ್ಲಿ ಕೂಡ ಹಿಂಸೆಯನ್ನು ತಿರುಚಿನೋಡುವ ಒಂದು ಅನಪೇಕ್ಷಣೀಯ ದೃಶ್ಯವಿದೆ. ಅಮೆರಿಕನ್‌ ಯೋಧನೊಬ್ಬ ಆಶ್‌ವಿಟ್ಸ್‌ ಕ್ಯಾಂಪನ್ನು ಬಿಡುಗಡೆ ಮಾಡುತ್ತಾ ಅಲ್ಲಿಯೇ ಇದ್ದ ನಿರಾಯುಧ ಜರ್ಮನ್‌ ಯೋಧನನ್ನು ನಿರ್ದಾಕ್ಷಿಣ್ಯವಾಗಿ ಕೊಂದ ಬಗೆಯನ್ನು ಹಾಗೂ ಆ ಕ್ಯಾಂಪ್‌ಗಳಲ್ಲಿ ನೋವು ಅನುಭವಿಸಿದ್ದ ಜನರಿಗೇ ಆಯುಧಗಳನ್ನು ಕೊಟ್ಟು ಜರ್ಮನ್ನರನ್ನು ಸಾಯಿಸಿದ ಬಗೆಯನ್ನು ಬಹಳ ಹೆಮ್ಮೆಯಿಂದ ವಿವರಿಸುತ್ತಾನೆ. ಅದುವರೆಗಿನ ದೃಶ್ಯಾವಳಿಗಳಲ್ಲಿ ಜರ್ಮನ್‌ ಯೋಧರು ಎಸಗಿದ ಮಹಾ ಹತ್ಯಾಕಾಂಡವನ್ನು ಕಂಡ ನಮ್ಮ ಮನಸ್ಸು ಆ ಕ್ಷಣದಲ್ಲಿ ಈ ಅಮೆರಿಕನ್‌ ಯೋಧನ ಕೃತ್ಯಗಳನ್ನು ಒಪ್ಪಿಕೊಂಡುಬಿಡುತ್ತದೆ. ಸೇಡಿಗಾಗಿ ಹಪತಪಿಸುವ ಮನಸ್ಸಿನ ಯಾವುದೋ ಮೂಲೆ ಈ ಕೊಲೆಯಿಂದ ಒಂದು ರೀತಿಯ ವಿಕೃತ ಸಂತೃಪ್ತಿಯನ್ನು ಪಡೆಯುತ್ತದೆ. ಇದು ಎಷ್ಟರಮಟ್ಟಿಗೆ ಸರಿ? ಗುಜರಾತ್‌ನಲ್ಲಿ ನಡೆದ ಪ್ರತೀಕಾರ ಹಿಂಸೆಯನ್ನು ಸಮರ್ಥಿಸಿದಷ್ಟೇ ಕ್ರೂರವಾಗಿ ಇದು ಕಾಣುವುದಿಲ್ಲವೇ?

ಅರವತ್ತು ಲಕ್ಷ ಜನ ಸತ್ತರು ಎನ್ನುವುದು ಬರೀ ಸಂಖ್ಯೆಯ, ಆಶ್ಚರ್ಯ ಭೀಭತ್ಸ ಕುತೂಹಲಗಳನ್ನು ಹುಟ್ಟುಹಾಕುವ ಬರೀ ಸಂಖ್ಯೆಯ ಸಂದೇಶವಾಗಬಾರದು. ಅರವತ್ತು ಲಕ್ಷ ಜನ ಸತ್ತದ್ದು ಪಾಠವಾಗಬೇಕು. ಅರವತ್ತು ಲಕ್ಷ ಜನ ಸತ್ತದ್ದು ರಾಜಕಾರಣಿಗಳ ಕೈಯಾಳಗಿನ ಆಟಿಕೆಯಾಗಬಾರದು. ಹಾಗೆ ನೋಡಿದರೆ ಯಾವ ಹತ್ಯಾಕಾಂಡವೂ, ಗುಜರಾತ್‌ನ ದಳ್ಳುರಿ, ಸೆಪ್ಟೆಂಬರ್‌ 11ರ ಹತ್ಯಾಕಾಂಡ ಸೇರಿ, ರಾಜಕೀಯವಾಗಿ ಮಾನವತೆಯ ಜೀವ ಮರಣಗಳ ಪ್ರಶ್ನೆಯಿಂದ ದೂರವಾಯಿತೋ ಅವತ್ತೇ ಆ ಹತ್ಯಾಕಾಂಡಗಳ ನಿಷ್ಠುರ ಸತ್ಯದ ಮೇಲೆ ನಾವು ಕಂಬಳಿ ಹೊದ್ದಿಸಿಬಿಡುತ್ತೇವೆ. ಆ ಹತ್ಯಾಕಾಂಡದಲ್ಲಿ ದಗ್ಧವಾದ ಮಾನವತೆ ಮತ್ತೆ ಮತ್ತೆ ತನ್ನ ಅದೇ ಅತಂತ್ರತೆಗೆ ಹೊರಳುತ್ತದೆ. ತತ್ವಶಾಸ್ತ್ರಜ್ಞ ಸಾಂಟಯಾಣನ ಮಾತುಗಳಂತೆ ಇತಿಹಾಸದಿಂದ ಪಾಠ ಕಲಿಯದವರು ಅದನ್ನು ಮತ್ತೆ ಮತ್ತೆ ಅನುಭವಿಸುವ ಶಿಕ್ಷೆಗೆ ಒಳಗಾಗುತ್ತಾರೆ.

ಐರಿನ್‌ ತನ್ನ ಕಣ್ಣಿರ ಹನಿಯ ಆಕಾರದ ವಜ್ರದ ಪೆಂಡೆಂಟ್‌ ತೋರಿಸಿದಾಗ ನಮ್ಮ ಮನಸ್ಸಿಗೆ ಹಿತವೆನ್ನಿಸುತ್ತದೆ. ಆದರೆ, ಮಾನವತೆ ಆ ಕಣ್ಣಿರ ಹನಿಯ ವಜ್ರದೊಳಗೆ ಸೇರಿ ಅವಳ ಬಾಯಿಯಿಂದ ಗುದದ್ವಾರಕ್ಕೆ ಮಾಡಿದ ಪಯಣದಲ್ಲಿ ಮತ್ತು ನಮ್ಮಿಂದ ತಪ್ಪಿಸಿಕೊಳ್ಳಲು ಮಲದಲ್ಲಿ ಅಡಗಿದ ರೀತಿಯಲ್ಲಿ ನಾವು ಬಹಳಷ್ಟು ಹೆಮ್ಮೆ ಪಡುವ ನಮ್ಮ ಸಂಸ್ಕೃತಿ ಮತ್ತು ನಾಗರೀಕತೆಗಳ ಮೇಲೆ ಒಂದು ವಿಪರ್ಯಾಸವೆನಿಸುವ ದಟ್ಟಗಪ್ಪಿನ ಪ್ರಶ್ನಾರ್ಥಕ ಚಿಹ್ನೆಯನ್ನು ಎಳೆದಿದೆ ಎಂದು ಅನ್ನಿಸುವುದಿಲ್ಲವೇ?

ಮುಖಪುಟ / ಅಂಕಣಗಳು

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Oneindia ಬ್ರೇಕಿಂಗ್ ನ್ಯೂಸ್,
ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more