ಸೆಪ್ಟೆಂಬರ್ 2018 - ಕ್ಯಾಲೆಂಡರ್ ಮೇಲೆ ತಿಂಗಳ ರಾಶಿ ಭವಿಷ್ಯ


ಜ್ಯೋತಿಷ್ಯ ಕ್ಯಾಲೆಂಡರನ್ನು ಖ್ಯಾತ ಜ್ಯೋತಿಷಿ ಪಂಡಿತ ಅನುಜ್ ಕೆ. ಶುಕ್ಲಾ ಅವರುಸೆಪ್ಟೆಂಬರ್2018ರ ಪಂಚಾಂಗದ ಆಧಾರದ ಮೇಲೆ ಆಯಾ ರಾಶಿಗೆ ಅನುಗುಣವಾಗಿ ರೂಪಿಸಿದ್ದಾರೆ. ನಿಮ್ಮ ರಾಶಿಗೆ ತಕ್ಕಂತೆ ಅಂದಿನ ದಿನ ನಿಮ್ಮ ಜೀವನದಲ್ಲಿ ಹೇಗಿರುತ್ತದೆ ಎಂಬುದನ್ನು ತಿಳಿದುಕೊಳ್ಳಿ. ಇಂದು ಮಾತ್ರವಲ್ಲ, ನಾಳೆ, ನಾಡಿದ್ದು ಅಥವಾ ಮುಂದಿನ ದಿನ ಹೇಗಿರುತ್ತದೆಂದು ಕೂಡ ಈ ಕ್ಯಾಲೆಂಡರ್ ಮುಖಾಂತರ ತಿಳಿಯಬಹುದು.

ವಾರ ಭವಿಷ್ಯ ಅಥವಾ ತಿಂಗಳ ಭವಿಷ್ಯ ಒಂದು ಬಾರಿ ನೋಡಿ ಮರೆತುಬಿಟ್ಟಿರುತ್ತೇವೆ. ನಾವು ಅವುಗಳನ್ನು ಮರೆತರೂ ಗ್ರಹ, ನಕ್ಷತ್ರ ಮತ್ತು ಕಾಲಚಕ್ರಗಳನ್ನು ನಮ್ಮನ್ನು ಮರೆಯುವುದಿಲ್ಲ. ಭಾರತದ ಪ್ರಾಚೀನ ಜ್ಯೋತಿಷ್ಯಶಾಸ್ತ್ರ ನಮ್ಮ ಜೀವನದೊಂದಿಗೆ ಯಾವತ್ತೂ ಕೂಡಿಕೊಂಡಿರುತ್ತದೆ. ನಿಮ್ಮ ಜೀವನವನ್ನು ಸರಳಗೊಳಿಸುವ ಉದ್ದೇಶದಿಂದ ಜ್ಯೋತಿಷ್ಯ ಕ್ಯಾಲೆಂಡರನ್ನು ಇಲ್ಲಿ ಸಾದರಪಡಿಸುತ್ತಿದ್ದೇವೆ. ನಮ್ಮ ಭವಿಷ್ಯಫಲ ಏನಿದೆ ಎಂದು ಇಲ್ಲಿ ಖುದ್ದಾಗಿ ನಾವೇ ನೋಡಿಕೊಳ್ಳಬಹುದು.

ಚಂದ್ರನ ಚಲನೆಯನ್ನು ಆಧಿರಿಸಿ ರೂಪಿಸಲಾಗಿರುವ ಈ ಕ್ಯಾಲೆಂಡರನ್ನು ನೋಡಿ ಆಯಾ ದಿನ ಪ್ರೇಮ ಪರಿಣಯ ಎಂದು ಹೇಗೆ, ಮನೆ ಕೊಳ್ಳಲು ಯಾವ ದಿನ ಸೂಕ್ತ, ಎಂದು ಧನ ಪ್ರಾಪ್ತಿಯಾಗುತ್ತದೆ, ಯಾವ ದಿನ ಖಿನ್ನತೆ ಆವರಿಸುತ್ತದೆ, ಎಂದು ಸಂತಸದ ಬುಗ್ಗೆ ಉಕ್ಕುತ್ತದೆ ಮುಂತಾದ ವಿಷಯಗಳ ಬಗ್ಗೆ ತಿಳಿಯಬಹುದು. ಎಲ್ಲ ಸಂಗತಿಗಳನ್ನು ಪಂಡಿತರು ವಿವಿಧ ಚಿಹ್ನೆಗಳ ಮುಖಾಂತರ ಅತ್ಯಂತರ ಸರಳವಾಗಿ ತಿಳಿಸಿಕೊಡುತ್ತಾರೆ.

ಯಾವ ಚಿಹ್ನೆ ಏನು ಹೇಳುತ್ತದೆ?

ಹೃದಯ - ಪ್ರೀತಿ ಪ್ರೇಮ ಪ್ರಣಯಕ್ಕೆ ಆ ದಿನ ಅತ್ಯಂತ ಸುದಿನವಾಗಿರುತ್ತದೆ.
ಮಿಂಚು - ಆ ದಿನ ನಿಮ್ಮ ಜೀವನದಲ್ಲಿ ಆಪತ್ತು ಬರಬಹುದು.
ಮನೆ - ಮನೆ ಅಥವಾ ಅಂಗಡಿಯನ್ನು ಆ ದಿನ ಕೊಳ್ಳಬಹುದು ಅಥವಾ ಮಾರಬಹುದು.
ಮುಗುಳ್ನಗೆ - ಆ ದಿನ ನಿಮ್ಮ ಜೀವನದಲ್ಲಿ ಸಂತಸ ಬರಬಹುದು.
ಚಿಂತೆ - ಯಾವುದೋ ವಿಷಯದಲ್ಲಿ ಚಿಂತೆ ಅಥವಾ ಖಿನ್ನತೆ ಆವರಿಸಬಹುದು.
ನಕ್ಷತ್ರ - ಆ ದಿನ ಜೀವನದಲ್ಲಿ ಸೌಭಾಗ್ಯದ ದಿನವಾಗಿರುತ್ತದೆ.
ನಾಣ್ಯ - ನಾಣ್ಯ ಇದ್ದ ದಿನ ಧನ ಲಾಭ ಆಗುವ ಸಂಭವನೀಯತೆ ಇರುತ್ತದೆ.

ಪ್ರತಿದಿನ ಬಿಡುವು ಸಿಕ್ಕಾಗಲೆಲ್ಲ ಈ ಕ್ಯಾಲೆಂಡರನ್ನು ನೋಡಬೇಕೆಂದಿದ್ದರೆ ಈ ಪುಟವನ್ನು ಬುಕ್‌ಮಾರ್ಕ್ ಮಾಡಿಟ್ಟುಕೊಳ್ಳಿ.

ಮೇಷ

ದೃಢಚಿತ್ತರಾಗಿ ಇಟ್ಟ ನಂಬಿಕೆ ಎಂದೂ ಹುಸಿಹೋಗುವುದಿಲ್ಲ. ಕನಿಷ್ಠಪಕ್ಷ ನಿರಾಶೆ ಮಾಡುವುದಿಲ್ಲ. ಅದರಲ್ಲೂ ವೈದ್ಯರನ್ನು ಸಂಪರ್ಕಿಸಿ ಅವರಿಂದ ಚಿಕಿತ್ಸೆ ಪಡೆಯುವಾಗ, ಅವರು ಕೊಟ್ಟ ಔಷಧಿಯ ಮೇಲೆ ನನಗೆ ನಂಬಿಕೆ ಇಲ್ಲ ಅಂತ ಕೂಡಲು ಸಾಧ್ಯವೆ? ಗುಣವಾಗುತ್ತೋ ಬಿಡುತ್ತೋ ವೈದ್ಯರ ಅಣತಿಯನ್ನು ಅನುಸರಿಸಲೇಬೇಕು. ಏನೇ ಆಗಲಿ, ಆರೋಗ್ಯದ ಮೇಲೆ ಒಂದು ಕಣ್ಣು ಇಟ್ಟೇ ಇರಿ. ಇಂಟರ್ನೆಟ್ಟಿನಲ್ಲಿ ಬರುವ ಎಲ್ಲ ಆಕರ್ಷಕ ವಸ್ತುಗಳನ್ನು ಕೊಳ್ಳುವ ಹಪಾಹಪಿಗೆ ಬೀಳದಿರಿ. ಮೋಸ ಹೋದಮೇಲೆ ಆಸೆ ಕೈಬಿಡಬೇಕೇಕೆ? ಕಠಿಣಾತಿ ಕಠಿಣ ಪರಿಸ್ಥಿತಿಗಳನ್ನು ಎದುರಿಸುವುದು ಹೇಗೆ ಎಂಬುದರ ಬಗ್ಗೆ ಈಗಿಂದಲೇ ಚಿಂತನೆ ನಡೆಸಲು ಆರಂಭಿಸಿದರೆ ತಪ್ಪೇನೂ ಇಲ್ಲ. ಎಲ್ಲಕ್ಕಿಂತ ಹೆಚ್ಚಾಗಿ, ಮನೆಯಲ್ಲಿಯೇ ಇದ್ದು ದುಡಿಯುವ ಅವಕಾಶಗಳೇನಾದರೂ ಇವೆಯಾ ಎಂಬ ಬಗ್ಗೆ ಗಮನ ನೀಡಿ.

ವೃಷಭ

ನಿಮ್ಮ ಸೌಮ್ಯತನದ ಮೇಲೆ ಹತ್ತಿ ಸವಾರಿ ಮಾಡಲು ಹಲವರು ಕಾದು ನಿಂತಿರುತ್ತಾರೆ. ಅಂಥವರನ್ನು ಚಾಕಚಕ್ಯತೆಯಿಂದ ನಿಮ್ಮ ಹಾದಿಗೆ ಬರದಂತೆ ನೋಡಿಕೊಳ್ಳಿ. ಇಲ್ಲಿ ಮಾನವೀಯತೆ, ಸಂಬಂಧಗಳು, ಭಾವುಕತೆ ಯಾವುದೂ ಅಡ್ಡ ಬರಬಾರದು. ವ್ಯವಹಾರ ಅಂದ್ರೆ ವ್ಯವಹಾರ, ಮಾಡಲು ಬರದಿದ್ದರೆ ತೆಪ್ಪಗೆ ಹಿಂದೆ ಸರಿದುಬಿಡಿ. ಹಾಗೆಂದು, ದಬ್ಬಾಳಿಕೆ ಮಾಡಲು ಬರುವವರ ವಿರುದ್ಧ ಅವರಿಗೆ ಸಮನಾಗಿ ತಿರುಗಿಬೀಳಬೇಕಂತೇನೂ ಇಲ್ಲ. ಹಬ್ಬಹರಿದಿನಗಳಲ್ಲಿ ನೀವೇ ಅಲ್ಲಿಇಲ್ಲಿ ಸುತ್ತಾಡುವ ಬದಲು, ನೀವಿದ್ದಲ್ಲಿಯೇ ಬಂಧುಗಳು ಬಂದರೆ ಆರೋಗ್ಯದ ದೃಷ್ಟಿಯಿಂದ ಅನುಕೂಲ. ಯಾರಿಂದಲೇ ಹಣ ಬರಬೇಕಿದ್ದರೆ ಮುಲಾಜಿಲ್ಲದೆ ಕೇಳಿ ಇಸಿದುಕೊಳ್ಳಿ. ಇಲ್ಲದಿದ್ದರೆ, ಅದು ಬೇರೊಂದು ಅಪಾರ್ಥಕ್ಕೆ ಕಾರಣವಾಗಿ, ಅಂದುಕೊಂಡಿದ್ದೆಲ್ಲ ಏರುಪೇರಾಗಬಾರದು.

ಮಿಥುನ

ಸಮಯ ನಮಗಾಗಿ ಕಾಯುವುದಿಲ್ಲ, ಸಮಯವನ್ನು ಕೊಳ್ಳಲೂ ಆಗುವುದಿಲ್ಲ, ಸಮಯ ಕಳೆದು ಹೋದಾಗ ಚಿಂತಿಸಿ ಫಲವೂ ಇಲ್ಲ! ಇಷ್ಟರ ಅರ್ಥ ತಿಳಿದುಕೊಂಡರೆ ಮತ್ತು ಸರಿಯಾಗಿ ಜೀವನದಲ್ಲಿ ಅಳವಡಿಸಿಕೊಂಡರೆ, ಬಾವಿಗೆ ಬಿದ್ದಾಗ ಹುಲ್ಲಿನ ಆಸರೆ ಸಿಕ್ಕರೂ ಸಾಕು ಎದ್ದು ಬರಬಹುದು. ಇಲ್ಲದಿದ್ದರೆ ಹಗ್ಗ ಸಿಕ್ಕರೂ ನೀವು ಎದ್ದುಬರಲಾರಿರಿ. ಸೋಲಿನ ಬಗ್ಗೆಯಾಗಲಿ, ಯಶಸ್ಸಿನ ಬಗ್ಗೆಯಾಗಲಿ ಕೆಲವೊಂದು ಸೂಚನೆಗಳು ಮೊದಲೇ ಸಿಗಲು ಪ್ರಾರಂಭಿಸುತ್ತವೆ. ಅವರನ್ನು ಅಧ್ಯಯನ ಮಾಡಿ, ನಿರ್ಲಕ್ಷ್ಯ ಮಾಡದೆ ನಿಮ್ಮ ಲಾಭನಷ್ಟಕ್ಕೆ ತಕ್ಕಂತೆ, ಸಾಮರ್ಥ್ಯಕ್ಕೆ ಅನುಗುಣವಾಗಿ ತಕ್ಕ ಬದಲಾವಣೆ ಮಾಡಿಕೊಳ್ಳಿ. ಎಲ್ಲ ಸಮಸ್ಯೆಗಳಿಗೆ ಉತ್ತರ ತಾಳ್ಮೆ. ಆದ್ದರಿಂದಲೇ ಹಿರಿಯರು ತಾಳಿದವನು ಬಾಳಿಯಾನು ಎಂಬ ಗಾದೆ ಹುಟ್ಟುಹಾಕಿದ್ದಾರೆ. ಇಂದಿನ ಜಮಾನಾದಲ್ಲಿ ತಾಳ್ಮೆಯೆಂಬುದು ಮರೀಚಿಕೆಯಂತಾಗಿದೆ. ಆದರೂ ಪ್ರಯತ್ನಿಸಿದರೆ ಮಾತ್ರ ಸಿಗುವಂಥ ಅನರ್ಘ್ಯ ರತ್ನವದು. ಅದನ್ನು ಯಾರೆಷ್ಟೇ ದುಡ್ಡು ಕೊಟ್ಟರೂ ಕಳೆದುಕೊಳ್ಳಬೇಡಿ.

ಕರ್ಕಾಟಕ

ಜೀವನ ಹಾಕಿಕೊಟ್ಟ ದಾರಿಯಲ್ಲಿ ಎಲ್ಲೆಲ್ಲೋ ಸಾಗುತ್ತಿರುತ್ತೇವೆ, ಗೊತ್ತಿರುವುದಿಲ್ಲ ಗುರಿಯಿರುವುದಿಲ್ಲ. ಕಡೆಗೆ, ಯಾವುದೋ ಗಮ್ಯ ತಲುಪಿದಾಗ, ಅಯ್ಯೋ ಇಲ್ಲಿ ನಾವು ಬರಬಾರದಿತ್ತಲ್ಲ ಎಂದು ಹಳಹಳಿಸಲು ಆರಂಭಿಸುತ್ತೇವೆ. ನಾವಾಗಿಯೇ ವಿಚಾರ ಮಾಡದೆ, ನಾವು ನಂಬಿಕೊಂಡವರ ಹಿಂದೆ ಸಾಗಿದಾಗ ಹೀಗಾಗುವುದು ಸಹಜ. ಅಷ್ಟರಲ್ಲಾಗಿಯೇ ಅವರು ನಮ್ಮನ್ನು ಮೂರ್ಖರನ್ನಾಗಿ ಮಾಡಿರುತ್ತಾರೆ. ಜೀವನದಲ್ಲಿ ಅನುಭವಿಸಿದ ಪ್ರತಿಯೊಂದು ಅವಮಾನಗಳನ್ನೂ ನೆನಪಿಟ್ಟುಕೊಳ್ಳಿ. ಹಗೆ ಸಾಧಿಸಬೇಕಂತಲ್ಲ. ಯಾರ್ಯಾರಿಗೆ ಏನೇನು ಮರ್ಯಾದೆ ಕೊಡಬೇಕೋ ಅಷ್ಟು ಮಾತ್ರ ಕೊಡಿ. ಇಲ್ಲದಿದ್ದರೆ ಮರ್ಯಾದೆ ಕೊಟ್ಟವರಿಗೇ ಮರ್ಯಾದೆ ಸಿಗುವುದಿಲ್ಲ. ಕಳೆದವಾರ ಘಟಿಸಿದ ಸಂಗತಿಗಳು ಮತ್ತೆ ಘಟಿಸುವ ಸಾಧ್ಯತೆಯಿದೆ. ಯಾವುದಕ್ಕೂ ಸಿದ್ಧರಾಗಿರಿ.

ಸಿಂಹ

ಸ್ಪೀಡ್ ಥ್ರಿಲ್ಸ್ ಬಟ್ ಕಿಲ್ಸ್ ಆಲ್ಸೋ. ಇದು ವಾಹನ ಸವಾರರಿಗೆ ಮಾತ್ರ ಅನ್ವಯವಾಗುವುದಿಲ್ಲ, ನಿಜ ಜೀವನದಲ್ಲಿ ಕೂಡ ಅಳವಡಿಸಿಕೊಳ್ಳಬಹುದಾದ ತತ್ತ್ವ. ಸಿಕ್ಕ ಯಶಸ್ಸನ್ನು ಜತನದಿಂದ ಕಾಯ್ದುಕೊಳ್ಳಿ, ಆ ಯಶಸ್ಸು ಬಿಟ್ಟ ಬೇರು ನೆಲದಾಳದಲ್ಲಿ ಇಳಿದು ಗಟ್ಟಿಯಾಗುವವರೆಗೆ ಮತ್ತೊಂದಕ್ಕೆ ಕೈಹಾಕಬೇಡಿ. ನಿಮ್ಮ ವೇಗವನ್ನು ಕಂಡು ಹಲುಬುವವರು ಅಪಘಾತವಾಗುವುದನ್ನು ನೋಡಿ ಆನಂದಿಸುವವರು ಬೇಕಾದಷ್ಟು ಜನರಿರುತ್ತಾರೆ. ಈ ಯಶಸ್ಸಿನಲ್ಲಿ ಭಾಗಿಯಾದವರನ್ನು ನೆನಪಿಸಿಕೊಳ್ಳಲು ಮರೆಯಬೇಡಿ. ಸಂತೋಷದ ಸಂಗತಿಗಳನ್ನು ಬಂಧುಬಾಂಧವರೊಂದಿಗೆ ಹೇಳಿ, ಸಿಹಿಕೊಟ್ಟು ಹಂಚಿಕೊಳ್ಳಿ. ಜೊತೆಗೆ, ನಿಮ್ಮಿಂದಾಗಿ ಹಣ ಕಳೆದುಕೊಂಡವರು ನಿಮ್ಮ ಬೆನ್ನು ಬೀಳಬಹುದು. ಅವರ ಬಗ್ಗೆಯೂ ಎಚ್ಚರವಿರಲಿ.

ಕನ್ಯಾ

ಏನೇ ಗುರುಬಲವಿರಲಿ, ಪ್ರಯತ್ನವಿರದಿದ್ದರೆ ಯಾವುದೂ ನಮಗೆ ದಕ್ಕುವುದಿಲ್ಲ. ಕೂತು ಉಣ್ಣುವವನಿಗೆ ಕುಡಿಕೆ ಹೊನ್ನು ಸಾಲದು ಎಂಬ ಗಾದೆ ಮಾತೂ ಇದೆ. ಇಂಥ ಹಲವಾರು ಜನರನ್ನು ನಾವು ದಿನನಿತ್ಯ ನೋಡುತ್ತಿರುತ್ತೇವೆ. ಹಾಗೆಯೆ, ಪ್ರತಿಫಲಾಪೇಕ್ಷೆ ಇಲ್ಲದೆ ದುಡಿಯುತ್ತಿರುವವರನ್ನೂ ನೋಡುತ್ತಿರುತ್ತೇವೆ. ಈ ಸಾಧಕರಿಂದ ನಾವು ಏಕೆ ಸ್ಫೂರ್ತಿ ಪಡೆಯಬಾರದು? ನಮ್ಮ ಸುತ್ತಲಿನವರೇ, ಪ್ರೀತಿ ತೋರಿಸುವ ಸೋಗು ಹಾಕಿಕೊಂಡವರೇ ಅಡ್ಡಗಾಲು ಹಾಕುತ್ತಿರುತ್ತಾರೆ. ಅಂಥವರ ಹುನ್ನಾರದಿಂದ ಉಪಾಯವಾಗಿ ತಪ್ಪಿಸಿಕೊಂಡು ಯಾರಿಗೂ ಅಪಾಯವಾಗದಂತೆ ನಿಮ್ಮ ಕೆಲಸದಲ್ಲಿ ತೊಡಗಿಕೊಳ್ಳಿ. ಏನೂ ಪ್ರಯತ್ನ ಮಾಡದೆ ದೇವರ ಮುಂದೆ ಮಂತ್ರ ಹೇಳುತ್ತ ಕುಳಿತರೆ ದೇವರು ವರ ಕೊಡುತ್ತಾನಾ? ಚಿಂತಿಸಿ.

ತುಲಾ

ಹಿಂದೆ ಮುಂದೆ ನೋಡದೆ, ವಿವೇಚನೆಯಿಲ್ಲದೆ ಮಾಡಿಕೊಂಡಿರುವ ಕೆಲವು ಬದಲಾವಣೆಗಳು ನಿಮ್ಮನ್ನು ಅನವಶ್ಯಕವಾದ ಸಂಕಷ್ಟದಲ್ಲಿ ಕೆಡವಬಲ್ಲವು. ಅದು ವೈಯಕ್ತಿಕ ಜೀವನದಲ್ಲೂ ಆಗಬಹುದು, ಉದ್ಯೋಗದಲ್ಲೂ ಆಗಬಹುದು. ಆದರೆ, ನೀವು ಲೆಕ್ಕಾಚಾರದ ರಿಸ್ಕ್ ತೆಗೆದುಕೊಂಡಿದ್ದರೆ ಫಲಾಫಲಗಳನ್ನು ಎದುರಿಸಲು ಸಿದ್ಧರಾಗಿ. ಫಲಗಳು ಧನಾತ್ಮಕವಾಗಿಯೂ ಆಗಿರಬಹುದು, ಋಣಾತ್ಮಕವಾಗಿಯೂ ಆಗಿರಬಹುದು. ಒಂದು ಮಾತು ನೆನಪಿನಲ್ಲಿಡಿ. ನೀವು ಕಲಿತಿರುವ ಹೆಚ್ಚುವರಿ ವಿದ್ಯೆ ಒಂದಿಲ್ಲೊಂದು ದಿನ ನಿಮ್ಮ ಸಂಕಷ್ಟ ಕಾಲದಲ್ಲಿ ಉಪಯೋಗಕ್ಕೆ ಬಂದೇ ಬರುತ್ತದೆ. ಯಾವುದಕ್ಕೂ ಸಣ್ಣಪುಟ್ಟ ಉಳಿತಾಯವನ್ನು ಮಾಡುತ್ತಲೇ ಇರಿ. ಹೂಡಿಕೆ ಮಾಡಬೇಕಾದರೆ ತಜ್ಞರಿಂದ ಸಲಹೆ ಪಡೆದು ಮುಂದುವರೆಯಿರಿ. ಅನಾರೋಗ್ಯಕ್ಕೆ ಸಂಬಂಧಿಸಿದಂತೆ ಚಿಂತೆಗಳಿದ್ದರೆ ಅವನ್ನು ಅಲ್ಲೇ ಬಿಟ್ಟುಬಿಡಿ.

ವೃಶ್ಚಿಕ

ದೇಹ ಬೆಳೆದಂತೆ ಬುದ್ಧಿ ಬೆಳೆಯುತ್ತಿರಬೇಕು, ಬುದ್ಧಿ ಅಭಿವೃದ್ಧಿಯಾಗುತ್ತಿದ್ದಂತೆ ಪ್ರಬುದ್ಧತೆ ತಾನಾಗಿಯೇ ಬರುತ್ತಿರಬೇಕು. ಇದಕ್ಕೆ ವಯಸ್ಸಿನ ಮಿತಿಯಿರುವುದಿಲ್ಲ. ಕೆಲವೊಂದು ಬಾರಿ ಚಿಕ್ಕವರೇ ಪ್ರಬುದ್ಧತೆಯಿಂದ ವರ್ತಿಸುತ್ತಿರುತ್ತಾರೆ. ದೊಡ್ಡವರ ಬುದ್ಧಿವಾದಗಳು ನಿಮಗೆ ದಾರಿದೀಪವಾಗಲಿ. ಗದರಿಕೆಯಲ್ಲೂ ಒಂದು ಪ್ರೀತಿಯಿರುತ್ತದೆ, ಪಾಠವಿರುತ್ತದೆ ಎಂಬುದು ನಿಮ್ಮ ಬಲಿತ ಬುದ್ಧಿಗೆ ಅರಿವಾದರೆ ಅಲ್ಲಿ ಯಾವ ಸಮಸ್ಯೆಯೂ ಇರುವುದಿಲ್ಲ. ದುರಾದೃಷ್ಟವೆಂದರೆ ಅದೇ ಸಾಧ್ಯವಾಗುತ್ತಿಲ್ಲ ಎಂಬುದು ಇತರರ ಅರಿವಿಗೆ ಬರುತ್ತಿರುತ್ತದೆ! ನಾವು ಕೇವಲ ನಮಗಾಗಿ ಬದುಕುವುದಲ್ಲ, ನಮ್ಮ ಸುತ್ತಲಿರುವವರಿಗಾಗಿಯೂ ಬದುಕುತ್ತಿರುತ್ತೇವೆ, ಬದುಕಬೇಕು. ಏರಿಳಿತವಿದ್ದರೆ ತೊಂದರೆಯಿಲ್ಲ, ಸ್ಥಿತಪ್ರಜ್ಞತೆ ಮಾತ್ರ ಕಳೆದುಕೊಂಡಿರಬಾರದು.

ಧನುಸ್ಸು

ಕನಸುಗಳನ್ನು ಕಟ್ಟಿಕೊಳ್ಳುವುದು ಒಳಿತು. ಆ ಕನಸುಗಳ ಬೆನ್ನತ್ತಿ ನಾವು ಸದಾ ಸಾಗುತ್ತಲೇ ಇರಬೇಕು. ಮನದಲ್ಲಿ ಬರೀ ನೆಗೆಟಿವಿಟಿಯನ್ನೇ ತುಂಬಿಕೊಂಡಿದ್ದರೆ ಆ ಕನಸನ್ನು ಕಾಣಲೂ ಸಾಧ್ಯವಿಲ್ಲ, ನನಸು ಮಾಡಿಕೊಳ್ಳುವುದಂತೂ ದೂರವೇ ಉಳಿಯಿತು. ಋಣಾತ್ಮಕ ಚಿಂತನೆಯನ್ನೇ ನಾವು ಧೇನಿಸುತ್ತಿದ್ದರೆ ನಮ್ಮ ವಿಚಾರಧಾರೆಗಳೇ ಕೆಟ್ಟ ಕನಸುಗಳಾಗಿ ಕಾಡಲು ಆರಂಭಿಸುತ್ತವೆ. ಜೀವನ ಹೀಗೇ ಇರುತ್ತದೆ ಎಂದು ಯಾರೂ ಊಹಿಸಲು ಸಾಧ್ಯವಿಲ್ಲ. ಪ್ರಾಕ್ಟಿಕಲ್ ಆಗಿ ವಿಚಾರ ಮಾಡಿದರೆ, ನಮ್ಮೆದುರಿಗೆ ಏನೇ ಕಷ್ಟಗಳು ಬಂದು ನಿಂತರೂ ಎದುರಿಸಲೇಬೇಕು. ಕಷ್ಟಗಳು ಬಂದಾಗ ನೋಡಿಕೊಳ್ಳೋಣವೆಂದು ಸುಮ್ಮನಿರುವುದು ಸಮಸ್ಯೆಗಳಿಗೆ ನಾವಾಗಿಯೇ ಆಹ್ವಾನ ನೀಡಿದಂತೆ. ಏನೇ ಸಮಸ್ಯೆಗಳು ಬಂದರೂ ನಗುನಗುತ್ತಲೇ ಇರಿ.

ಮಕರ

ಇದ್ದಕ್ಕಿದ್ದಂತೆ ಕೈಬರಿದಾಗುತ್ತದೆ, ಜೇಬಿಗೆ ತೂತು ಬೀಳುತ್ತದೆ, ಬ್ಯಾಂಕ್ ಬ್ಯಾಲನ್ಸ್ ಶೂನ್ಯವಾಗುತ್ತದೆ, ಇತರರ ಮುಂದೆ ಕೈಯೊಡ್ಡುವಂಥ ಪರಿಸ್ಥಿತಿ ಎದುರಾಗುತ್ತದೆ. ಇವೆಲ್ಲವೂ ನಿಮ್ಮ ವ್ಯಕ್ತಿತ್ವ, ನಿಮ್ಮ ಆಂತರಿಕ ಶಕ್ತಿಯನ್ನು ಒರೆಗೆ ಹಚ್ಚುವಂಥ ಸಂಗತಿಗಳೇ. ನಿಮ್ಮ ಸಹಾಯಕ್ಕೆ ಹತ್ತಿರದವರು ಧಾವಿಸಬಹುದು, ಸದ್ಯಕ್ಕೆ ಇಟ್ಕೊ ಅಂತ ಹೇಳಬಹುದು. ಆದರೆ, ನಯವಾಗಿಯೇ ತಿರಸ್ಕರಿಸಿ. ಆತ್ಮಾಭಿಮಾನದ ಮುಂದೆ ಈ ಅಡೆತಡೆಗಳೆಲ್ಲ ಕ್ಷಣಿಕ. ಕೆಟ್ಟ ಕನಸಿನಂತೆ ಎಲ್ಲವೂ ಮಾಯವಾಗುತ್ತವೆ. ಕಾದುನೋಡುವ ತಂತ್ರ ಅನುಸರಿಸಿದರೂ ಸರಿಮಾರ್ಗದಲ್ಲಿ ನಿಮ್ಮ ಪ್ರಯತ್ನಗಳು ನಿರಂತರವಾಗಿರಲಿ.

ಕುಂಭ

ಪ್ರತಿಯೊಂದು ತಪ್ಪಿಗೂ ಬೇರೊಬ್ಬರ ಮೇಲೆ ಗೂಬೆ ಕೂರಿಸುವ ನಿಮ್ಮ ಜಾಯಮಾನವನ್ನು ಬದಲಿಸಿಕೊಳ್ಳಿ. ಏನೇ ತಪ್ಪು ನಡೆದಿರಲಿ ಅದರಲ್ಲಿ ಒಂದು ಹಿಡಿಯಷ್ಟಾದರೂ ನಿಮ್ಮ ಯೋಗದಾನ ಇದ್ದೇ ಇರುತ್ತದೆ. ಹಿಂದೆ ಸಾಧಿಸಿದ್ದರ ಬಗ್ಗೆ ಲೆಕ್ಕ ಹಾಕಿ, ಮುಂದೆ ಆಗಬೇಕಾದುದನ್ನು ಪಟ್ಟಿ ಮಾಡಿಕೊಳ್ಳಿ. ಏಕೆಂದರೆ, ಪ್ರತಿಯೊಂದಕ್ಕೂ ಲೆಕ್ಕ ನೀಡಬೇಕಾದಂಥ ಪರಿಸ್ಥಿತಿ ಬಂದರೂ ಬರಬಹುದು. ಸಾಧ್ಯವಾದರೆ ತೀರ್ಥಯಾತ್ರೆಯನ್ನು ಕೈಗೊಂಡು ಅಂದುಕೊಂಡಿದ್ದ ಹರಕೆಯನ್ನು ತೀರಿಸಲು ಪ್ರಯತ್ನಿಸಿ.

ಮೀನ

ವ್ಯವಸ್ಥೆಯೇ ಅವ್ಯವಸ್ಥೆಯಂತೆ ನಾವು ಕಾಣಲು ಹೋದರೆ ಕಂಡದ್ದೆಲ್ಲವೂ ದುರವಸ್ಥೆಯಂತೆ ಭಾಸವಾಗುತ್ತದೆ. ಜಗತ್ತು ಎಂದಿಗೂ ನಾವು ಕಂಡಂತೆ ಇರುತ್ತದೆಯೇ ಹೊರತು ನಾವು ಅಂದುಕೊಂಡಂತೆ ಇರುವುದಿಲ್ಲ. ಇವೆರಡರ ನಡುವಿನ ವ್ಯತ್ಯಾಸ ತಿಳಿದುಕೊಂಡರೆ, ಕದಡಿದ ನೀರು ಕೂಡ ತಿಳಿಯಾಗಿ ಕಾಣಲು ಆರಂಭಿಸುತ್ತದೆ. ಮೊದಲಿಗೆ ನಿಮ್ಮ ಜವಾಬ್ದಾರಿಗಳೇನು ಎಂಬುದನ್ನು ಅರಿತುಕೊಳ್ಳಿ. ಚಿಕ್ಕವರು ಚಿಕ್ಕವರಂತೆಯೇ ವರ್ತಿಸಬೇಕು. ವಯಸ್ಸು ಹೆಚ್ಚಾದಂತೆಲ್ಲ ನಮಗಿಂತ ದೊಡ್ಡವರಿಗೆ ಅವಮಾನವಾಗುವಂತೆ ನಡೆದುಕೊಳ್ಳಬೇಕಂತೇನೂ ಇಲ್ಲ. ಮನಸ್ಸು ಪರಿಪಕ್ವವಾದಂತೆ ದುಗುಡದ ಗೆರೆಗಳು ಮಾಯವಾಗುತ್ತ ಸಾಗುತ್ತವೆ.

Have a great day!
Read more...

English Summary

The calendars specially designed by astrologer Pandit Anuj K. Shukla shows days when the Moon, Sun, and planets favour particular zodiac sign. Astro Calendar for Aries, Taurus, Gemini, Cancer, Leo, Virgo, Libra, Scorpio, Sagittarius, Capricorn, Aquarius and Pisces.