ಫೆಬ್ರವರಿ 2019 - ಕ್ಯಾಲೆಂಡರ್ ಮೇಲೆ ತಿಂಗಳ ರಾಶಿ ಭವಿಷ್ಯ


ಜ್ಯೋತಿಷ್ಯ ಕ್ಯಾಲೆಂಡರನ್ನು ಖ್ಯಾತ ಜ್ಯೋತಿಷಿ ಪಂಡಿತ ಅನುಜ್ ಕೆ. ಶುಕ್ಲಾ ಅವರುಫೆಬ್ರವರಿ2019ರ ಪಂಚಾಂಗದ ಆಧಾರದ ಮೇಲೆ ಆಯಾ ರಾಶಿಗೆ ಅನುಗುಣವಾಗಿ ರೂಪಿಸಿದ್ದಾರೆ. ನಿಮ್ಮ ರಾಶಿಗೆ ತಕ್ಕಂತೆ ಅಂದಿನ ದಿನ ನಿಮ್ಮ ಜೀವನದಲ್ಲಿ ಹೇಗಿರುತ್ತದೆ ಎಂಬುದನ್ನು ತಿಳಿದುಕೊಳ್ಳಿ. ಇಂದು ಮಾತ್ರವಲ್ಲ, ನಾಳೆ, ನಾಡಿದ್ದು ಅಥವಾ ಮುಂದಿನ ದಿನ ಹೇಗಿರುತ್ತದೆಂದು ಕೂಡ ಈ ಕ್ಯಾಲೆಂಡರ್ ಮುಖಾಂತರ ತಿಳಿಯಬಹುದು.

ವಾರ ಭವಿಷ್ಯ ಅಥವಾ ತಿಂಗಳ ಭವಿಷ್ಯ ಒಂದು ಬಾರಿ ನೋಡಿ ಮರೆತುಬಿಟ್ಟಿರುತ್ತೇವೆ. ನಾವು ಅವುಗಳನ್ನು ಮರೆತರೂ ಗ್ರಹ, ನಕ್ಷತ್ರ ಮತ್ತು ಕಾಲಚಕ್ರಗಳನ್ನು ನಮ್ಮನ್ನು ಮರೆಯುವುದಿಲ್ಲ. ಭಾರತದ ಪ್ರಾಚೀನ ಜ್ಯೋತಿಷ್ಯಶಾಸ್ತ್ರ ನಮ್ಮ ಜೀವನದೊಂದಿಗೆ ಯಾವತ್ತೂ ಕೂಡಿಕೊಂಡಿರುತ್ತದೆ. ನಿಮ್ಮ ಜೀವನವನ್ನು ಸರಳಗೊಳಿಸುವ ಉದ್ದೇಶದಿಂದ ಜ್ಯೋತಿಷ್ಯ ಕ್ಯಾಲೆಂಡರನ್ನು ಇಲ್ಲಿ ಸಾದರಪಡಿಸುತ್ತಿದ್ದೇವೆ. ನಮ್ಮ ಭವಿಷ್ಯಫಲ ಏನಿದೆ ಎಂದು ಇಲ್ಲಿ ಖುದ್ದಾಗಿ ನಾವೇ ನೋಡಿಕೊಳ್ಳಬಹುದು.

ಚಂದ್ರನ ಚಲನೆಯನ್ನು ಆಧಿರಿಸಿ ರೂಪಿಸಲಾಗಿರುವ ಈ ಕ್ಯಾಲೆಂಡರನ್ನು ನೋಡಿ ಆಯಾ ದಿನ ಪ್ರೇಮ ಪರಿಣಯ ಎಂದು ಹೇಗೆ, ಮನೆ ಕೊಳ್ಳಲು ಯಾವ ದಿನ ಸೂಕ್ತ, ಎಂದು ಧನ ಪ್ರಾಪ್ತಿಯಾಗುತ್ತದೆ, ಯಾವ ದಿನ ಖಿನ್ನತೆ ಆವರಿಸುತ್ತದೆ, ಎಂದು ಸಂತಸದ ಬುಗ್ಗೆ ಉಕ್ಕುತ್ತದೆ ಮುಂತಾದ ವಿಷಯಗಳ ಬಗ್ಗೆ ತಿಳಿಯಬಹುದು. ಎಲ್ಲ ಸಂಗತಿಗಳನ್ನು ಪಂಡಿತರು ವಿವಿಧ ಚಿಹ್ನೆಗಳ ಮುಖಾಂತರ ಅತ್ಯಂತರ ಸರಳವಾಗಿ ತಿಳಿಸಿಕೊಡುತ್ತಾರೆ.

ಯಾವ ಚಿಹ್ನೆ ಏನು ಹೇಳುತ್ತದೆ?

ಹೃದಯ - ಪ್ರೀತಿ ಪ್ರೇಮ ಪ್ರಣಯಕ್ಕೆ ಆ ದಿನ ಅತ್ಯಂತ ಸುದಿನವಾಗಿರುತ್ತದೆ.
ಮಿಂಚು - ಆ ದಿನ ನಿಮ್ಮ ಜೀವನದಲ್ಲಿ ಆಪತ್ತು ಬರಬಹುದು.
ಮನೆ - ಮನೆ ಅಥವಾ ಅಂಗಡಿಯನ್ನು ಆ ದಿನ ಕೊಳ್ಳಬಹುದು ಅಥವಾ ಮಾರಬಹುದು.
ಮುಗುಳ್ನಗೆ - ಆ ದಿನ ನಿಮ್ಮ ಜೀವನದಲ್ಲಿ ಸಂತಸ ಬರಬಹುದು.
ಚಿಂತೆ - ಯಾವುದೋ ವಿಷಯದಲ್ಲಿ ಚಿಂತೆ ಅಥವಾ ಖಿನ್ನತೆ ಆವರಿಸಬಹುದು.
ನಕ್ಷತ್ರ - ಆ ದಿನ ಜೀವನದಲ್ಲಿ ಸೌಭಾಗ್ಯದ ದಿನವಾಗಿರುತ್ತದೆ.
ನಾಣ್ಯ - ನಾಣ್ಯ ಇದ್ದ ದಿನ ಧನ ಲಾಭ ಆಗುವ ಸಂಭವನೀಯತೆ ಇರುತ್ತದೆ.

ಪ್ರತಿದಿನ ಬಿಡುವು ಸಿಕ್ಕಾಗಲೆಲ್ಲ ಈ ಕ್ಯಾಲೆಂಡರನ್ನು ನೋಡಬೇಕೆಂದಿದ್ದರೆ ಈ ಪುಟವನ್ನು ಬುಕ್‌ಮಾರ್ಕ್ ಮಾಡಿಟ್ಟುಕೊಳ್ಳಿ.

ಮೇಷ : ಕಲಿಕೆಯನ್ನು ಎಂದೂ ನಿಲ್ಲಿಸಬಾರದು

ನಾವು ಕಲಿಯುವ ಸದ್ಗುಣಗಳು, ಸನ್ನಡತೆಗಳು, ಸದ್ಭಾವನೆಗಳನ್ನು ಹಣ ಗಳಿಸುವ ದೃಷ್ಟಿಯಿಂದ ಎಂದೂ ನೋಡಲು ಸಾಧ್ಯವಿಲ್ಲ. ಇವು ನಮ್ಮ ವ್ಯಕ್ತಿತ್ವವನ್ನು ಬೆಳೆಸಲು, ಮುಂದೆ ಬಹುಶಃ ಲಾಭದಾಯಕ ಮಾರ್ಗದಲ್ಲಿ ಸಾಗಲು ಸಹಾಯ ಮಾಡುತ್ತವೆ. ಹಾಗೆಯೆ, ಕಲಿಕೆಯನ್ನು ಕೂಡ ಎಂದೂ ನಿಲ್ಲಿಸಬಾರದು. ಹೊಸಹೊಸ ನೈಪುಣ್ಯತೆ ಕಲಿಯುತ್ತ, ಕಾಲಕ್ಕೆ ತಕ್ಕಂತೆ ಅಪ್ಡೇಟ್ ಆಗುತ್ತಿದ್ದರೆ ತಪ್ಪೇನು? ಇವನ್ನು ದುಡ್ಡು ಮಾಡುವ ದೃಷ್ಟಿಯಿಂದಲೇ ಕಲಿಯಬೇಕಂತೇನಿಲ್ಲ. ಸ್ವಂತ ಕಾಲ ಮೇಲೆ ನಿಲ್ಲಲು, ಹಣ ಉಳಿತಾಯದ ಮಾರ್ಗ ತೋರಿದರೂ ನಮ್ಮ ಪ್ರಯತ್ನ ಸಾರ್ಥಕವಾದಂತೆ. ಬದುಕು ನಮಗೆ ಎಂತೆಂಥ ತಿರುವುಗಳನ್ನು ನೀಡುತ್ತದೋ, ಯಾವ ದಾರಿಯಲ್ಲಿ ನಮ್ಮನ್ನು ಕೈಹಿಡಿದು ನಡೆಸುತ್ತದೋ ಬಲ್ಲವರಾರು? ಎಂದೋ ಕಲಿತ ವಿದ್ಯೆ ಇಂದು ಪ್ರಯೋಜನಕ್ಕೆ ಬಂದರೂ ಅಚ್ಚರಿಯಿಲ್ಲ. ಹಾಗಿದ್ದ ಮೇಲೆ ಕಲಿಯಲು, ಕಲಿಸಲು ಹಿಂದೇಟೇಕೆ?

ವೃಷಭ : ಅಂದುಕೊಂಡ ಕೆಲಸ ಮಾಡಿಯೇ ತೀರುತ್ತೇನೆ

ಬಿರುಗಾಳಿಯೇ ಬೀಸಲಿ, ಏನೇ ಅಡೆತಡೆಗಳು ಬರಲಿ, ಎಷ್ಟೇ ಅವಮಾನಗಳು ಆಗಲಿ, ನಾನಿರುವುದೇ ಹೀಗೆ, ನಾನಂದುಕೊಂಡ ಕೆಲಸ ಮಾಡಿಯೇ ತೀರುತ್ತೇನೆ, ಲೋಕದ ನಿಂದನೆಗೆ ಕಿವಿಗೊಡುವುದಿಲ್ಲ ಎಂಬ ನಿಮ್ಮ ಮನೋಭಾವ ನಿಜಕ್ಕೂ ಮೆಚ್ಚತಕ್ಕದ್ದು ಮತ್ತು ಇತರರನ್ನೂ ಪ್ರೇರೇಪಿಸುತ್ತದೆ. ಆದರೆ, ನಿಮ್ಮ ಉತ್ಸಾಹಕ್ಕೆ ತಣ್ಣೀರೆರಚಲು, ನಿಮಗೆ ಸಿಗಬೇಕಾದ ಶ್ರೇಯಸ್ಸನ್ನು ಕಸಿದುಕೊಳ್ಳಲು ಇತರರು, ನಿಮ್ಮ ಬಂಧುಗಳೇ ಕಾದಿರುತ್ತಾರೆ. ಅಂಥವರ ಬಗ್ಗೆ ಎಚ್ಚರದಿಂದಿರಿ. ಅಂಥ ಹಿತಶತ್ರುಗಳು ಆಡುವುದು ಒಂದು ಮಾಡುವುದು ಮತ್ತೊಂದು. ನೀವು ನಿಮ್ಮ ಬಗ್ಗೆ ಮಾತ್ರವಲ್ಲ, ನಿಮ್ಮ ಜೊತೆ ಇರುವವರ ಕಾಳಜಿಯನ್ನೂ ಮಾಡಬೇಕಾಗುತ್ತದೆ.

ಮಿಥುನ : ನಿಮ್ಮ ಪಾಪವನ್ನೆಲ್ಲ ತೊಳೆದುಕೊಳ್ಳಿ

ಕನ್ನಡಿಯೆದಿರು ನಿಂತಾಗ ನೀವ್ಯಾರು, ನಿಮ್ಮ ವ್ಯಕ್ತಿತ್ವವೇನು ಎಂಬುದು ನಿಮಗೂ ಗೊತ್ತಾಗಲಿಕ್ಕಿಲ್ಲ. ಅದನ್ನು ತಿಳಿಯಬೇಕಿದ್ದರೆ ನಿಮ್ಮ ಆಂತರ್ಯದ ಕನ್ನಡಿಯ ಮುಂದೆ ನಿಂತುಕೊಳ್ಳಿ. ಆತ್ಮವಿಮರ್ಶೆಗೆ ಇದು ಸಕಾಲ. ಪರಿಸ್ಥಿತಿ ಎಂಥ ಸಂದರ್ಭವನ್ನು ತಂದಿಡುತ್ತದೆಂದರೆ, ನಿಮ್ಮಲ್ಲೇ ಗೊಂದಲ ಸೃಷ್ಟಿಸಿಬಿಡುತ್ತದೆ, ತಪ್ಪು ನಿರ್ಣಯ ತೆಗೆದುಕೊಳ್ಳುವಂತೆ ಪ್ರೇರೇಪಿಸುತ್ತದೆ. ಆದರೆ, ನೆನಪಿಡಿ ಪರಿಶುದ್ಧವಾದ ನದಿಯಲ್ಲಿ ನಿಮ್ಮ ಮಲಿನವಾದ ದೇಹ ತೊಳೆದುಕೊಂಡು ಬಂದರೆ ನದಿಯೇನು ಅಶುದ್ಧವಾಗುವುದಿಲ್ಲ. ಆ ಜ್ಞಾನವೆಂಬ ನದಿಯಲ್ಲಿ ಧ್ಯಾನಾಸಕ್ತರಾಗಿ ನಿಮ್ಮ ಪಾಪವನ್ನೆಲ್ಲ ತೊಳೆದುಕೊಳ್ಳಿ. ಇನ್ನಾವ ಚಿಂತೆಯೂ ಬೇಡ.

ಕರ್ಕಾಟಕ : ದೇಹಕ್ಕೆ ಆಯಾಸವಾದರೆ ಸುಧಾರಿಸಿಕೊಳ್ಳಬಹುದು

ಮನಸ್ಸಿಲ್ಲದಿದ್ದರೂ, ನಮ್ಮ ಕೈಲಾಗದಿದ್ದರೂ, ಮಾಡಲು ಅಸಾಧ್ಯವೆನಿಸಿದರೂ ನಮ್ಮ ಸುತ್ತಲಿನವರಿಗಾಗಿ ಮತ್ತು ನಮಗಾಗಿ ಕೆಲವೊಂದು ಕೆಲಸವನ್ನು ಮಾಡಲೇಬೇಕಾಗುತ್ತದೆ. ಶ್ರದ್ಧೆಯಿಂದ ಮಾಡಿದ ಯಾವುದೇ ಕೆಲಸವೂ ವ್ಯರ್ಥವಾಗುವುದಿಲ್ಲ ಮತ್ತು ಪ್ರತಿಯೊಂದರಲ್ಲಿಯೂ ಅನುಕೂಲತೆ ಇದೆ ಎಂಬುದು ನಿಮಗೆ ಕ್ರಮೇಣ ಅರ್ಥವಾಗುತ್ತದೆ. ಆ ಕೆಲಸ ಹೇಗೆ ಮಾಡಬೇಕು, ಯಾವ ವೇಗದಲ್ಲಿ ಮಾಡಬೇಕು ಎಂಬ ನಿರ್ಧಾರ ಮಾತ್ರ ನಿಮ್ಮದು. ಪ್ರೀತಿಪಾತ್ರರು ಎಷ್ಟೇ ಕರೆದರೂ ಜಪ್ಪಯ್ಯ ಅಂದ್ರೂ ದೂರ ಪ್ರಯಾಣ ಬೇಡ. ದೇಹಕ್ಕೆ ಆಯಾಸವಾದರೆ ಸುಧಾರಿಸಿಕೊಳ್ಳಬಹುದು, ಮನಸ್ಸಿಗೆ ಆಯಾಸವಾದರೆ ಬಲುಕಷ್ಟ. ಏನೇ ಆಗಲಿ, ನೀವು ಹೊಂಟ ದಾರಿ ಸರಿಯಾಗಿದೆ ಎಂದು ಮುಂದೆ ಹೆಜ್ಜೆ ಹಾಕಿ. ಆರೋಗ್ಯಕ್ಕಿಂತ ಹೆಚ್ಚಿನದು ಮತ್ತೇನೂ ಇಲ್ಲ.

ಸಿಂಹ : ಕಾಲ ಈಗಲೂ ಮಿಂಚಿಲ್ಲ

ಉಚಿತವಾಗಿ ಸಿಗುವುದು ಈ ಜಗತ್ತಿನಲ್ಲಿ ಯಾವುದೂ ಇಲ್ಲ. ಪ್ರೀತಿಯೂ ಇಲ್ಲ. ಹೆಂಡತಿ ಕೂಡ ಸುಂಕವಿಲ್ಲದೆ ಮುತ್ತು ಕೊಡಲಾರಳು. ಪ್ರತಿಯೊಂದಕ್ಕೂ ಬೆಲೆ ತೆರಲೇಬೇಕಾಗುತ್ತದೆ. ಪ್ರತಿಯೊಂದನ್ನೂ ಕಷ್ಟಪಟ್ಟೇ ಗಳಿಸಬೇಕಾಗುತ್ತದೆ. ಇಷ್ಟು ನಿಮಗೆ ಅರಿವಾದರೆ ಒಂದೊಂದು ಪೈಸೆಯ ಮಹತ್ವ ನಿಮಗೆ ತಿಳಿಯುತ್ತಾ ಹೋಗುತ್ತದೆ. ಹಿಂದೆ ಇದ್ದಾಗ ದುಂದುವೆಚ್ಚ ಮಾಡಿದ ಪಶ್ಚಾತ್ತಾಪ ನಿಮಗೀಗ ಆಗುತ್ತದೆ. ಆದರೆ, ಕಾಲ ಈಗಲೂ ಮಿಂಚಿಲ್ಲ. ವ್ಯವಸ್ಥಿತಿ ಯೋಜನೆ ಮತ್ತು ಪ್ರಾಮಾಣಿಕ ಪ್ರಯತ್ನದಿಂದ ಎಲ್ಲವನ್ನೂ ಸರಿದಾರಿಗೆ ತರಲು ಸಾಧ್ಯ. ಕಾಲವೆಂಬುದು ಯಾರ ಅಡಿಯಾಳೂ ಅಲ್ಲ. ಅದು ತನಗೆ ಬೇಕಾದ ರೀತಿಯಲ್ಲಿ ಸಾಗುತ್ತಿರುತ್ತದೆ.

ಕನ್ಯಾ : ಈ ಜೀವನವೇ ಒಂದು ಪ್ರಯೋಗಶಾಲೆ

ಪರೀಕ್ಷೆಗೆ, ಪ್ರಯೋಗಕ್ಕೆ ಸದಾ ನಿಮ್ಮನ್ನು ಸಿದ್ಧ ಮಾಡಿಕೊಳ್ಳುತ್ತಿರಿ. ಈ ಜೀವನವೇ ಒಂದು ಪ್ರಯೋಗಶಾಲೆ. ಇಲ್ಲಿ ಪ್ರತಿಯೊಂದು ಹೆಜ್ಜೆಯೂ ನಮ್ಮನ್ನು ನಾವು ಸಾಬೀತುಪಡಿಸುತ್ತಲೇ ಇರಬೇಕಾಗುತ್ತದೆ. ಸ್ನೇಹವಿರಲಿ, ಸಂಬಂಧವಿರಲಿ, ವೃತ್ತಿ ಇರಲಿ, ಪ್ರವೃತ್ತಿ ಇರಲಿ, ನಮ್ಮ ಸಾಮರ್ಥ್ಯವನ್ನು ಬೇಡುತ್ತಿರುತ್ತದೆ. ಕೆಲಸಕ್ಕೆ ಬಾರದ ಕವನ ಬರೆಯಲು ಕೂಡ ಕವಿ ತಲೆ ಉಪಯೋಗಿಸಬೇಕಾಗುತ್ತದೆ. ಈ ಹೋರಾಟದಲ್ಲಿ ಜಯ ಸಿಗಬೇಕಾದರೆ ಕತ್ತಿಯನ್ನು ಆಗಾಗ ಮಸಿಯುತ್ತಿರಬೇಕಾಗುತ್ತದೆ. ಆದರೆ, ಚಿಂತೆಬಿಡಿ ಪ್ರೀತಿಪ್ರೇಮ, ದುಡ್ಡಿಗೆ ಕೊರತೆಯೇನೂ ಇರುವುದಿಲ್ಲ. ಇರುವ ಸ್ವಲ್ಪ ಅಹಂಕಾರವನ್ನು ಬಿಟ್ಟರೆ ನಿಮ್ಮನ್ನು ಹಿಡಿಯುವವರು ಯಾರೂ ಇಲ್ಲ.

ತುಲಾ : ತಾಳ್ಮೆಯ ಸಾಕಾರಮೂರ್ತಿಯಾಗ್ತೀರೋ

ತಾಳ್ಮೆ ಮತ್ತು ಕೋಪದ ನಡುವೆ ಸಣ್ಣ ಗೆರೆ ಇದೆ. ನೀವು ದೂರ್ವಾಸ ಮುನಿಗಳಾಗ್ತೀರೋ, ನಿಮ್ಮ ವ್ಯಕ್ತಿತ್ವಕ್ಕೆ ತದ್ವಿರುದ್ಧವಾಗಿ ತಾಳ್ಮೆಯ ಸಾಕಾರಮೂರ್ತಿಯಾಗ್ತೀರೋ ನಿರ್ಧರಿಸಿ. ಮೇಲ್ನೋಟಕ್ಕೆ ನಿಮಗೆ ಸೋಲಾದಂತೆ ಕಂಡುಬರಬಹುದು. ಆದರೆ, ತಾಳ್ಮೆ ಕಳೆದುಕೊಳ್ಳದಿದ್ದರೆ ಅಂತಿಮ ಗೆಲುವು ನಿಮ್ಮದೆ. ಕೋಪವನ್ನು ಉದ್ರೇಕಿಸುವಂಥ ವರ್ತನೆಯನ್ನೂ ಕೆಲವರು ತೋರಬಹುದು. ಇದಕ್ಕೆಲ್ಲ ನಿರ್ಲಕ್ಷ್ಯವೇ ಸರಿಯಾದ ಮಾರ್ಗ. ಅಲ್ಲದೆ, ನೀವು ಯಾರನ್ನೂ ದ್ವೇಷಿಸುವುದಿಲ್ಲ, ನಿಮ್ಮ ವ್ಯಕ್ತಿತ್ವವೇ ಬೇರೆ ಎಂದು ತೋರಿಸಲು ನಿಮಗೆ ನೀವೇ ಒಡ್ಡಿಕೊಳ್ಳುತ್ತಿರುವ ಅಗ್ನಿಪರೀಕ್ಷೆಯೂ ಹೌದು. ಗೆಲ್ಲುವುದಕ್ಕೆ ಮೂರೇ ಮೂರು ಗೇಣು ಇರುವಾಗ ಸೋಲಿನ ಅಧೀನರೇಕೆ ಆಗುತ್ತೀರಿ!

ವೃಶ್ಚಿಕ : ಮಕ್ಕಳೊಂದಿಗೆ ಮಕ್ಕಳಾಗಿರಿ

ಸೋಲು, ಆತ್ಮಾಭಿಮಾನಕ್ಕೆ ಪೆಟ್ಟು, ಗೆಲುವಿನ ಮರೀಚಿಕೆ, ಉದ್ಧಟತನ ನಿಮ್ಮನ್ನು ಪಾತಾಳಕ್ಕೆ ತಳ್ಳುತ್ತಲೇ ಇರುತ್ತವೆ. ಬಹುದೊಡ್ಡದಾದ ಇವನ್ನೆಲ್ಲವನ್ನೂ ಜಯಿಸುವ ಭರದಲ್ಲಿ ನೀವು ಸಣ್ಣಸಣ್ಣ ಸಂತೋಷಗಳನ್ನು ಕಳೆದುಕೊಳ್ಳುತ್ತೀರಿ. ಮಕ್ಕಳೊಂದಿಗೆ ಮಕ್ಕಳಾಗಿರಿ. ಕೆಲವರು ನಿಮ್ಮ ಮಾತು ಕೇಳಲಿಲ್ಲವೆಂದರೆ ಅಥವಾ ನೀವು ಕೆಲವರ ಮಾತಿಗೆ ಕಿವಿಯಾದರೆ ನಿಮ್ಮ ಆತ್ಮಾಭಿಮಾನಕ್ಕೆ ಪೆಟ್ಟು ಬೀಳುವುದಿಲ್ಲ. ನೀವು ಎಷ್ಟೇ ಚಿಕ್ಕವರಾದರೂ ದೊಡ್ಡವರಾಗುತ್ತೀರಿ. ಮಕ್ಕಳಿಗೆ ಅಗಾಧ ನೆನಪಿನ ಶಕ್ತಿ ಇದ್ದರೂ ಕೆಟ್ಟ ಸಂಗತಿಗಳು ನೆನಪಿನಲ್ಲಿರುವುದಿಲ್ಲ. ನೀವೂ ಮಗುವಾಗಿರಿ. ಮನಸ್ಸನ್ನು ಕಲ್ಮಶಗೊಳ್ಳಲು ಅವಕಾಶ ಮಾಡಿಕೊಡಬೇಡಿ. ಇನ್ನೂ ದೊಡ್ಡದನ್ನು ಪಡೆಯುವ ಆತ್ಮಶಕ್ತಿ ನಿಮ್ಮಲ್ಲಿದೆ. ಕ್ಷಣಿಕ ಕೋಪಕ್ಕೆ ಅದನ್ನು ಭಸ್ಮ ಮಾಡಬೇಡಿ.

ಧನುಸ್ಸು : ಸಲ್ಲದ ನುಡಿಗಳಿಗೆ ಕಿವಿಗೊಡಬೇಡಿ

ಬಿಗ್ ಬಾಸ್ ಮನೆಯಲ್ಲಿದ್ದಂತೆ ನಿಮ್ಮ ಮೇಲೆ ಸಾವಿರ ಕಣ್ಣುಗಳು ನೆಟ್ಟಿರುತ್ತವೆ. ನಿಮ್ಮ ನಡವಳಿಕೆ, ಮಾತುಗಳು, ಕಾರ್ಯವೈಖರಿ, ವೃತ್ತಿಪರತೆ, ಮಾನವೀಯತೆಯೂ ಪ್ರತಿಯೊಂದನ್ನೂ ಮೇಲಿನ ಕಣ್ಣುಗಳು ತದೇಕಚಿತ್ತದಿಂದ ಗಮನಿಸುತ್ತಿರುತ್ತವೆ. ತಪ್ಪುಗಳಿಗೆ ಅಪ್ಪಿತಪ್ಪಿಯೂ ಅವಕಾಶ ಮಾಡಿಕೊಡಬೇಡಿ. ಸಣ್ಣ ಮಿಸ್ಟೇಕ್ ಕೂಡ ನಿಮ್ಮ ನಡೆಯ ದಿಕ್ಕನ್ನೇ ಬದಲಿಸಬಹುದು. ನಿಮ್ಮ ಕೆಲಸವನ್ನು ಇಷ್ಟಪಡಬೇಕಿದ್ದರೆ ನೀವು ಸಾಕಷ್ಟು ಸಿದ್ಧತೆ ಮಾಡಿಕೊಳ್ಳಬೇಕಾಗುತ್ತದೆ. ಸಲ್ಲದ ನುಡಿಗಳಿಗೆ ಕಿವಿಗೊಡಬೇಡಿ. ಮನಸ್ಸನ್ನು ಕದಡಿದ ನೀರನ್ನಾಗಿಯೂ ಮಾಡಿಕೊಳ್ಳಬೇಡಿ. ಆತ್ಮಸಾಕ್ಷಿ ಮತ್ತು ಹಿತೈಷಿಗಳು ಹೇಳಿದಂತೆ ಕೇಳಿ. ಯಾವುದಕ್ಕೂ ಮನೋಬಲ ಬಿಟ್ಟುಕೊಡಬೇಡಿ. ಒಳ್ಳೆಯ ದಿನಗಳು ಮುಂದೆ ಕಾದಿವೆ.

ಮಕರ : ಇತರರ ಮುಂದೆ ಕೈಯೊಡ್ಡುವಂಥ ಪರಿಸ್ಥಿತಿ

ಇದ್ದಕ್ಕಿದ್ದಂತೆ ಕೈಬರಿದಾಗುತ್ತದೆ, ಜೇಬಿಗೆ ತೂತು ಬೀಳುತ್ತದೆ, ಬ್ಯಾಂಕ್ ಬ್ಯಾಲನ್ಸ್ ಶೂನ್ಯವಾಗುತ್ತದೆ, ಇತರರ ಮುಂದೆ ಕೈಯೊಡ್ಡುವಂಥ ಪರಿಸ್ಥಿತಿ ಎದುರಾಗುತ್ತದೆ. ಇವೆಲ್ಲವೂ ನಿಮ್ಮ ವ್ಯಕ್ತಿತ್ವ, ನಿಮ್ಮ ಆಂತಿರಿಕ ಶಕ್ತಿಯನ್ನು ಒರೆಗೆ ಹಚ್ಚುವಂಥ ಸಂಗತಿಗಳೇ. ನಿಮ್ಮ ಸಹಾಯಕ್ಕೆ ಹತ್ತಿರದವರು ಧಾವಿಸಬಹುದು, ಸದ್ಯಕ್ಕೆ ಇಟ್ಕೊ ಅಂತ ಹೇಳಬಹುದು. ಆದರೆ, ನಯವಾಗಿಯೇ ತಿರಸ್ಕರಿಸಿ. ಆತ್ಮಾಭಿಮಾನದ ಮುಂದೆ ಈ ಅಡೆತಡೆಗಳೆಲ್ಲ ಕ್ಷಣಿಕ. ಕೆಟ್ಟ ಕನಸಿನಂತೆ ಎಲ್ಲವೂ ಮಾಯವಾಗುತ್ತವೆ. ಕಾದುನೋಡುವ ತಂತ್ರ ಅನುಸರಿಸಿದರೂ ಸರಿಮಾರ್ಗದಲ್ಲಿ ನಿಮ್ಮ ಪ್ರಯತ್ನಗಳು ನಿರಂತರವಾಗಿರಲಿ.

ಕುಂಭ : ಪ್ರತಿಯೊಂದಕ್ಕೂ ಲೆಕ್ಕ ನೀಡಬೇಕಾದಂಥ ಪರಿಸ್ಥಿತಿ

ಪ್ರತಿಯೊಂದು ತಪ್ಪಿಗೂ ಬೇರೊಬ್ಬರ ಮೇಲೆ ಗೂಬೆ ಕೂರಿಸುವ ನಿಮ್ಮ ಜಾಯಮಾನವನ್ನು ಬದಲಿಸಿಕೊಳ್ಳಿ. ಏನೇ ತಪ್ಪು ನಡೆದಿರಲಿ ಅದರಲ್ಲಿ ಒಂದು ಹಿಡಿಯಷ್ಟಾದರೂ ನಿಮ್ಮ ಯೋಗದಾನ ಇದ್ದೇ ಇರುತ್ತದೆ. ಹಿಂದೆ ಸಾಧಿಸಿದ್ದರ ಬಗ್ಗೆ ಲೆಕ್ಕ ಹಾಕಿ, ಮುಂದೆ ಆಗಬೇಕಾದುದನ್ನು ಪಟ್ಟಿ ಮಾಡಿಕೊಳ್ಳಿ. ಏಕೆಂದರೆ, ಪ್ರತಿಯೊಂದಕ್ಕೂ ಲೆಕ್ಕ ನೀಡಬೇಕಾದಂಥ ಪರಿಸ್ಥಿತಿ ಬಂದರೂ ಬರಬಹುದು. ಸಾಧ್ಯವಾದರೆ ತೀರ್ಥಯಾತ್ರೆಯನ್ನು ಕೈಗೊಂಡು ಅಂದುಕೊಂಡಿದ್ದ ಹರಕೆಯನ್ನು ತೀರಿಸಲು ಪ್ರಯತ್ನಿಸಿ.

ಮೀನ : ನಿಮ್ಮ ಜವಾಬ್ದಾರಿ ಅರಿತುಕೊಳ್ಳಿ

ವ್ಯವಸ್ಥೆಯೇ ಅವ್ಯವಸ್ಥೆಯಂತೆ ನಾವು ಕಾಣಲು ಹೋದರೆ ಕಂಡದ್ದೆಲ್ಲವೂ ದುರವಸ್ಥೆಯಂತೆ ಭಾಸವಾಗುತ್ತದೆ. ಜಗತ್ತು ಎಂದಿಗೂ ನಾವು ಕಂಡಂತೆ ಇರುತ್ತದೆಯೇ ಹೊರತು ನಾವು ಅಂದುಕೊಂಡಂತೆ ಇರುವುದಿಲ್ಲ. ಇವೆರಡರ ನಡುವಿನ ವ್ಯತ್ಯಾಸ ತಿಳಿದುಕೊಂಡರೆ, ಕದಡಿದ ನೀರು ಕೂಡ ತಿಳಿಯಾಗಿ ಕಾಣಲು ಆರಂಭಿಸುತ್ತದೆ. ಮೊದಲಿಗೆ ನಿಮ್ಮ ಜವಾಬ್ದಾರಿಗಳೇನು ಎಂಬುದನ್ನು ಅರಿತುಕೊಳ್ಳಿ. ಚಿಕ್ಕವರು ಚಿಕ್ಕವರಂತೆಯೇ ವರ್ತಿಸಬೇಕು. ವಯಸ್ಸು ಹೆಚ್ಚಾದಂತೆಲ್ಲ ನಮಗಿಂತ ದೊಡ್ಡವರಿಗೆ ಅವಮಾನವಾಗುವಂತೆ ನಡೆದುಕೊಳ್ಳಬೇಕಂತೇನೂ ಇಲ್ಲ. ಮನಸ್ಸು ಪರಿಪಕ್ವವಾದಂತೆ ದುಗುಡದ ಗೆರೆಗಳು ಮಾಯವಾಗುತ್ತ ಸಾಗುತ್ತವೆ.

Have a great day!
Read more...

English Summary

The calendars specially designed by astrologer Pandit Anuj K. Shukla shows days when the Moon, Sun, and planets favour particular zodiac sign. Astro Calendar for Aries, Taurus, Gemini, Cancer, Leo, Virgo, Libra, Scorpio, Sagittarius, Capricorn, Aquarius and Pisces.