ಬಾಡಿಗೆ ಏರಿಸಿ ವ್ಯಾಪಾರಿಗಳಿಗೆ ಬರೆ ಎಳೆದ ಎಪಿಎಂಸಿ ಆಡಳಿತ ಮಂಡಳಿ
ಬೆಂಗಳೂರು, ಡಿಸೆಂಬರ್ 20 : ಎಪಿಎಂಸಿ ವ್ಯಾಪಾರಿಗಳಿಗೆ ಏಕಾಏಕಿ ಬಾಡಿಗೆ ದರ ಏಳರಿಂದ ಎಂಟು ಪಟ್ಟು ಏರಿಕೆ ಮಾಡಿ ಆಡಳಿತ ಮಂಡಳಿ ಶಾಕ್ ನೀಡಿದೆ. ಏಕಾಏಕಿ ಬಾಡಿಗೆ ದರ 7 ರಿಂದ 8 ಪಟ್ಟು ಹೆಚ್ಚಳ ಮಾಡಿದೆ. ಬಾಡಿಗೆ ದರ ಪ್ರತಿ ವರ್ಷಕ್ಕೆ ಶೇ.10ರಷ್ಟು ಹೆಚ್ಚಳ ಮಾಡುವುದು ರೂಢಿ. ಆದರೆ ಈ ಬಾರಿ ಬಾಡಿಗೆಯನ್ನು ಬೇಕಾಬಿಟ್ಟಿ ಏರಿಕೆ ಮಾಡಲಾಗಿದೆ.
800 ಪಾವತಿಸುತ್ತಿದ್ದವರಿಗೆ ಇದೀಗ 10.500 ರೂ. ಹಾಗೂ 3975 ರೂ. ಪಾವತಿಸುತ್ತಿದ್ದವರಿಗೆ 22 ಸಾವಿರ ರೂ. 8 ಸಾವಿರ ಇದ್ದವರಿಗೆ 15 ಸಾವಿರ ಹೀಗೆ ಮನಸೋ ಇಚ್ಛೆ ಬಾಡಿಗೆಯನ್ನು ಹೆಚ್ಚಿಸಿ, 2016ರ ಅಕ್ಟೋಬರ್ 1 ರಿಂದಲೇ ಜಾರಿಗೆ ಬರುವಂತೆ ಇದೀಗ ನೋಟಿಸ್ ನೀಡಲಾಗಿದೆ.
ಎಪಿಎಂಸಿಯಲ್ಲಿ ಲೀವ್ ಆಂಡ್ ಲೈಸನ್ಸ್ ಆಧಾರದ ಮೇಲೆ ಮಳಿಗೆಗಳನ್ನು ಹಂಚಿಕೆ ಮಾಡುವ ಪದ್ಧತಿ ಇದೆ. 55 ತಿಂಗಳ ನಂತರ ಮಾರುಕಟ್ಟೆ ಬೆಲೆಯನ್ನು ಪಾವತಿಸಿ, ಮಳಿಗೆಗಳನ್ನು ಸ್ವಂತದ್ದಾಗಿಸಿಕೊಳ್ಳುವ ಅವಕಾಶ ಈ ಹಿಂದೆ ಇತ್ತು. ಈ ವ್ಯವಸ್ಥೆಯನ್ನು ಮೂರು ವರ್ಷಗಳ ಹಿಂದೆ ಸ್ಥಗಿತಗೊಳಿಸಲಾಗಿತ್ತು.
ಇದೀಗ ಮೂರು ತಿಂಗಳಿಂದ ಸ್ವಂತಮಾಡಿಕೊಳ್ಳುವ ನಿಯಮವನ್ನು ಮತ್ತೆ ಮುಂದುವರೆಸಲಾಗಿದೆ. ಅದರಂತೆ ಪ್ರಕ್ರಿಯೆಗಳೂ ಆರಂಭವಾಗಿದೆ. ಈ ಅವಧಿಯಲ್ಲಿಏ ಎಪಿಎಂಸಿ ಸಮಿತಿಯು ವ್ಯಾಪಾರಿಗಳಿಗೆ ಲೀವ್ ಆಂಡ್ ಲೈಸನ್ಸ್ ನವೀಕರಣದ ನೆಪದಲ್ಲಿ ವಿಪರೀತ ಬಾಡಿಗೆ ವಿಧಿಸಿ ವ್ಯಾಪಾರಿಗಳನ್ನು ಸಂಕಷ್ಟಕ್ಕೆ ದೂಡಿದೆ.
ಅಷ್ಟೇ ಅಲ್ಲದೆ, ಫೆಬ್ರವರಿಯಲ್ಲಿ ವ್ಯಾಪಾರಿಗಳ ಪರವಾನಗಿ ನವೀಕರಣ ಕಾರ್ಯ ನಡೆಯುತ್ತದೆ. ಈ ನವೀಕರಣದ ಸಂದರ್ಭದಲ್ಲಿ ಸಮಿತಿಯ ಅಧಿಕಾರಿಗಳು ವ್ಯಾಪಾರಿಗಳಿಂದ ಐದು ವರ್ಷದ ಬ್ಯಾಂಕ್ ಸ್ಟೇಟ್ ಮೆಂಟ್ , ಪಾಸ್ ಬುಕ್ ನೀಡುವಂತೆ ದಿನಕ್ಕೊಂದುಸುತ್ತೋಲೆಗಳನ್ನು ನೀಡಿ ವಿನಾಕಾರಣ ಕಿರುಕುಳ ನೀಡುತ್ತಿದ್ದಾರೆ ಎಂದು ವ್ಯಾಪಾರಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.