ಇಂದು ವಿಂಬಲ್ಡನ್ ಫೈನಲ್:11ನೇ ಗ್ರಾಂಡ್ ಸ್ಲಾಂ ನಿರೀಕ್ಷೆಯಲ್ಲಿ ವೀನಸ್

9ನೇ ಬಾರಿಗೆ ಫೈನಲ್ ಗೆ ಲಗ್ಗೆ

ಗುರುವಾರ ರಾತ್ರಿ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಸೆಮಿಫೈನಲ್ ಪಂದ್ಯದಲ್ಲಿ ವೀನಸ್, ಬ್ರಿಟನ್ ನ ಜೊಹಾನ್ನಾ ಕೊಂಟಾ ವಿರುದ್ಧ 6-4, 6-4 ನೇರ ಸೆಟ್ ಗಳ ಅಂತರದಲ್ಲಿ ಜಯ ಸಾಧಿಸಿದರು. ಅಂದಹಾಗೆ, 2009ರಿಂದ ವಿಂಬಲ್ಡನ್ ಆಡುತ್ತಿರುವ ವೀನಸ್ ಅವರಿಗಿದು 9ನೆಯ ಫೈನಲ್ ಪ್ರವೇಶ.

ಮಾರ್ಟಿನಾ ನಂತರ ಈಕೆಯೇ ಹಿರಿಯಳು!

ವಿಂಬಲ್ಡನ್ ಫೈನಲ್ ಗೆ ಕಾಲಿಡುವ ಮೂಲಕ, ವಿಂಬಲ್ಡನ್ ಟೆನಿಸ್ ಟೂರ್ನಿಯ ಕಳೆದ 23 ವರ್ಷಗಳಲ್ಲಿ ಫೈನಲ್ ಗೆ ಕಾಲಿಟ್ಟ ಅತ್ಯಂತ ಹಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ. ವೀನಸ್ ವಿಲಿಯಮ್ಸ್ ಅವರಿಗೀಗ 37 ವರ್ಷ. 1994ರಲ್ಲಿ ಮಾರ್ಟಿನಾ ನರ್ವಾಟಿಲೋವಾ ಅವರು, ತಮ್ಮ 38ನೇ ವಯಸ್ಸಿನಲ್ಲಿ ವಿಂಬಲ್ಡನ್ ಫೈನಲ್ ಗೆ ಕಾಲಿಟ್ಟಿದ್ದರು.

ಚರಿತ್ರಾರ್ಹ ಸಾಧನೆಯಿಂದ ಕೊಂಟಾ ವಂಚಿತೆ

ಗುರುವಾರದ ಸೆಮಿಫೈನಲ್ ಪಂದ್ಯದಲ್ಲಿ ಜಯಗಳಿಸುವ ಮೂಲಕ ಅವರು, ಕೊಂಟಾ ಅವರ ಚರಿತ್ರಾರ್ಹ ಸಾಧನೆಯ ಕನಸನ್ನು ಭಗ್ನಗೊಳಿಸಿದರು. 40 ವರ್ಷಗಳಿಂದ ಈವರೆಗೆ ಯಾವುದೇ ಬ್ರಿಟನ್ ಮಹಿಳಾ ಟೆನಿಸ್ ಆಟಗಾರ್ತಿ ವಿಂಬಲ್ಡನ್ ಫೈನಲ್ ಗೆ ಕಾಲಿಟ್ಟಿಲ್ಲ. ಈ ಬಾರಿ ತಾವು ಫೈನಲ್ ಗೆ ಕಾಲಿಡುವ ಮೂಲಕ ಚರಿತ್ರೆಯಲ್ಲಿ ತಮ್ಮ ಹೆಸರನ್ನು ಬರೆಯುವ ಅವಕಾಶದಿಂದ ಕೊಂಟಾ ಅವರು ವಂಚಿತರಾದರು.

ಈ ಬಾರಿ ಗೆದ್ದರೆ ಇದು ವೀನಸ್ ನ 11ನೇ ಗ್ರ್ಯಾಂಡ್ ಸ್ಲಾಂ

ಈಗಾಗಲೇ 10 ಗ್ರ್ಯಾಂಡ್ ಸ್ಲಾಂಗಳನ್ನು ವೀನಸ್ ವಿಲಿಯಮ್ಸ್ ಗೆದ್ದಿದ್ದಾರೆ. 2003, 2017ರಲ್ಲಿ ಆಸ್ಟ್ರೇಲಿಯಾ ಓಪನ್, 2002ರಲ್ಲಿ ಫ್ರೆಂಚ್ ಓಪನ್, 2000, 2001, 2005, 2007, 2008ರಲ್ಲಿ ವಿಂಬಲ್ಡನ್, 2000, 2001ರಲ್ಲಿ ಯುಎಸ್ ಓಪನ್ ಪ್ರಶಸ್ತಿಗಳನ್ನು ಅವರು ಗೆದ್ದಿದ್ದರು. ಇದೀಗ, ಮತ್ತೆ ಅವರು ವಿಂಬಲ್ಡನ್ ಗೆದ್ದರೆ, ಇದು ಅವರ ವೃತ್ತಿಜೀವನದಲ್ಲಿ ಸಾಧಿಸಿದ 11ನೇ ಗ್ರ್ಯಾಂಡ್ ಸ್ಲಾಂ ಪ್ರಶಸ್ತಿಯಾಗಲಿದೆ.