ಬೆಂಗಳೂರು, ಏಪ್ರಿಲ್. 09 : ಡೇವಿಸ್ ಕಪ್ ಟೂರ್ನಿಯಲ್ಲಿ ಡಬಲ್ಸ್ ವಿಭಾಗದಲ್ಲಿ ಭಾರತ ತಂಡ ವಿಶ್ವ ಗುಂಪಿನ ಪ್ಲೇ ಆಫ್ ಹಂತಕ್ಕೆ ಅರ್ಹತೆ ಪಡೆದುಕೊಂಡಿದೆ.
ಕರ್ನಾಟಕ ರಾಜ್ಯ ಲಾನ್ ಟೆನಿಸ್ ಸಂಸ್ಥೆಯ (ಕೆಎಸ್ ಎಲ್ಟಿಎ) ಅಂಕಣದಲ್ಲಿ ನಡೆಯುತ್ತಿರುವ ಏಷ್ಯಾ ಒಸೀನಿಯಾ ವಲಯದ ಎರಡನೇ ಸುತ್ತಿನ ಪಂದ್ಯದಲ್ಲಿ ಶನಿವಾರ 3-0ರಲ್ಲಿ ಮುನ್ನಡೆ ಸಾಧಿಸಿತು.
ಡೇವಿಸ್ ಕಪ್ನ ಡಬಲ್ಸ್ನಲ್ಲಿ ಮೊದಲ ಬಾರಿಗೆ ಒಂದಾಗಿ ಆಡಿದ ಬೋಪಣ್ಣ ಮತ್ತು ಬಾಲಾಜಿ 6-2, 6-4, 6-1 ನೇರ ಸೆಟ್ಗಳಿಂದ ಉಜ್ಬೇಕಿಸ್ತಾನದ ಫಾರೂಕ್ ಡುಸ್ಟವ್ ಹಾಗೂ ಸ್ಯಾಂಜರ್ ಫಯಾಜಿವ್ ಎದುರು ಸುಲಭ ಜಯ ಸಾಧಿಸಿದರು.
ಉಜ್ಬೇಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಭಾರತ ತಂಡದ ಸಿಂಗಲ್ಸ್ ಆಟಗಾರರಾದ ರಾಮಕುಮಾರ್ ರಾಮನಾಥನ್ ಮತ್ತು ಪ್ರಜ್ಞೇಶ್ ಗುಣೇಶ್ವರನ್ ಶುಕ್ರವಾರ ಗೆಲುವು ಪಡೆದು 2-0ರಲ್ಲಿ ಮುನ್ನಡೆ ತಂದುಕೊಟ್ಟಿದ್ದರು.