ರಾಜ್ ಕೋಟ್, ನವೆಂಬರ್ 14: ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಎರಡು ತಂಡದಿಂದ ಅನೇಕ ದಾಖಲೆಗಳು ನಿರ್ಮಾಣವಾಯಿತು. ಭಾರತದ ಕಳಪೆ ಫೀಲ್ಡಿಂಗ್, ಇಂಗ್ಲೆಂಡ್ ಬ್ಯಾಟಿಂಗ್ ಭಾರಿ ಚರ್ಚೆಗೊಳಪಟ್ಟಿತು. ಈ ಪೈಕಿ ವಿರಾಟ್ ಕೊಹ್ಲಿ ಅವರು ಔಟ್ ಆದ ರೀತಿ ಎಲ್ಲರ ಗಮನ ಸೆಳೆಯಿತು. ಹಿಟ್ ವಿಕೆಟ್ ಮಾಡಿಕೊಂಡು ಔಟಾದ ಕೊಹ್ಲಿ ಅವರು ಈ ರೀತಿ ವಿಚಿತ್ರ ರೀತಿ ಔಟಾದ ಆಟಗಾರ ಪಟ್ಟಿಗೆ ಸೇರಿದರು.
ವಿರಾಟ್ ಕೊಹ್ಲಿ ಅವರು ಇಂಗ್ಲೆಂಡಿನ ಸ್ಪಿನ್ನರ್ ಆದಿಲ್ ರಷೀದ್ ಎಸೆತವನ್ನು ಪುಲ್ ಮಾಡಿದ ಸಂದರ್ಭದಲ್ಲಿ ಅವರ ಹಿಮ್ಮಡಿ ಲೆಗ್ ಸ್ಟಂಪ್ ಗೆ ತಾಗಿ ಬೇಲ್ಸ್ ಉದುರಿತು. ಕೊಹ್ಲಿ ಹಿಟ್ ವಿಕೆಟ್ ಔಟಾಗಿದ್ದು, ತಕ್ಷಣಕ್ಕೆ ತಿಳಿಯಲೇ ಇಲ್ಲ. ನಂತರ ಥರ್ಡ್ ಅಂಪೈರ್ ಗೆ ಅಪೀಲ್ ಮಾಡಲಾಯಿತು. ಆ ಸಂದರ್ಭದಲ್ಲಿ ಇಂಗ್ಲೆಂಡಿನ 537ಸ್ಕೋರಿಗೆ ಉತ್ತರವಾಗಿ ಭಾರತ 361/6 ಸ್ಕೋರ್ ಮಾಡಿತ್ತು. ಕೊಹ್ಲಿ 40ರನ್ ಗಳಿಸಿ ಆಡುತ್ತಿದ್ದರು. ಕೊಹ್ಲಿ ಔಟ್ ಎಂದು ಟಿವಿ ಅಂಪೈರ್ ಘೋಷಿಸಿದರು.
ಈ ರೀತಿ ಕೊಹ್ಲಿಗೂ ಮುನ್ನ 21 ಭಾರತೀಯ ಕ್ರಿಕೆಟರ್ಸ್ ಔಟಾಗಿದ್ದಾರೆ. ಆದರೆ, 1949ರ ನಂತರ ನಾಯಕರೊಬ್ಬರು ಈ ರೀತಿ ಔಟಾಗಿದ್ದು ಇದು ಎರಡನೇ ಸಲ. ಲಾಲಾ ಅಮರನಾಥ್ ಅವರು ವೆಸ್ಟ್ ಇಂಡೀಸ್ ವಿರುದ್ಧ ಚೆನ್ನೈ ಟೆಸ್ಟ್ ನಲ್ಲಿ ಈ ರೀತಿ ಔಟಾದ ಮೊದಲ ಕ್ಯಾಪ್ಟನ್. ಭಾರತೀಯ ಆಟಗಾರರ ಪೈಕಿ 2002ರಲ್ಲಿ ವಿವಿಎಸ್ ಲಕ್ಷ್ಮಣ್ ಅವರು ವೆಸ್ಟ್ ಇಂಡೀಸ್ ವಿರುದ್ಧ ಔಟಾದ ಬಳಿಕ ಕೊಹ್ಲಿ ಅವರು ಈಗ ಔಟಾಗಿದ್ದಾರೆ.