ಕರಾಚಿ, ಡಿಸೆಂಬರ್ 05:ಇಲ್ಲಿನ ಶರ್ಹಾಹ್-ಎ-ಫೈಸಲ್ನ ರೆಜೆಂಟ್ ಫ್ಲಾಜಾ 4 ಸ್ಟಾರ್ ಹೋಟೆಲಿನಲ್ಲಿ ಸೋಮವಾರ ಬೆಂಕಿ ಕಾಣಿಸಿಕೊಂಡ ಘಟನೆ ನಡೆದಿದೆ. ಇದೇ ಹೋಟೆಲ್ ನಲ್ಲಿದ್ದ ಪಾಕಿಸ್ತಾನದ ಸ್ಥಳೀಯ ಲೀಗ್ ಆಟಗಾರರು ಗಾಯಗೊಂಡಿರುವ ಸುದ್ದಿ ಬಂದಿದೆ.
ಐಷಾರಾಮಿ ಹೋಟೆಲ್ ನಲ್ಲಿ ಬೆಂಕಿ ಕಾಣಿಸಿಕೊಂಡು, ಆರಕ್ಕೂ ಅಧಿಕ ಮಹಡಿಗಳಿಗೆ ವ್ಯಾಪಿಸಿತ್ತು. ಈ ದುರ್ಘಟನೆಯಲ್ಲಿ 11ಕ್ಕೂ ಜನ ಮೃತಪಟ್ಟು, 75 ಮಂದಿ ಗಾಯಗೊಂಡಿದ್ದರು. ಗಾಯಗೊಂಡವರ ಪೈಕಿ ಕ್ರಿಕೆಟರ್ಸ್ ಇರುವುದು ದೃಢಪಟ್ಟಿದೆ.
ಬೆಂಕಿ ದುರಂತದಲ್ಲಿ ಹೋಟೆಲ್ ಕೊಠಡಿಗಳಲ್ಲಿದ್ದ ಸುಮಾರು 100 ಮಂದಿ ಅಪಾಯಕ್ಕೆ ಸಿಲುಕಿದ್ದರು ಎಂದು ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದರು.
ಕ್ವಾದ್ ಇ ಅಜಾಮ್ ಟ್ರೋಫಿ ಪಂದ್ಯವಾಡಲು ಬಂದಿದ್ದ ಯುನೈಟೆಡ್ ಬ್ಯಾಂಕ್ ಹಾಗೂ ಸುಯಿ ಸದರನ್ ಗ್ಯಾಸ್ ತಂಡದ ಆಟಗಾರರು ಈ ಹೋಟೆಲ್ ನಲ್ಲಿ ತಂಗಿದ್ದರು. ಕೆಲವರಿಗೆ ಬೆಂಕಿ ಅನಾಹುತದಲ್ಲಿ ಗಾಯವಾಗಿದ್ದರೆ, ಹಲವಾರು ಮಂದಿ ಆಘಾತಕ್ಕೊಳಗಾಗಿದ್ದಾರೆ ಹೀಗಾಗಿ ಪಂದ್ಯವನ್ನು ರದ್ದುಪಡಿಸಲಾಗಿದೆ ಎಂದು ಕ್ರಿಕೆಟ್ ಮಂಡಳಿ ಪ್ರಕಟಿಸಿದೆ.
ಯಾಸಿರ್ ಮುರ್ತಜಾ ಅವರು ಕಿಟಕಿ ಗಾಜನ್ನು ಮುರಿದು ಎರಡನೇ ಮಹಡಿಯಿಂದ ಹಾರಿ ಬಚಾವಾಗಿದ್ದಾರೆ. ಈ ಸಾಹಸದಲ್ಲಿ ಕಾಲು ಮುರಿದುಕೊಂಡಿದ್ದಾರೆ. ಮತ್ತೊಬ್ಬ ಆಟಗಾರ ಹಮ್ಮದ್ ಅವರ ಕಾಲು ಉಳುಕಿಸಿಕೊಂಡಿದ್ದಾರೆ. ಪಂದ್ಯ ರದ್ದುಪಡಿಸಲು ಮನವಿ ಮಾಡಿಕೊಂಡ ಯುನೈಟೆಡ್ ತಂಡ ಈಗ ಲೀಗ್ ನಿಂದ ಹೊರಕ್ಕೆ ಉಳಿಯಬೇಕಾದ ಪರಿಸ್ಥಿತಿ ಎದುರಾಗಿದೆ. (ಪಿಟಿಐ)