ಮುಂಬೈ, ಏಪ್ರಿಲ್ 17: ಮುಂಬೈ ಇಂಡಿಯನ್ಸ್ ತಂಡದ ಕೈಯಿಂದ ಗುಜರಾತ್ ಲಯನ್ಸ್ ತಂಡ ಗೆಲುವನ್ನು ಕಸಿದುಕೊಂಡಿದ್ದಾರೆ. ಈ ಮೂಲಕ ಸುರೇಶ್ ರೈನಾ ನಾಯಕತ್ವದ ತಂಡ ಚೊಚ್ಚಲ ಐಪಿಎಲ್ ನಲ್ಲೇ ಸತತ ಮೂರು ಗೆಲುವು ಸಾಧಿಸಿದೆ.
ಐಪಿಎಲ್ 2016: ವೇಳಾಪಟ್ಟಿ | ಯಾವ ತಂಡದಲ್ಲಿ ಯಾವ ಆಟಗಾರರು | ಗ್ಯಾಲರಿ
ಶನಿವಾರ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ ರನ್ ಚೇಸಿಂಗ್ ನಲ್ಲಿ ಕೊನೆಕ್ಷಣದಲ್ಲಿ ಸ್ವಲ್ಪ್ ತಡವರಿಸಿದರೂ ರೋಚಕ ಜಯ ಸಾಧಿಸಿದೆ. ಸದ್ಯಕ್ಕೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿ ಮುಂದುವರೆದಿದೆ.[]
ಆರಂಭಿಕ ಬ್ಯಾಟ್ಸ್ಮನ್ ಆರೋನ್ ಫಿಂಚ್ ಅಜೇಯ 67ರನ್(54 ಎಸೆತಗಳು, 7X4, 1X6) ಗಳಿಸಿ ಗೆಲುವಿನ ರೂವಾರಿ ಎನಿಸಿದರು. ಐಪಿಎಲ್-9ರಲ್ಲಿ ಫಿಂಚ್ ಅವರು ಸತತ 3ನೇ ಅರ್ಧಶತಕ ಬಾರಿಸಿ ಗಮನ ಸೆಳೆದಿದ್ದಾರೆ.
ಆರಂಭಿಕ ಆಟಗಾರ ಪಾರ್ಥಿವ್ ಪಟೇಲ್ 34 ರನ್ (29 ಎಸೆತಗಳು, 2X4, 2X6 ) ಅಂಬಟಿ ರಾಯುಡು (20) ಹಾಗೂ ಹಾರ್ದಿಕ್ ಪಾಂಡ್ಯ ಸೋದರ ಇದೇ ಮೊದಲ ಬಾರಿಗೆ ಐಪಿಎಲ್ ಆಡುತ್ತಿರುವ ಕೃನಾಲ್ ಪಾಂಡ್ಯ ಅಜೇಯ 20ರನ್(11ಎಸೆತ ಗಳು, 3 X4), ವೇಗಿ ಟಿಮ್ ಸೌಥಿ 25 ರನ್(11 ಎಸೆತಗಳು, 1X4, 2X6) ಆಟ ಮುಂಬೈಗೆ ನೆರವಾಯಿತು.
ರನ್ ಚೇಸ್ ಸುಲಭವಾಗಿರಲಿಲ್ಲ: ಒಂದು ಕಡೆ ನಿರಂತರವಾಗಿ ವಿಕೆಟ್ ಗಳು ಉದುರುತ್ತಿದ್ದರೂ ನೆಲಕಚ್ಚಿ ನಿಂತ ಅರೋನ್ ಫಿಂಚ್ ಪಂದ್ಯಶ್ರೇಷ್ಠ ಪ್ರದರ್ಶನ ನೀಡಿದರು. ಒಂದು ಹಂತದಲ್ಲಿ ಮೆಕಲಮ್, ಬ್ರಾವೋ ಸೇರಿದಂತೆ ಪ್ರಮುಖ ಆಟಗಾರರನ್ನು ಕಳೆದುಕೊಂಡು ಗುಜರಾತ್ 109 ಸ್ಕೋರಿಗೆ 5 ವಿಕೆಟ್ ಕಳೆದು ಕೊಂಡು ಕಷ್ಟಪಡುತ್ತಿತ್ತು.
ಕೊನೆ 2 ಓವರ್ಗಳಲ್ಲಿ 13 ರನ್ ಬೇಕಿತ್ತು. ಆದರೆ 19ನೇ ಓವರ್ ಎಸೆದ ಮಿಚೆಲ್ ಮೆಕ್ಲಿನಘನ್ ಕೇವಲ 2 ರನ್ ನೀಡಿ 2 ವಿಕೆಟ್ ಕಬಳಿಸಿ, ಗುಜರಾತಿಗೆ ಆತಂಕ ಮೂಡಿಸಿದರು. ಆದರೆ, ಬೂಮ್ರಾ ಎಸೆದ ಕೊನೇ ಓವರ್ನಲ್ಲಿ ಲಯನ್ಸ್ ಗೆಲುವಿಗೆ 11 ರನ್ ಗುರಿಯನ್ನು ದಾಟಿ ಗೆಲುವಿನ ನಗೆ ಬೀರಿತು.