ಪಂದ್ಯದ ಮುಖ್ಯಾಂಶಗಳು
ಕ್ರಿಸ್ ಗೇಲ್ ಅನುಪಸ್ಥಿತಿ, ವಿರಾಟ್ ಕೊಹ್ಲಿ ಹೋರಾಟ, ಮತ್ತೆ ಮಿಂಚಿದ ಆಶೀಶ್ ನೆಹ್ರಾ, ರೈನಾ ಅರ್ಧ ಶತಕ, ಸ್ಟಾರ್ಕ್ ಎಸೆತ ಎಲ್ಲವೂ ಪಂದ್ಯದ ಮುಖ್ಯಾಂಶವಾಗಿತ್ತು. ಆರ್ ಸಿಬಿ ವಿರುದ್ಧ ಗೆಲ್ಲಲು ಧೋನಿ ಹೆಚ್ಚಿನ ತಂತ್ರ ಮಾಡುವ ಗೋಜಿಗೆ ಹೋಗಲಿಲ್ಲ. ಕೊಹ್ಲಿ ಬಿಟ್ಟರೆ ಉಳಿದವರಿಗೆ ಮೈದಾನಕ್ಕಿಂತ ಪೆವಿಲಿಯನ್ ಹತ್ತಿರವಾಗಿತ್ತು.
ಆರ್ ಸಿಬಿ ರನ್ ಚೇಸ್ ಚೆನ್ನಾಗಿತ್ತು ಆದರೆ....
ಗೇಲ್ ಅನುಪಸ್ಥಿತಿಯಲ್ಲಿ ಬಂದ ಮ್ಯಾಡಿಸನ್ 4 ರನ್ ಗಳಿಸಿದರೆ ಕೊಹ್ಲಿ ಇನ್ನಿಂಗ್ಸ್ ಕಟ್ಟಿ ಉತ್ತಮ ಆಟ ಪ್ರದರ್ಶಿಸಿದರು. 44 ಎಸೆತಗಳಲ್ಲಿ 48ರನ್ (2 ಬೌಂಡರಿ, 1 ಸಿಕ್ಸರ್), ಎಬಿ ಡಿ ವಿಲೆಯರ್ಸ್ 14 ಎಸೆತಗಳಲ್ಲಿ 21ರನ್, ದಿನೇಶ್ ಕಾರ್ತಿಕ್ 23ರನ್, ವೀಸೆ 17ರನ್ ಗಳಿಸಿ ಚೇಸಿಂಗ್ ಜಾರಿಯಲ್ಲಿಟ್ಟಿದ್ದರು. ಅದರೆ, ನಿಗದಿತವಾಗಿ ವಿಕೆಟ್ ಕಳೆದುಕೊಂಡು ಸೊಲೊಪ್ಪಿಕೊಂಡಿತು.
ಕುಸಿದ ಮಧ್ಯಮ ಕ್ರಮಾಂಕ
ಚೆನ್ನೈ ನೀಡಿದ್ದ ಗುರಿ ಸುಲಭವಾಗಿ ಚೇಸ್ ಮಾಡಬಹುದಾದರೂ ಉತ್ತಮ ಜೊತೆಯಾಟದ ಕೊರತೆ, ಮಧ್ಯಮ ಕ್ರಮಾಂಕದ ಕುಸಿತ ಪಂದ್ಯದ ಸೋಲಿಗೆ ಕಾರಣವಾಯಿತು. ಮನದೀಪ್ 0, ಸರ್ಫರಾಜ್ 7 ಗಳಿಸಿದರೆ ಹರ್ಷಲ್ ಪಟೇಲ್ 0 ಸುತ್ತಿದರು.
ಮತ್ತೆ ಕಾಡಿದ ಆಶೀಶ್ ನೆಹ್ರಾ
ಆರ್ ಸಿಬಿ ಗೆಲುವಿಗೆ ಮುಳುವಾದ ಆಶೀಶ್ ನೆಹ್ರಾ (19 ಕ್ಕೆ 3) ಹಾಗೂ ವೇಗಿ ಈಶ್ವರ್ ಪಾಂಡೆ ಮತ್ತು ಡ್ವೇನ್ ಬ್ರಾವೊ ತಲಾ 2 ವಿಕೆಟ್ ಪಡೆದು ಆರ್ ಸಿಬಿ ಆಸೆಗೆ ತಣ್ಣೀರೆರಚಿದರು.
ರೈನಾ ಭರ್ಜರಿ ಬ್ಯಾಟಿಂಗ್
ಸ್ಮಿತ್ ಶೂನ್ಯ ಸುತ್ತಿದರೆ ಬ್ರೆಂಡನ್ ಮೆಕಲಮ್ 20 ರನ್(15ಎ, 4x4) ಹಾಗೂ ಸುರೇಶ್ ರೈನಾ 52 ರನ್ (46e, 5x4,1x6) ಆಕರ್ಷಕ ಅರ್ಧಶತಕ ನೆರವಿನಿಂದ ಚೆನ್ನೈ ಉತ್ತಮ ಮೊತ್ತ ಕಲೆ ಹಾಕಿತು.
ಚೆನ್ನೈ ಕೈ ಹಿಡಿದ ಟಾಪ್ ಬ್ಯಾಟ್ಸ್ ಮನ್
ಮಧ್ಯಮ ಕ್ರಮಾಂಕದಲ್ಲೂ ಉತ್ತಮ ಕೊಡುಗೆ ಸಿಕ್ಕಿದ್ದರಿಂದ ನಿಗದಿತವಾಗಿ ಚೆನ್ನೈ ವಿಕೆಟ್ ಕಳೆದುಕೊಂಡರೂ 20 ಓವರ್ಸ್ ಗಳಲ್ಲಿ 148ರನ್ ಗಳಿಸಿತು. ನೇಗಿ 13, ಧೋನಿ 29, ಡುಫ್ಲೆಸಿಸ್ 24ರನ್ ಗಳಿಸಿದರು. ಜಡೇಜ 3 ರನ್ ಗಳಿಸಿ ವಿಫಲರಾದರು.
ಮತ್ತೆ ಮಿಂಚಿದ ಮಿಚೆಲ್ ಸ್ಟಾರ್ಕ್
24ರನ್ನಿತ್ತು 3 ವಿಕೆಟ್ ಕಿತ್ತ ಮಿಚೆಲ್ ಸ್ಟಾಕ್ ಮತ್ತೆ ಮಿಂಚಿದರು. ವರುಣ್ ಅರೋನ್ ಬದಲಿಗೆ ಬಂದಿದ್ದ ಇಕ್ಬಾಲ್ ಅಬ್ದುಲ್ಲಾ 3 ಓವರ್ ಗಳಲ್ಲಿ 34 ರನ್ ನೀಡಿ ದುಬಾರಿ ಎನಿಸಿದರು. ಹರ್ಷಲ್ ಪಟೇಲ್ 4-0-19-2 ಹಾಗೂ ಡೇವಿಡ್ ವೀಸೆ 29ಕ್ಕೆ 2 ಉತ್ತಮ ಪ್ರದರ್ಶನ ನೀಡಿದರು.
ಮತ್ತೊಮ್ಮೆ ಗೇಲ್ ಕೂರಿಸಿದ ತಪ್ಪು ಮಾಡಿದರೆ
ಕ್ರಿಸ್ ಗೇಲ್ ಬದಲಿಗೆ ಆಡಿದ ಆಸ್ಟ್ರೇಲಿಯಾದ ಮ್ಯಾಡಿಸನ್ ಕೂಡಾ ಬಿರುಸಿನ ಹೊಡೆತಗಳಿಗೆ ಹೆಸರುವಾಸಿ. ಅದರೆ, ಮ್ಯಾಡಿಸನ್ ಆಟ ನಡೆಯಲಿಲ್ಲ. ವರುಣ್ ಬದಲಿಗೆ ಬಂದ ಅಬ್ದುಲ್ಲಾ ಅಥವಾ ಚಾಹಲ್ ಸ್ಪಿನ್ ಮೋಡಿ ಮಾಡಲಿಲ್ಲ. ಟೀಂ ಆಯ್ಕೆಯಲ್ಲೇ ಆರ್ ಸಿಬಿ ಸೋಲು ಕಾಣುತ್ತಿದೆ ಎಂದು ತಜ್ಞರ ಅಭಿಪ್ರಾಯವಾಗಿದೆ.